22 قىركۇيەكتە استانادا الەۋمەتتىك قىزمەتكەرلەردىڭ العاشقى قازاقستاندىق فورۋمى وتەدى. بۇل تۋرالى اقتوبە وبلىسىنىڭ جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى قايرات وتاروۆ «اقتوبە اقپارات» اقپاراتتىق ورتالىعىندا وتكىزگەن ءباسپاسوز ءماسليحاتىندا حابارلادى.
فورۋمنىڭ ماقساتى - الەۋمەتتىك قورعاۋ سالاسىندا جيناقتالعان تاجىريبەنى تالداپ قورىتۋ جانە سالانىڭ نەگىزگى باعدارىن انىقتاۋ. شارانىڭ ۇيىمداستىرۋشىسى - بۇۇ, يۋنيسەف دامىتۋ باعدارلامالارىنىڭ, كوشى-قون بويىنشا حالىقارالىق ۇيىمىنىڭ, ەقىۇ, بۇۇ, حالىقارالىق تۇرمە رەفورماسىنىڭ قولداۋىمەن قر ەڭبەك جانە حالىقتى الەۋمەتتىك قورعاۋ مينسترلىگى.
فورۋمعا 600-دەي ادام كەلەدى: ولاردىڭ اراسىندا ۇلىبريتانيا, سەربيا, حورۆاتيا, چەحيا, رەسەي, گرۋزيا ەلدەرىنىڭ حالىقارالىق ساراپشىلارى بار.
شاراعا قر پارلامەنتىنىڭ, ۇكىمەتىنىڭ, ورتالىق جانە جەرگىلىكتى اتقارۋشى ورگانداردىڭ, وقۋ ورىندارى مەن ۇكىمەتتىك ەمەس ۇيىمداردىڭ وكىلدەرى قاتىسادى. پراكتيك ماماندار, عالىمدار, قوعامدىق جانە ساياسي قايراتكەرلەر ءوڭىردىڭ ەرەكشەلىكتەرىن ەسكەرە وتىرىپ, الەۋمەتتىك جۇمىستىڭ دامۋ مۇمكىندىگى مەن ەرەكشەلىگىن تالقىلايدى, مۇگەدەكتىگى بار تۇلعالارعا, قارتتارعا, ۇيسىزدەرگە, تۇرمىستىق قىسىمنىڭ قۇرباندارىنا, ادام ساۋداسىنىڭ قۇرباندارىنا كاسىبي كومەك بەرۋدەگى زاماناۋي تەحنولوگيالارعا نازار اۋدارادى.
تۇرمە سالاسىنداعى الەۋمەتتىك جۇمىستى دامىتۋدىڭ تاجىريبەسى مەن كەلەشەگىن, دەنساۋلىق ساقتاۋ, جاڭا تەحنولوگيالار مەن الەۋمەتتىك ساياساتتى جۇزەگە اسىرۋداعى ۆەدومستۆوارالىق جانە سەكتورارالىق ءوزارا ارەكەت ەتۋدى تالقىلاۋ جوسپاردا بار.
ءبىرىنشى فورۋم بارىسىندا الەۋمەتتىك سالاداعى مەنەدجەمەنت, الەۋمەتتىك قىزمەتكەرلەردى دايىنداۋ جانە ولاردىڭ بىلىكتىلىگىن ارتتىرۋ, كوممەرتسيالىق ەمەس ۇيىمداردىڭ ارنايى الەۋمەتتىك كومەك كورسەتۋگە قاتىسۋىن كەڭەيتۋ, ۆولونتەرلىك پەن قايىرىمدىلىقتى قولداۋ سەكىلدى وزەكتى ماسەلەلەر تالقىلانادى دەپ كۇتىلۋدە.
فورۋم اياسىندا «قازاقستاندا جۇزەگە اسىرىلاتىن ۇزدىك الەۋمەتتىك جوبالار» اتتى بەسىنشى مەرەيتويلىق رەسپۋبليكالىق كورمە مەن «الەۋمەتتىك اۋدارىمدار - جۇمىسپەن قامتىلعان حالىققا ادەكۆاتتى الەۋمەتتى تولەمدەردى قامتاماسىز ەتۋ» سەمينارى وتەدى.
فورۋم جاڭا بايلانىستاردى ورناتۋ, جاڭا يدەيالار مەن الەۋمەتتىك جۇمىستى جاڭعىرتۋدىڭ باعىتتارىن, الەۋمەتتىك سالانى ءارى قارايعى يننوۆاتسيالىق دامىتۋ ماقساتىندا ءتيىمدى شەشىمدەردى ىزدەۋ, قازاقستان حالقىنا ۇسىنىلاتىن الەۋمەتتىك قىزمەتتەردىڭ ساپاسى مەن قول جەتىمدىلىگىن ارتتىرۋ ماسەلەلەرىن قاراستىرادى.