ورال قالاسىندا كومپوزيتور تەمىرالى باقتىگەرەەۆتى ەسكە الۋعا ارنالعان «بارىپ قايت, بالام, اۋىلعا» اتتى كەش ءوتتى.
باتىس قازاقستان وبلىستىق قازاق دراما تەسترىندا وتكەن ەسكە الۋ كەشىندە تانىمال ونەرپازدار – قازاقستان رەسپۋبليكاسىنىڭ ەڭبەك سىڭىرگەن قايراتكەرلەرى نۇرلان ونەرباەۆ, سايات مەدەۋوۆ, قر ەڭبەك سىڭىرگەن ءارتىسى سۇلۋشاش نۇرماعامبەتوۆا, ءانشى-تەرمەشى مەيرامگۇل وراشەۆالار ارنايى كەلدى. جەرلەس كومپوزيتوردى ەسكە الۋ شاراسىنا باتىس قازاقستان وبلىستىق فيلارمونياسىنىڭ ارتىستەرى – قازاقستان رەسپۋبليكاسى مادەنيەت قايراتكەرى ساعادات راحمەتجانوۆ, «ەرەن ەڭبەگى ءۇشىن» مەدالىنىڭ يەگەرلەرى جاسكەلەڭ عايساعاليەۆ, جاڭىلسىن حاسانوۆا, ايبار حايىرحانوۆ, قازاقستان رەسپۋبليكاسى مادەنيەت سالاسىنىڭ ۇزدىگى مايرا حايداروۆالار دا قاتىسىپ, ونەر كورسەتتى.
اقىن ايسۇلۋ قادىرباەۆانىڭ سوزىنە جازىلعان «بارىپ قايت, بالام, اۋىلعا» ءانى – تەمىرالى باقتىگەرەەۆ شىعارماشىلىعىنىڭ شىڭىندا تۇرعان تۋىندى. سازگەردى ەسكە الۋ كەشى دە وسى انمەن اشىلدى. كورەرمەندەر كومپوزيتور تۋرالى ارنايى تۇسىرىلگەن بەينەفيلمدى تاماشالادى.
– تەمىرالى باقتىگەرەەۆپەن سوناۋ سەكسەنىنشى جىلدارى قازاق ونەرىنىڭ قارا شاڭىراعى م.اۋەزوۆ اتىنداعى اكادەميالىق دراما تەاترىندا قىزمەت ەتىپ ءجۇرىپ تانىستىم. ول كىسى سول كەزەڭدە تەاتردىڭ دىبىس وپەراتورى ەدى. مەنىڭ قويىلىمداردا ءان ايتىپ جۇرگەنىمدى سىرتتاي باقىلاپ جۇرەدى ەكەن. ول ۋاقىتتا گيتارا اسپابىن ەندى ۇيرەنىپ جۇرگەن كەزىم. «نۇرلان, سەن گيتارامەن ءان ايتقىڭ كەلە مە؟ مەندە ءبىر جاقسى ءان بار. تىڭداپ كور» دەپ «ساعىنىش» ءانىن تىڭداتتى. ءسويتىپ مەنىڭ ەڭ ءبىرىنشى شىرقاعان ءانىم دە, ءبىرىنشى كومپوزيتورىم دا تەمىرالى باقتىگەرەەۆ بولدى. تەمىرالى باقتىگەرەەۆتىڭ شىعارماشىلىعى, ونىڭ دوسقا, ونەرپازعا دەگەن ادالدىعى, بويىنداعى ادامگەرشىلىگى, كىشىپەيىلدىلىگى, قاراپايىمدىلىعى مەن ءۇشىن ساعىنىشقا اينالدى. اعامىز: «نۇرلان, ءبىزدىڭ ەلگە بارامىز, ۇلكەن كونتسەرت قويامىز» دەپ تۋعان جەرىن اۋزىنان تاستاماي, ۇنەمى ايتىپ ءجۇرۋشى ەدى. وسى جوسپارى ناۋقاسقا شالدىققاننان كەيىن ارمانعا اينالدى. كوڭىلگە دەمەۋ بولارى – اعامىزدىڭ ۇلكەن كەشى كوزىنىڭ تىرىسىندە الماتىدا ءوتتى. ال ونىڭ كوكەيىندە كەتكەن ءبىر ارمانىن بۇگىن ءبىز ورىنداپ تۇرمىز. اعامىزدىڭ تۋعان توپىراعىنا ونىڭ ءانىن, شىعارمالارىن الىپ كەلدىك. ەندى تەمىرالى باقتىگەرەەۆتىڭ كىندىك قانى تامعان تۋعان جەرىمەن ماڭگىلىك ۇزىلمەس بايلانىسى باستالدى, – دەدى نۇرلان ونەرباەۆ تولقىپ تۇرىپ.
قازاقستان رەسپۋبليكاسىنىڭ ەڭبەك سىڭىرگەن قايراتكەرى سايات مەدەۋوۆ, اقىن ايسۇلۋ قادىرباەۆا, كومپوزيتوردىڭ زايىبى ءجاميلا اپاي ساحنادا ءسوز الىپ, سازگەر تۋرالى اسەرلى ەستەلىكتەرىمەن ءبولىستى. باتىس قازاقستان وبلىسىنىڭ ءبىرىنشى ورىنباسارى ارمان وتەعۇلوۆ كومپوزيتوردىڭ جارىنا, الماتى قالاسىندا تەمىرالى باقتىگەرەەۆتىڭ ۇلكەن كەشىن ۇيىمداستىرۋعا ۇيىتقى بولعان قازاقستان رەسپۋبليكاسىنىڭ ەڭبەك سىڭىرگەن ءارتىسى سۇلۋشاش نۇرماعامبەتوۆاعا قۇرمەت كورسەتىپ, سىي-سياپات جاسادى.
– جەرلەسىمىز تەمىرالى باقتىگەرەەۆتىڭ «بارىپ قايت, بالام, اۋىلعا» ءانى تۋعان جەرىنەن جىراقتا جۇرگەن بارشا قازاقتىڭ جۇرەگىنەن ورىن العان اسەرلى تۋىندى بولدى. اعامىز بۇدان وزگە دە كوپتەگەن مىقتى تۋىندىلاردى دۇنيەگە اكەلدى. تەمىرالى اعامىزدىڭ شىعارماشىلىق كەشتەرى ءوزىنىڭ كىندىك قانى تامعان قازتالوۆ اۋدانى قايىڭدى اۋىلىندا دا جالعاسىن تابار دەپ ويلايمىن, – دەدى ارمان كارىم ۇلى.
قازبەك قۇتتىمۇرات ۇلى,
«ەگەمەن قازاقستان»
سۋرەتتى تۇسىرگەن رافحات حالەلوۆ