قازاقستانداعى ترانسفورماتور قۇرايتىن جالعىز كاسىپورىن جىلدان جىلعا جۇمىس ۇدەمەلىلىگىن ارتتىرىپ كەلەدى. ماسەلەن, وسى جىلدىڭ سەگىز ايىندا كەنتاۋ ترانسفورماتور زاۋىتى 12 ملرد. تەڭگەگە جۋىق ءونىم وندىرگەن. بۇل وتكەن جىلعىنىڭ ءتيىستى كەزەڭىمەن سالىستىرعان 50 پايىزعا جوعارى.
ەلەكتروماتور, گەنەراتور جانە تراسنفورماتور شىعاراتىن ءوندىرىس ورنى وسى ارالىقتا 10988 دانا زاتتاي تاۋار شىعارعان. كاسىپورىن وندىرىلگەن ءونىمنىڭ 40 پايىزىن رەسەي, قىرعىزستان, وبەكستان جانە تاجىكستان ەلدەرىنە ەكسپورتتاعان. زاۋىت ونىمدەرىنىڭ نەگىزگى تۇتىنۋشىلارىنىڭ قاتارىندا «قازمۇنايگاز» اق, «قازاقستان تەمىرجولى» اق, «قازترانسويل» اق سياقتى الپاۋىت مەكەمەلەر مەن ورتا ازيا مەملەكەتتەرى بار.
مۇندا 1011 قالا تۇرعىنى ءۇش اۋىسىمدا تۇراقتى ەڭبەك ەتەدى. ولاردىڭ كوبى جاستار. كاسىپورىن جانىنان اشىلعان كوللەدجدىڭ 500-گە جۋىق ستۋدەنتى دۋالدى جۇيەمەن وسىندا ماماندىعىن تولىق مەڭگەرەدى. سونىڭ ناتيجەسىندە, جۇمىس ونىمدىلىگى ارتىپ, ساپالى تاۋار شىعارىلۋدا.
جاڭا تەحنيكامەن جاراقتاندىرىلۋعا جانە جاڭا ءونىم شىعارۋعا زاۋىت باسشىلىعى ءاردايىم باسىمدىق بەرەدى. كەڭەس وداعى تۇسىنداعى جابدىقتار قازىر جارامسىز. سوندىقتان زاۋىت قۇرىلعالى بەرى مۇنداعى تەحنولوگيانىڭ بارلىعى تۇگەلىمەن جاڭالاندى. ءوندىرىس كولەمى 20 جىلدا 20 ەسەگە ءوستى.