مەملەكەتتىك حاتشى گۇلشارا ابدىقالىقوۆا پارلامەنتاريلەردىڭ حالىقتىڭ قونىستانۋى جانە دامۋى جونىندەگى ازيا فورۋمى توراعاسى, جاپونيا پارلامەنتى كەڭەسشىلەرى پالاتاسىنىڭ دەپۋتاتى كەيدزو تاكەميمەن كەزدەستى.
مەملەكەتتىك حاتشى بيىل قازاقستان مەن جاپونيا اراسىندا ديپلوماتيالىق بايلانىس ورناعانىنا 25 جىل تولعانىن اتاپ ءوتتى. گ.ابدىقالىقوۆا ءوزارا قارىم-قاتىناسىنىڭ ستراتەگيالىق سيپاتىنا توقتالدى. ونىڭ پىكىرىنشە, ەكى ەل باسشىلارىنىڭ تۇراقتى كەزدەسۋلەرى ديپلوماتيالىق بايلانىستىڭ جوعارى دەڭگەيىن كورسەتەدى.
سونىمەن قاتار, گ.ابدىقالىقوۆا پارلامەنتارالىق بايلانىستىڭ دامۋىنا ك.تاكەميدىڭ قوسقان ۇلەسىن اتاپ ءوتتى. ول دەنساۋلىق ساقتاۋدىڭ ستراتەگياسىن ازىرلەۋ, پارلامەنتاريلەر اراسىنداعى ديالوگتىڭ ءوربۋى جانە ايەلدەردىڭ قۇقىعىن قورعاۋ ماسەلەلەرىندە قونىستانۋ جانە دامۋ جونىندەگى فورۋمدى تاجىريبە الماساتىن ماڭىزدى الاڭ دەپ سيپاتتادى.
مەملەكەتتىك حاتشى قازاقستانداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىندا بەلگىلەنگەن ايەلدەردىڭ قۇقىقتارى مەن مۇمكىندىكتەرىن نىعايتۋ سالاسىندا ەلىمىزدىڭ دايەكتى ساياسات جۇرگىزىپ وتىرعانىنا توقتالدى. ونىڭ ايتۋىنشا, بۇگىنگى تاڭدا ەلىمىزدە كاسىپكەرلەردىڭ 50 پايىزى نازىك جاندىلاردان قۇرالعان. باسقارۋشى قىزمەتتەگىلەردىڭ 40 پايىزى ايەلدەر قاۋىمىنان ەكەنىن دە ءسوز ەتتى مەملەكەتتىك حاتشى.
«الەۋمەتتىك جانە ەكونوميكالىق جەتىستىكتەر مەن دامۋدىڭ جاڭا دەڭگەيىنە سالالى كوشۋىنىڭ ارقاسىندا قازاقستان بۇگىندە كومەككە اسا مۇقتاج ەلدەردىڭ, ونىڭ ىشىندە اۋعانستان مەن ازيا-تىنىق مۇحيت ايماعى مەملەكەتتەرىنىڭ دامۋىنا جاردەمدەسۋ جانە كومەكتى ۇلعايتۋ مۇمكىندىكتەرىن قايتا قاراستىرىپ جاتىر. وسىعان وراي, بۇۇ دامۋ باعىتى جانە جاپونيا سىرتقى ىستەر مينيسترلىگى بىرلەسىپ, «دامۋعا رەسمي كومەك كورسەتۋ سالاسىنداعى اۋعانستانمەن ىنتىماقتاستىق بويىنشا قازاقستانعا جاردەمدەسۋ» اتتى جوبالىق قۇجات ازىرلەدى», – دەدى مەملەكەتتىك حاتشى.
كەزدەسۋ بارىسىندا گ.ابدىقالىقوۆا قازاقستان مەن جاپونيانىڭ بۇۇ قاۋىپسىزدىك كەڭەسىنە تۇراقتى ەمەس مۇشە بولىپ سايلانعانىن تىلگە تيەك ەتىپ, ەكى ەل اراسىنداعى سەرىكتەستىكتى نىعايتۋدا مۇنىڭ قوسىمشا مۇمكىندىكتەرگە جول اشاتىنىن جەتكىزدى.
ءوز كەزەگىندە ك.تاكەمي قازاقستاننىڭ الەمگە دامۋدىڭ زاماناۋي ۇلگىسىن كورسەتەتىنىن جەتكىزدى.
«قازاقستانعا كەلگەندەگى باستى ماقساتىم – فورۋم جۇمىسىن تانىستىرۋ بولاتىن. ساپار بارىسىندا پرەمەر-مينيستر باقىتجان ساعىنتاەۆپەن جانە ءماجىلىس توراعاسى نۇرلان نىعماتۋلينمەن كەزدەستىم. ءبىزدىڭ فورۋمنىڭ باستى ءۇش باعىتى بار: قوعامداعى ايەلدەر ءرولىن ارتتىرۋ, جاستارعا ينۆەستيتسيا سالۋ جانە قوعامنىڭ ءومىر ءسۇرۋ مەرزىمىن ۇلعايتۋ», – دەگەن ك.تاكەمي قازاقستاننىڭ فورۋمعا كوڭىل بولەتىنىنەن ءۇمىتتى ەكەنىن حابارلادى.
ايتا كەتۋ كەرەك, جيىنعا ءماجىلىس توراعاسىنىڭ ورىنباسارى گۇلميرا يسيمباەۆا دا قاتىستى. كەزدەسۋ سوڭىندا گ.ابدىقالىقوۆا ك.تاكەميدىڭ قازاقستانداعى ساپارىنا تابىس تىلەپ, قازاقستان مەن جاپونيا بايلانىسىنىڭ بۇدان ءارى بەكي تۇسەتىنىنە سەنىم ءبىلدىردى.
اباي اسانكەلدى ۇلى, «ەگەمەن قازاقستان»