قازاقستان پرەزيدەنتى يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى ءسامميتى اياسىندا وسى ۇيىمنىڭ باس حاتشىسى يۋسەف بەن احماد ءال-وسەيمينمەن كەزدەستى. بۇل تۋرالى akorda.kz xابارلادى.
اڭگىمە بارىسىندا مەملەكەت باسشىسى قازاقستان بۇل ۇيىمنىڭ جۇمىسىنا تولىقتاي قاتىسۋ ءۇشىن قاجەتتى بارلىق شارالاردى قابىلداپ وتىرعانىن اتاپ ءوتتى.
– بۇگىنگى ءىس-شارا اسا ماڭىزدى. ءبىز ءسامميتتىڭ ناتيجەلەرى تابىستى بولادى دەپ ۇمىتتەنەمىز, – دەدى نۇرسۇلتان نازارباەۆ.
يسلام ىنتىماقتاستىعى ۇيىمىنىڭ باس حاتشىسى قازاقستان پرەزيدەنتىنە ءسامميتتى جوعارى دەڭگەيدە ۇيىمداستىرعانى ءۇشىن ريزاشىلىعىن ءبىلدىردى.
– قازاقستاننىڭ يسلام الەمىندەگى بەدەلى زور. بۇگىنگى سامميتكە كەلگەن بارلىق دەلەگاتسيا وكىلدەرىنىڭ اتىنان سىزگە جانە قازاقستان حالقىنا قوناقجايلىق كورسەتىپ, ءىس-شارانى جوعارى دەڭگەيدە وتكىزگەندەرىڭىز ءۇشىن العىس ايتامىن, – دەدى باس حاتشى.
يۋسەف بەن احماد ءال-وسەيمين يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى ءسامميتى العاش رەت وتكىزىلىپ وتىرعانىنا توقتالدى.
– مۇنى تاريحي وقيعا دەپ زور سەنىممەن ايتۋعا بولادى. 57 يسلام ەلىنىڭ وكىلدەرى عىلىم مەن تەحنولوگيا سالاسىنداعى وزەكتى ماسەلەلەردى تالقىلاۋ ءۇشىن باس قوستى. ءبىز ۇلى ءدىنىمىزدىڭ جاڭا قىرلارىن اشا تۇسەمىز دەپ ۇمىتتەنەمىن. وكىنىشكە قاراي, تەرروريستىك ۇيىمدار الەمدەگى يسلامنىڭ بەدەلىنە نۇقسان كەلتىرۋدە, – دەدى يسلام ىنتىماقتاستىعى ۇيىمىنىڭ باس حاتشىسى.
ۇيىم باسشىسى كەڭ اۋقىمدا تانىمال وكىلدەر قاتىسقان بۇگىنگى كەزدەسۋ قازاقستان پرەزيدەنتى بەدەلىنىڭ ارقاسىندا وتكىزىلىپ وتىرعانىن ايتتى.
يۋسەف بەن احماد ءال-وسەيمين يسلام ەلدەرىنىڭ حالىقارالىق كۇن تارتىبىندەگى وزەكتى ماسەلەلەر جونىندە ورتاق ۇستانىم قالىپتاستىرۋعا جانە يسلامدىق ەمەس ۇيىمدارمەن سىندارلى ىنتىماقتاسۋعا باعىتتالعان ۇيىمنىڭ الداعى جۇمىس جوسپارى تۋرالى وي ءبولىستى.
سونداي-اق, ۇيىم باسشىسى قازاقستاننىڭ جاڭا ەلورداسى – استانانىڭ ادەمىلىگىنە تامساناتىنىن ايتىپ, قالانىڭ ينۆەستيتسيالىق تارتىمدىلىعىنا توقتالدى.
نۇرسۇلتان نازارباەۆ يۋسەف بەن احماد ءال-وسەيميننىڭ يسلام ىنتىماقتاستىعى ۇيىمىنىڭ دامۋىنا تىڭ سەرپىن بەرەتىن بىلىكتى باسشى ەكەنىن اتاپ ءوتتى.
– ءسىزدىڭ قىزمەتىڭىزگە تابىس تىلەيمىن, ءبىزدى قولدايتىنىڭىزعا سەنەمىن. قازىرگى ۋاقىتتا لاڭكەستىك شابۋىلداردىڭ كوبىسى يسلام ەلدەرىندە بولۋدا. وسى ورايدا ءسىزدىڭ بۇل زاۋالمەن بىرلەسە كۇرەس جۇرگىزۋ قاجەتتىگى جونىندەگى ءسوزىڭىز ورىندى, – دەدى مەملەكەت باسشىسى.
سوڭىندا قازاقستان پرەزيدەنتى ورتا عاسىرلاردا نەگىزگى عىلىمي جاڭالىقتار يسلام الەمىندە اشىلعانىنا ەرەكشە توقتالدى.
– مۇنى ءاردايىم ەستە ۇستاپ, ايانباي ەڭبەك ەتۋىمىز قاجەت. ءبىز عىلىم مەن تەحنولوگيالارعا ارنالعان ءسامميتتى ءتورتىنشى ونەركاسىپ توڭكەرىسى كەزىندە تەكتەن-تەك وتكىزىپ وتىرعان جوقپىز, – دەدى نۇرسۇلتان نازارباەۆ.