قۇرمەتتى قازاقستاندىقتار!
ءبىز, دەموكراتيالىق كۇشتەردىڭ «قازاقستان-2050» جالپىۇلتتىق كواليتسياسىنىڭ مۇشەلەرى, ەلىمىزدىڭ جەتەكشى ساياسي پارتيالارىنىڭ, قازاقستان حالقى اسسامبلەياسىنىڭ, ءىرى قوعامدىق بىرلەستىكتەردىڭ, ۇكىمەتتىك ەمەس ۇيىمداردىڭ, بارلىق الەۋمەتتىك توپتار مەن ايماقتاردىڭ مۇددەسىن بىلدىرەتىن وكىلدەرى: تاۋەلسىز قازاقستاننىڭ مىقتى, جەتىستىكتى جانە الەمنىڭ بارلىق ەلدەرىنە سىيلى مەملەكەت بولىپ قالىپتاسۋىنداعى ەلىمىزدىڭ تۇڭعىش پرەزيدەنتىنىڭ ۇزدىك كوشباسشىلىعى مەن تاريحي ءرولىن جوعارى باعالاي وتىرىپ;
ەلىمىزدىڭ ساياسي, ەكونوميكالىق جانە الەۋمەتتىك سالاسىنىڭ ودان ءارى جاڭعىرۋىنداعى ەلباسىنىڭ مەملەكەتتىك ۇستانىمىن تولىق قولداي وتىرىپ; ءۇشىنشى جاڭعىرۋدىڭ ۇلتتىق جوبالارى مەن تاريحي وقيعالارى – ەكسپو-2017 حالىقارالىق كورمەسى, شانحاي ىنتىماقتاستىق ۇيىمى ءسامميتى, يسلام ىنتىماقتاستىعى ۇيىمىنىڭ (يىۇ) عىلىم جانە تەحنولوگيالار جونىندەگى ءبىرىنشى ءسامميتىنىڭ تەڭدەسسىز تابىستارى مەن جوعارى جاسامپازدىق رۋحىن قۇپتاي وتىرىپ;
مەملەكەت پەن ونىڭ ەكونوميكاسىن تولىق كولەمدە جاڭعىرتۋ جانە «قازاقستان-2050» ستراتەگياسىنىڭ ماقساتتارىنا جەتۋ ءۇشىن قوعامدىق سانانى وزىق ۇلگىدە جاڭعىرتۋ قاجەتتىلىگى تۋرالى ەلباسىنىڭ ۇستانىمىن تۇتاس قولداي وتىرىپ;
قازاقستاندىق ۇلتتى رۋحاني جاڭعىرتۋ نەگىزىندە قازاق ءتىلىن لاتىن قارپىنە كوشىرۋ جونىندەگى قازاقستان پرەزيدەنتى باستاماسىنىڭ ايرىقشا ماڭىزدىلىعىن ەسەپكە الا وتىرىپ;
قازاقستان ازاماتتارىنىڭ جانە كەلەشەك ۇرپاقتىڭ الدىنداعى تاريحي جاۋاپكەرشىلىكتى سەزىنە وتىرىپ;
قازاقستاننىڭ بارلىق ازاماتتارىن ەلباسىنىڭ قازاق ءتىلىن لاتىن قارپىنە كوشىرۋ جونىندەگى باستاماسىن تالقىلاۋعا بەلسەندى قاتىسۋعا جانە قولداۋعا شاقىرامىز.
ەلباسى ۇسىنىپ وتىرعان مەملەكەتتىك ءتىل جازۋىنىڭ جاڭعىرتىلۋىندا تەرەڭ تاريحي قيسىن بار. قازىرگى ۋاقىتتا مەملەكەتتەر مەن ۇلتتارعا اسا قاتال تالاپ قويىلىپ وتىر. ءوز ءداستۇرى مەن قۇندىلىقتارىن, مادەنيەتى مەن ءتىلىن جوعالتپاي تۇراقتى جاڭارۋعا, جاڭعىرۋعا, باسەكەلىك ارتىقشىلىقتارىن كۇشەيتۋگە باعىتتالعانداردىڭ عانا دەربەس بولاشاعى بار.
لاتىن ءالىپبيى الەمدە ەڭ كەڭ تارالعان. لاتىن گرافيكاسى قازىرگى زامانعى تەحنولوگيالىق ورتانىڭ, باعدارلامالاۋدىڭ جانە ينفوكوممۋنيكاتسيالىق تەحنولوگيالاردىڭ بارلىق تىلدەرىنىڭ سيمۆولدىق نەگىزى بولىپ تابىلادى.
قازىرگى زامانداعى الەمدە يننوۆاتسيالاردىڭ, عىلىمي جاڭالىقتار مەن ءبىلىم بەرۋ ادەبيەتىنىڭ باسىم كوپشىلىگى اعىلشىن تىلىندە جاريالانادى. اعىلشىن ءالىپبيىنىڭ نەگىزىندە لاتىن قارپىنە كوشۋ قازاق ءتىلىنىڭ جاڭا ەۆوليۋتسيالىق كەزەڭى بولىپ تابىلادى. لاتىنعا كوشۋ ارقىلى ءبىز ۇلتىمىزدىڭ الەمدىك باسەكەگە قابىلەتتىلىگىن ارتتىراتىن ءۇش ماسەلەنى شەشەمىز. بىرىنشىدەن, اعىلشىن ءالىپبيىنىڭ نەگىزىندەگى جاڭا قارىپ جۇيەسى جاستارىمىزدىڭ دا جاسامىستارىمىزدىڭ دا اعىلشىن ءتىلىن مەڭگەرۋىن جەڭىلدەتەدى ءارى جەدەلدەتەدى. ەكىنشىدەن, اعىلشىن ءالىپبيى مەن ءتىلىن ۇيرەنۋ ارقىلى عىلىم-ءبىلىمنىڭ وسى تىلدە جاسالعان مول قازىناسىن ەركىن يگەرۋگە جول اشادى. ۇشىنشىدەن, جەر جۇزىنە تارىداي شاشىلعان بار قازاقتىڭ باسىن قوسادى. لاتىن قارپىنە كوشە وتىرىپ, قازىرگى زامانعى قازاق ءتىلى باسەكەگە قابىلەتتىرەك بولادى, ءوز دامۋى مەن تانىمالدىلىعىندا جاڭا قارقىن الادى.
مەملەكەت باسشىسى اتاپ وتكەندەي, «لاتىن قارپى بىزگە بۇكىل الەم حالىقتارىمەن, الەمدىك عىلىم جانە ءبىلىم بەرۋمەن اشىق قارىم-قاتىناس جاساۋ ءۇشىن كەرەك».
مەملەكەتتىك ءتىلدىڭ جاڭا ءالىپبيى قازاقستاندىقتاردىڭ نىعايۋى مەن بىرلىگىنىڭ مىقتى قۇرالى رەتىندە قىزمەت ەتۋى ءتيىس. لاتىن جازۋى – بۇل قازاقستاننىڭ دامىعان دەموكراتيالىق مەملەكەت بولۋى مەن الەمنىڭ ەڭ دامىعان 30 ەلىنىڭ قاتارىنا قوسىلۋ ۇمتىلىسىنداعى دەربەس وركەنيەتتىك تاڭداۋى. ەلباسىمىز «لاتىن قارپىنە كوشۋ ورىس ءتىلى مەن كيريلليتسادان باس تارتۋدى بىلدىرمەيدى. ءبىز بارلىق قازاقستان ازاماتتارى تىلدەرىنىڭ ۇشتۇعىرلىعىن قامتاماسىز ەتە وتىرىپ, بىرەگەي بايلىعىمىز – بيلينگۆيزمدى اعىلشىن ءتىلىن مەڭگەرۋمەن نىعايتىپ, تولىقتىرۋىمىز قاجەت» دەپ ەرەكشە اتاپ ءوتتى. لاتىن قارپىنە كوشۋ – ءبىزدىڭ ەلىمىز ءۇشىن قاعيدالى ماسەلە جانە قازاقستاننىڭ ءاربىر ازاماتىنىڭ قاتىسۋىن تالاپ ەتەدى.
ءبىز قازاقستان تاۋەلسىزدىك جىلدارى وتكەن بىرەگەي تاريحي جولى, جالپىۇلتتىق بىرلىك پەن قوعامدىق كەلىسىم, حالىقتىڭ رۋحاني كۇشى, ونىڭ ۋاقىت تالاپتارىن قابىلداپ, تەك العا ءجۇرۋ قابىلەتى ءبىزدىڭ مەملەكەتىمىزدىڭ جەتىستىگىنىڭ ايقىنداۋشى فاكتورى بولعان جانە بولاشاقتا بولا بەرەتىنىنە نىق سەنەمىز.
دەموكراتيالىق كۇشتەردىڭ «قازاقستان-2050» جالپىۇلتتىق كواليتسياسىنىڭ مۇشەلەرى قازاقستاندىقتاردىڭ بولاشاق ۇرپاعى ءۇشىن ەلباسىنىڭ باستاماسىن قولداۋعا بارشا جانە ءاربىر ازاماتىن شاقىرادى.
«نۇر وتان» پارتياسى, «اق جول» دەموكراتيالىق پارتياسى, «اۋىل» حالىقتىق-دەموكراتيالىق پارتياسى, قازاقستان كوممۋنيستىك حالىقتىق پارتياسى, «بىرلىك» ساياسي پارتياسى, «اتامەكەن» قازاقستان رەسپۋبليكاسىنىڭ ۇلتتىق كاسىپكەرلەر پالاتاسى, «ارداگەرلەر ۇيىمى» رەسپۋبليكالىق قوعامدىق بىرلەستىگى, «رەسپۋبليكالىق ايەلدەر كەڭەسى» قوعامدىق بىرلەستىگى, «قازاقستان رەسپۋبليكاسىنىڭ كاسىپوداقتار فەدەراتسياسى» رەسپۋبليكالىق كاسىپوداقتار بىرلەستىگى, «قازاقستان رەسپۋبليكاسىنىڭ ۇلتتىق عىلىمدار اكادەمياسى» رەسپۋبليكالىق قوعامدىق بىرلەستىگى, «قازاقستاننىڭ ازاماتتىق اليانسى» زاڭدى تۇلعالار بىرلەستىگى, «قازاقستان رەسپۋبليكاسى قارۋلى كۇشتەرىنىڭ ارداگەرلەرى» قوعامدىق بىرلەستىگى, «قازاقستان رەسپۋبليكاسىنىڭ ۇلتتىق ينجەنەرلىك اكادەمياسى» رەسپۋبليكالىق قوعامدىق بىرلەستىگى, «قازاقستان كاسىپكەرلەرى فورۋمى» زاڭدى تۇلعالار بىرلەستىگى, «قازاقستاننىڭ كاسىپكەر ايەلدەرى وداعى» قوعامدىق بىرلەستىگى, «G-Global حالىقارالىق حاتشىلىعى» قاۋىمداستىعى» زاڭدى تۇلعالار بىرلەستىگى, «جاسىل» ەكونوميكانى قولداۋ جانە G-Global-دى دامىتۋ كواليتسياسى» زاڭدى تۇلعالار بىرلەستىگى, «قازاقستان تۇتىنۋشىلارىنىڭ ۇلتتىق ليگاسى» قوعامدىق بىرلەستىگى, «قازاقستاننىڭ ىسكەر ايەلدەر قاۋىمداستىعى» رەسپۋبليكالىق قوعامدىق بىرلەستىگى, «قازاقستان ارداگەرلەرى» اۋعانستان سوعىسى ارداگەرلەرى ۇيىمدارىنىڭ قاۋىمداستىعى, «قازاقستان ۋكرايندارىنىڭ راداسى» قوعامدىق بىرلەستىگى, «جاڭارۋ» سىبايلاس جەمقورلىققا قارسى جالپىۇلتتىق قوزعالىسى» رەسپۋبليكالىق قوعامدىق بىرلەستىگى, «قازاقستاننىڭ داعدارىس ورتالىقتارى وداعى» زاڭدى تۇلعالار بىرلەستىگى, «قازاقستان مۇگەدەكتەر كونفەدەراتسياسى» رەسپۋبليكالىق قوعامدىق بىرلەستىگى, قازاقستان رەسپۋبليكاسى پرەزيدەنتىنىڭ «بولاشاق» حالىقارالىق ستيپەندياسى ستيپەندياتتارىنىڭ قاۋىمداستىعى» قوعامدىق بىرلەستىگى, «قازاقستان-2050» جالپىۇلتتىق قوزعالىسى, «جۇلدىز» بالالار قوعامدىق ۇيىمدارىنىڭ وداعى» قوعامدىق بىرلەستىگى.
2017 جىلعى 13 قىركۇيەك استانا قالاسى