سوڭعى كەزدەرى فۋتبولدا ەرەكشە تالانتىمەن كوزگە ءتۇسىپ جۇرگەن مادريدتىك «رەالدىڭ» جاس ويىنشىسى ماركو اسەنسيو تۋرالى نە بىلەمىز؟
ماركو اسەنسيو – 1996 جىلى 21 قاڭتاردا يسپانيانىڭ پالما قالاسىندا باسك-گوللاند وتباسىندا تۋعان. «مالوركا» فۋتبول كلۋبىنىڭ اكادەمياسىنان تۇلەپ شىققان. ۇلكەن فۋتبولداعى دەبيۋتىن 2013 جىلدىڭ 27 قازانىندا يسپانيانىڭ ەكىنشى ليگاسى سەگۋندادا «رەكرەاتيۆو» كومانداسىنا قارسى وتكىزدى. ال ۇلكەن فۋتبولداعى ەڭ العاشقى گولىن 2014 جىلدىڭ 16 ناۋرىزىندا «تەنەريفە» قاقپاسىنا سالدى.
«رەال مادريد» كومانداسىنىڭ سكاۋتتارى ماركو اسەنسيونى ءجىتى نازاردا ۇستاپ كەلگەن. ال تالانتىنا جوعارى باعا بەرگەن كلۋب باسشىلىعى سول جىلى ونىمەن كەلىسىمشارت جاسايدى. 2014 جىلى جەلتوقسان ايىندا جاسالعان كەلىسىم بويىنشا ول كەلەر جىلدىڭ جازىندا كورولدىك كلۋبتىڭ ويىنشىسى اتاندى. الايدا «رەال» باسشىلىعى ماركونى كوبىرەك الاڭعا شىعىپ, تاجىريبەسىن ارتتىرۋى ءۇشىن دەڭگەيى تومەندەۋ «ەسپانول» كومانداسىنا جالعا بەرۋدى ءجون كورەدى. بۇل كوماندادا ءجۇرىپ ول 19 قىركۇيەك كۇنى «رەال سوسەداد» كلۋبىنا قارسى ماتچتا الاڭعا شىعىپ, لا ليگاداعى دەبيۋتىن وتكىزەدى. ال 2016 جىلدىڭ 20 اقپان كۇنى «دەپورتيۆو لا-كورۋنيا» قارسى ماتچتا مەرگەندىگىمەن كوزگە ءتۇسىپ, «ەسپانول» ساپىنداعى ءبىرىنشى گولىن سوعادى.
ءبىر جىلدىق جالعا بەرۋ مەرزىمى اياقتالعاننان كەيىن, ياعني 2016 جىلدىڭ جازىندا ماركو مادريدكە قايتا ورالادى. مۇندا باس باپكەر زينەدين زيدان شاكىرتىنىڭ ونەرىنە تاڭ قالىپ, ەشقايدا جىبەرمەۋدى ءجون كورەدى.
«رەالداعى» العاشقى ماۋسىمى
وتكەن جىلدىڭ تامىز ايى ماركو ءۇشىن ءساتتى ءوتتى دەۋگە بولادى. مادريدتىك كلۋبتىڭ ساپىندا العاشقى ويىنىن سول جىلدىڭ 9 تامىزى كۇنى ۋەفا سۋپەركۋبوگىندا «سەۆيليا» كومانداسىنا قارسى وتكىزەدى. ءارى وسى ماتچتا ءبىرىنشى گولىن سوعادى. سونداي-اق, «رەالمەن» بىرگە كارەراسىنداعى ءبىرىنشى كۋبوگىنا قول جەتكىزدى. 2016 جىلدىڭ 21 تامىزدا اسەنيسو «رەال سوسەدادقا» قارسى كەزدەسۋدە الاڭعا شىعىپ, لا ليگاداعى دەبيۋتىن وتكىزدى.
اسەنسيونىڭ تالانتىن زيدان جوعارى باعالاپ, كوبىرەك مۇمكىندىك بەردى. وتكەن جىلدىڭ 18 قازانىندا پولشانىڭ «لەگيا» كومانداسىنا قارسى ويىندا كەزەكتى رەت مەرگەندىگىمەن تانىلىپ, چەمپيوندار ليگاسىنداعى (چل) ءبىرىنشى گولىن سوقتى. ناعىز تالانت سىن ساتتەردە شىڭدالادى. ماركو تەك وسال كوماندالارعا عانا ەمەس, ەۋروپانىڭ بىرنەشە الپاۋىت ۇجىمدارىن دا قاپى قالدىرىپ جاتتى. ماسەلەن, چل-نىڭ 1/4 فينالىندا ميۋنحەننىڭ «باۆارياسىن», فينالدىق كەزدەسۋدە يتاليانىڭ «يۋۆەنتۋسىن», يسپانيا سۋپەركۋبوگىندا «بارسەلونانى» سان سوقتىرىپ كەتتى.
«رەالدا» ءبىر جىل ىشىندە ەكى مارتە ۋەفا سۋپەركۋبوگىن, سونداي-اق, كلۋبتار اراسىنداعى الەم چەمپيوناتىن, يسپانيا چەمپيوناتىن, چەمپيوندار ليگاسى مەن يسپانيا سۋپەركۋبوگىن جەڭىپ الدى.
«ول مادريدتە ءوزىن جايلى سەزىنەدى. ونىڭ كۇندەلىكتى پروگرەسىن كورىپ, تاڭدانىسىمدى جاسىرا المادىم. الاڭدا بارلىق تاپسىرمانى تىڭعىلىقتى ورىندايدى. بىرنەشە قارسىلاسىنان ايلاسىن اسىرا بىلەدى. قاجەت كەزىندە جويقىن سوققىلارىن باعىتتايدى», دەگەن ەدى زينەدين زيدان «بارسەلوناعا» قارسى وتكەن يسپانيا سۋپەركۋبوگىنىڭ العاشقى ويىنىنان كەيىن.
يسپانيا قۇراماسىنداعى جەتىستىكتەرى
ماركو اسەنسيو 2015 جىلى 19 جاسىندا يسپانيا جاستار قۇراماسىمەن بىرگە گرەكيادا وتكەن ەۋروپا چەمپيوناتىنىڭ جەڭىمپازى اتاندى. تۋرنيردە «قىزىل فۋريا» كومانداسى نيدەرلاند, فرانتسيا, رەسەي (ەكى رەت), گەرمانيا قۇرامالارىمەن كەزدەستى. جارتىلاي فينالدا اسەنسيو فرانتسيانى ەكى مارتە قاپى قالدىردى.
وتكەن جىلدىڭ 29 مامىرىندا بوسنيا جانە گەرتسەگوۆينا ۇجىمىنا قارسى ويىندا يسپانيا قۇراماسى ساپىنداعى دەبيۋتىن وتكىزدى. ال بيىل پولشادا وتكەن جاستار اراسىنداعى ەۋروپا چەمپيوناتىندا يسپانيا قۇراماسىمەن بىرگە كۇمىس جۇلدەگە قول جەتكىزگەن بولاتىن.
ماركو اسەنسيو – «بارسەلونا»
21 جاستاعى جارتىلاي قورعاۋشىنى 2014 جىلى «رەالدىڭ» ايگىلى قارسىلاسى «بارسەلونانىڭ» ءوز قاتارىنا قوسۋىنا مۇمكىندىگى بولعان ەدى. بىراق, كاتالوندىق كلۋبتىڭ باسشىلىعى يسپانيالىق ويىنشى ءۇشىن 4,5 ملن ەۋرو تولەۋدى قىمباتسىنعان. الايدا, سول جىلى «بارسەلونا» برازيليانىڭ «سان پاۋلۋ» كومانداسىنان ەسىمى ەشكىمگە بەلگىسىز دۋگلاستى التى ميلليون ەۋروعا ساتىپ الدى.
«بارسەلونا» نەيماردىڭ «پاري سەن جەرمەن» كومانداسىنا اۋىسىپ كەتۋىنە بايلانىستى ورنىنا بىرنەشە فۋتبولشىنى قاراستىرعان بولاتىن. ءتىزىمنىڭ ىشىندە ماركو اسەنسيو دا بولدى. بۇل جولى كاتالوندىق كلۋب 80 ملن ەۋرو ۇسىنۋعا دايىن ەكەندىگىن بىلدىرگەن. الايدا, ول «رەالدىڭ» تىكەلەي قارسىلاسىنا اۋىسپايتىنىن كەسىپ ايتتى.
«مەن «بارسەلونانىڭ» جەيدەسىن ەشقاشان كيمەس ەدىم. ماعان وزگە دە كلۋبتاردان ۇسىنىس تۇسكەن. بىراق مادريدتەگى ومىرىمە ريزامىن», دەدى اسەنسيو يسپانيانىڭ El Larguero راديوسىنا بەرگەن سۇحباتىندا.
ايتا كەتەيىك, كەشە يسپانيا بىرىنشىلىگىندە «ۆالەنسيا» كومانداسىنا ەكى گول سوعىپ, «رەالدى» جەڭىلىستەن قۇتقارىپ قالدى.
دايىنداعان ايان ءابدۋالي, «ەگەمەن قازاقستان»