ورالدا «قالا كۇنى» مەرەكەسى 10 كۇن تويلانادى. بۇل جونىندە قالا اكىمىنىڭ ورىنباسارى مەربولات نۇرجانوۆ بقو وڭىرلىك كوممۋنيكاتسيالار قىزمەتىنىڭ الاڭىندا مالىمدەدى.
اكىم ورىنباسارىنىڭ ايتۋىنشا, قالا كۇنىن قىركۇيەك ايىندا اتاپ ءوتۋ جىل سايىن داستۇرگە اينالعان. بيىل نەگىزگى مەرەكەلىك شارالار 2-10 قىركۇيەك ارالىعىنا جوسپارلانىپ وتىر. سونداي-اق, 22 شىلدەدەن بەرى «تۋعان جەر» اۋدانارالىق كوركەمونەر فەستيۆالى قادىر مىرزا ءالى اتىنداعى مادەنيەت جانە ونەر ورتالىعىنىڭ امفيتەاترىندا ءار سەنبى سايىن ءوتىپ جاتىر. «بۇل مەرەكە بارىمىزگە ورتاق. سوندىقتان, ونى ءوز دەڭگەيىندە ۇيىمداستىرىپ, وتكىزۋگە بارشامىز اتسالىسۋعا ءتيىسپىز», – دەپ اتاپ ءوتتى م.نۇرجانوۆ.
«قالا كۇنى-2017» مەرەكەسى اياسىندا Instagram, Facebook, VK الەۋمەتتىك جەلىلەرىندە «مەنىڭ سۇيىكتى ورالىم» تاقىرىبىنا ەڭ ۇزدىك فوتوسۋرەت پەن بەينەروليككە بايقاۋى, «ۇزدىك پيك», «تازا اۋماق», «ۇزدىك ءۇي», «تازا پودەزد» نوميناتسيالارى بويىنشا «جاسىل قالا» بايقاۋى, دەربەس ماماندىقتار بويىنشا «ۇزدىك مامان» بايقاۋى ۇيىمداستىرىلىپ, جايىق وزەنى جاعاسىندا «جايىق سازى» ءداستۇرلى ونەر فەستيۆالى وتپەك. اۆتوكولىك سانقويلارى «اۆتوتيۋنينگ شوۋ» شاراسىنا قاتىسسا, گاگارين اتىنداعى كينوتەاتر ءبىر اپتا بويى كورەرمەنگە وتاندىق فيلمدەر ۇسىنادى. 5 قىركۇيەكتە جاڭا الاڭدا «POP Simphony» كونتسەرتى وتسە, 6 قىركۇيەكتە ورال قالاسى اكىمىنىڭ كۋبوگىنا ارنالعان كۆن فەستيۆالى جاستاردى قادىر مىرزا ءالى اتىنداعى مادەنيەت جانە ونەر ورتالىعىنىڭ امفيتەاترىنا جيناماقشى. مەرەكەلىك شارالار اياسىندا «دومبىرا PARTY» فەستيۆالى, «نۇرلى جەر» باعدارلاماسى بويىنشا زاشاعان كەنتىندە 180 پاتەرلى كوپقاباتتى تۇرعىن ءۇي جانە مەملەكەتتىك-جەكە ارىپتەستىك باعدارلاماسى بويىنشا دەپوۆسكايا كوشەسىندەگى 90 پاتەرلى كوپقاباتتى تۇرعىن ءۇيدىڭ كىلتىن تاپسىرۋ شاراسى, ورال قالاسى اكىمىنىڭ كۋبوگىنا ارنالگان ۆولەيبولدان «دوستىق-درۋجبا» حالىقارالىق جارىسى, قالانىڭ ساۋدا ورتالىقتارىندا «جەڭىلدىكتەر كۇنى» ناۋقانى, تەاترلىق باعدارلاما, قازاقستاننىڭ ەسترادا جۇلدىزدارى تورەعالي تورەالى, ەركە ەسماحان جانە سون پاسكالدىڭ قاتىسۋىمەن كەشكى كونتسەرتتىك باعدارلاما, مەرەكەلىك وتشاشۋ, «ورال ارۋى-2017» بايقاۋى, شاعىن ساۋلەتتىك پىشىندەردىڭ جانە مۇسىندەردىڭ سالتاناتتى اشىلۋى, «دوستىق الاڭى» فەستيۆالى (بالالار شىعارماشىلىعى فەستيۆالى, «گورود ماستەروۆ» ساندىك-قولدانبالى كوركەمونەرىنىڭ كورمەسى, جاندى مۇسىندەر, مايرامپازدار), جايىق وزەنىنە بەكىرە بالىقتارىن جىبەرۋ, وبلىس اۋداندارىنىڭ اۋىل شارۋاشىلىق جارمەڭكەسى, اۋدان جانە اۋىلدىق وكرۋگتەرىنىڭ بۇقارالىق سپورت شارالارىنىڭ كونتسەرتتىك باعدارلاماسى, قاراقات ءابىلدينا جانە قىدىرالى بولماننىڭ قاتىسۋىمەن رەترو-فەستيۆالدىڭ كونتسەرتتىك باعدارلاما, «تۋعان جەر» اتتى اۋدانارالىق قورىتىندى گالا-كونتسەرتى – وسىنىڭ ءبارى ورال قالاسى تۇرعىندارى مەن شاھار قوناقتارىن كۇتىپ تۇر.
قازبەك قۇتتىمۇرات ۇلى, «ەگەمەن قازاقستان»