وتكەن دەمالىس كۇندەرى قالالىق ساياباقتا «ورتاق شاڭىراقتا ءومىر سۇرەمىز» فەستيۆالى اياسىندا «ايرەنيك» ەتنومادەني بىرلەستىگى قالالىقتاردى مەرەكەگە شاقىردى.
ارمياندار مەرەكەلەرىن دومبىرانىڭ كۇمبىرلەگەن كۇيىمەن باستادى. ولار دا ءبىزدىڭ حالقىمىز سەكىلدى قوناقجايلىلىعىمەن بەلگىلى. مەرەكە اياسىندا «ايرەنيك» ەتنومادەني بىرلەستىگى ارميانداردىڭ اندەرى مەن بيلەرىن بيلەپ تاڭقالدىردى.
بۇل كۇنى «ايرەنيك» ارميانداردىڭ دجانگيۋلۋم دەپ اتالاتىن ۇلتتىق مەيرامدارىنان ۇزىندىلەر كورسەتتى. جاس جىگىتتەر مەن قىزدار ەرتە تۇرىپ, تاڭ الدىندا تاۋعا بارىپ جەتى ءتۇرلى گۇل جينايدى, جەتى ءتۇرلى بۇلاقتان سۋ الادى ەكەن.
جينالعاندار مۋزىكا اۋەنىمەن وزدەرى دە بىرگە بيلەپ كەتتى, اسىرەسە, «ەرەبۋني» ۆوكالدىق توبىنىڭ جانە سۋساننا اراكەليان مەن وۆسەپيان سيۋزاننىڭ ورىنداۋىنداعى ارميان حالقىنىڭ اندەرىن تىڭدادى. جاسوسپىرىمدەر «جىگىتتىڭ كۇشى» دەپ اتالاتىن كوڭىلدى ويىن وتكىزدى.
وتكەن جىلى جەرگىلىكتى اسسامبەليا قۇرامىنداعى «ايرەنيك» ارميان قوعامى 20 جىلدىعىن اتاپ ءوتتى. قازىر ەلىمىزدە 40 مىڭنان استام ارميان ۇلتىنىڭ وكىلدەرى ءومىر سۇرسە, وبلىستا مىڭنان استام ارميان تۇرادى.
مەرەكە سوڭىندا «ايرەنيك» ارميان ەتنومادەني بىرلەستىگىنىڭ ءتورايىمى پەتروسيان ەلميرا مەرەكە قوناقتارىنا ريزاشىلىعىن ءبىلدىرىپ, قازاق جەرىندەگى تاتۋلىق پەن بىرلىكتى ساقتاۋعا شاقىردى. بالالاردى جانە اتا-انالاردى جاڭا وقۋ جىلىنىڭ باستالۋىمەن قۇتتىقتادى.
فاريدا بىقاي, «ەگەمەن قازاقستان»
پاۆلودار
سۋرەتتى تۇسىرگەن: ماقسات ايتباي