ۆەلوسپورت الەمىندە ەڭ ءىرى ءۇش جارىس بار. ونىڭ ءبىرى – مامىر ايىندا يتاليادا وتەتىن «دجيررو» باسەكەسى, ەكىنشىسى – ۆەلوسپورتشىلاردىڭ بەيرەسمي الەم چەمپيوناتى سانالعان «تۋر دە فرانس», ءۇشىنشىسى كەشە عانا اياقتالعان «ۆۋەلتا». سوڭعى جارىسقا ءبىزدىڭ كوماندا بيىل ەرەكشە قۇراممەن باردى. وتاندىق سپورتشىلارعا سەنىم ارتقان «استانا» بۇل جولى ماقساتتى اسىرا ورىندادى دەۋگە بولادى.
سەبەبى, ەلوردا كومانداسى ءوزىنىڭ نەگىزگى ليدەرلەرىسىز-اق ءۇش كەزەڭنىڭ جەڭىمپازى اتاندى. ال ونىڭ بىرەۋى قازاقستاندىق جاس شاباندوز الەكسەي لۋتسەنكونىڭ ەنشىسىندە ەكەنىن ەسكەرسەك, بۇل جولعى گراند تۋردى ءساتتى ءوتتى دەي الامىز. العاشىندا الەكسەي كەزەڭ جەڭىمپازى اتاندى دەگەندى ەستىگەندە ءوز كوزىمىزگە ءوزىمىز سەنبەپ ەدىك. الايدا, ول جاستار اراسىنداعى الەم چەمپيونى, تالاي دودالاردا جۇلدە الىپ جۇرگەن تالانت ەكەنىن دە ەسكەرگەنىمىز ءجون. دەگەنمەن, گراند تۋردىڭ ورنى بولەك. وسىلايشا, ول ءىرى دودانى جەڭگەن ءتورتىنشى قازاقستاندىق شاباندوز اتاندى. ءدال يسپانياداعى «ۆۋەلتا» كوپكۇندىگىن وعان دەيىن تەك الەكساندر ۆينوكۋروۆ قانا جەڭگەن بولاتىن.
قازاقستاننان بارعان ءبىر توپ جۋرناليستەر يسپانيا تۋرىنىڭ 18-كەزەڭىندە قىزمەت ەتتىك. وسى كەزەڭدە مارە سىزىعىنا 600 مەتر قالعانعا دەيىن توپ باستاپ كەلە جاتقان الەكسەي لۋتسەنكو شارشاعانىن ءبىلدىرتىپ الدى. ايتپەگەندە ەكىنشى مارتە جەڭىمپاز اتانار ەدى. ساندەر ارمي دەگەن بەلگيالىق قارسىلاسى لۋتسەنكونىڭ ءسال كەشەۋىلدەپ قالعانىن ءدال بايقاسا كەرەك, تاۋعا قاراي ورمەلەي جونەلدى. ايتسە دە, كۇللى الەمگە تارالىپ جاتقان تەلەكورسەتىلىم بارىسىندا قازاقستاندىق شاباندوز ءبىزدىڭ ەلدى ءبىرشاما تانىتىپ تاستادى. ەندى بۇدان بىلاي الەكسەيدى ۆەلوسپورت الەمى مىقتىلار قاتارىنا قوسىپ, ليدەرلەر ساناتىنا جاتقىزا دا جاتار. ارينە, سونشىلىقتى گراند تۋر جەڭەتىن دەڭگەيگە ول ءالى جەتە قويعان جوق. تەك اراگىدىك وسىلاي كەزەڭدى باعىندىرىپ, كەرەك كەزىندە كوماندا كاپيتاندارىنا قىزمەت ەتە الادى. بۇل – ەڭ باستىسى. سەبەبى, تۇگەلىمەن جارىستى جەڭۋ – تەك ساناۋلى ادامداردىڭ عانا قولىنان كەلەدى. مىسالى, الەكسەي كريستوفەر فرۋم البەرتو كونتادوردىڭ وزىنە ادىم اشتىرمادى. قارسىلاستارىنا شاڭ قاپتىردى دا ءجۇردى. بريتانيانىڭ «Sky» كومانداسى كاپيتانى سوڭعى 3-4 جىل بويى ەشكىمگە دەس بەرمەي كەلەدى. بالكىم, ول ەكى نەمەسە ءۇش جىلدان كەيىن دوپينگپەن ۇستالاتىن دا شىعار دەپ جۇرگەندەر دە جوق ەمەس. ال كوپ ماماندار كريستىڭ تەگى تەگىن ەمەس دەيدى. اجەسى كەنيالىق بولعاندىقتان, ونىڭ جەلاياقتىعى ناعاشى جاقتان تاراپتى-مىس. ارينە, بۇل تۇجىرىممەن كەلىسپەسكە امال جوق. قازاقتا «بولار بالا ناعاشىدان» دەيدى عوي. كىم ءبىلسىن, بالكىم ەش ءدارۋ-دارمەكسىز دە مىقتى شىعار. بىزدە ازىرگە شاك كەلتىرەتىن ەشقانداي دالەل جوق. فرۋم – وسى كۇنگى ۆەلوسپورت الەمىنىڭ قاھارمانى. ونى جەڭۋ قيىننىڭ قيىنى.
«استانا» كومانداسىنىڭ سپورتتىق ديرەكتورى دميتري سەدۋن ءبىر اڭگىمەسىندە تاعى ءبىر قۋانىشتىڭ شەتىن شىعاردى. ء«بىر جارىستا ميگەل لوپەس ەكىنشى ورىن الدى. بۇل شاباندوزدى ءبىز بولاشاقتا كوماندانى كۇشەيتۋى مۇمكىن دەپ العان ەدىك. باسىندا كلۋبقا جاڭادان كەلگەن كولۋمبيالىققا اسا قاتتى ءمان بەرمەي جۇرگەنبىز. سويتسەك, بۇل بالامىز ناعىز تالانت ەكەن. مەن ءبىر جارىس اياقتالعاننان كەيىنگى پروتوكولعا ء«بىزدىڭ كوماندادا جاڭا تالانت, مىقتى فەنومەن بار», دەپ جازدىم. بۇل سوزىمنەن ەش ۇيالمادىم. بولجامىم ءدال كەلدى», دەپ اقتارىلدى سەدۋن مىرزا. ءيا, راسىمەن دە ونىڭ ايتقانى ايداي كەلىپتى. ميگەل انحەل لوپەس يسپانياداعى دودادا ەكى بىردەي كەزەڭنىڭ جەڭىمپازى اتاندى. ءبىر قىزىعى, بۇل شاباندوز ۆەلوسپورتتى 16 جاسىنان باستاعان. وعان دەيىن اتالعان سپورت تۇرىمەن ارنايى شۇعىلدانباپتى. كولۋمبيانىڭ تاۋلى ايماعىندا تۇراتىن ميگەل مەكتەپكە ۆەلوسيپەدپەن بارىپ-كەلىپ ءجۇرىپتى. ال ونىڭ مەكتەبى تەڭىز دەڭگەيىنەن 2000 مەتر بيىكتىكتە ورنالاسسا كەرەك. ياعني, تاۋلى جەردە شايتاناربا تەبۋدە ەش قيىندىق جوق. بالا كەزدەن بەرگى ماشىقتانىپ جۇرگەنى بار. بۇل ارينە, بولاشاقتا اتى اڭىزعا اينالاتىن سپورتشىعا ءتان وقيعا. وزدەرىڭىز بىلەتىندەي, الگى اتاقتى كولۋمبيالىق نايرو كينتانانىڭ دا عۇمىربايانى وسىلاي ەمەس پە؟! ميگەلدىڭ ءتۇبى توپ جارىپ, مىقتىلار قاتارىنا قوسىلۋى ۋاقىت ەنشىسىندەگى سۇراق بولعان. مىنە, وسى جولعى «ۆۋەلتادا» ءبىز سوعان كوز جەتكىزدىك. ەندى جاقىن اراداعى جارىستاردا ءبىزدىڭ كوماندادا ءۇشىنشى ليدەر پايدا بولادى دەگەن ءسوز. العاشقىسى – فابيو ارۋ, ەكىنشىسى – ياكوب فۋلسانگ, ال ءۇشىنشىسى – ميگەل انحەل لوپەس.
جاقىن اراداعى جارىستار دەمەكشى, ەندى «استانا» كومانداسى نورۆەگيانىڭ بەرگەن قالاسىندا وتەتىن الەم چەمپيوناتىنا قاتىسادى. ۆەلوسپورتتىڭ ءبىر ەرەكشەلىگى دە سوندا. كوماندا ەكىگە, ءتىپتى كەيدە ۇشكە ءبولىنىپ, جاھاننىڭ ءار قيىرىندا جارىسىپ جاتادى. يسپانيادا «ۆۋەلتا» بولىپ جاتقان شاقتا كانادادا تاعى ءبىر ءىرى تۋرنير ءوتتى. ول جاقتا دا «استانا» جەيدەسىن كيگەن شاباندوزدار جۇلدە سالدى. كوماندا مەنەدجەرلەرى دە جارىستان جارىسقا كۇنتىزبە بويىنشا تىنباي دايىندالىپ ءجۇر. «ۆۋەلتادا» كوماندا تىزگىنىن جامبىل جەرىنەن شىققان الەكساندر شەفەر مەن دميتري سەدۋن ۇستادى. سوڭىنا قاراي الەكساندر ۆينوكۋروۆ قوسىلىپ, شاباندوزدارعا شابىت بەردى. ەڭ سوڭعى 21-ءشى كەزەڭ يسپانيا استاناسى ءمادريدتىڭ باستى الاڭىندا ءوتتى. وتانداستارىمىز كوماندالىق ەسەپتە ءبىرىنشى ورىن الىپ, ماراپاتتاۋ راسىمىنە شىقتى. كۇللى ەۋروپا, جالپى ۆەلوسپورت سۇيەر قاۋىم «استاناعا» قىزىعا ءھام قىزعانا قاراعانى انىق. سەبەبى, بۇل كوماندا قۇرامى تالانتتى جاستاردان تۇرادى.
ەرمۇحامەد ماۋلەن,
جۋرناليست
ارنايى «ەگەمەن قازاقستان» ءۇشىن يسپانيادان