پارلامەنت سەناتىنىڭ توراعاسى قاسىم-جومارت توقاەۆ پاگۋوش عالىمدار قوزعالىسىنىڭ استاناداعى 62-ءشى كونفەرەنتسياسىنىڭ اياسىندا بىرقاتار كەزدەسۋلەر وتكىزدى.
عىلىم جانە حالىقارالىق ىستەر جونىندەگى پاگۋوش عالىمدار قوزعالىسىنىڭ پرەزيدەنتى دجايانت داناپالامەن كەزدەسۋدە كونفەرەنتسيا يادرولىق قاقتىعىستاردىڭ تۋىنداۋ قاۋپىن تومەندەتۋ جولدارىن ىزدەستىرۋدە جاڭا سەرپىن بەرگەنى اتاپ ءوتىلدى. د.داناپالا پىكىرسايىستاردىڭ مازمۇندىلىعىن جانە وسى فورۋمنىڭ جوعارى دەڭگەيدە ۇيىمداستىرىلعانىن اتاپ ءوتتى, سونداي-اق وسىنداي اۋقىمداعى كونفەرەنتسيانى استانادا وتكىزگەنى ءۇشىن قازاقستانعا العىس ايتتى.
يادرولىق سىناققا جالپىعا بىردەي تىيىم سالۋ تۋرالى شارت ۇيىمى دايارلاۋ كوميسسياسىنىڭ (ياسجتشۇ) اتقارۋشى حاتشىسى لاسسينا زەربومەن قازاقستان جانە ياسجتشۇ-نىڭ ىنتىماقتاستىعىنىڭ كەلەشەگى تالقىلاندى.
ق.توقاەۆ قازاقستان مەن ياسجتشۇ-نىڭ ءوزارا ناتيجەلى ءىس-قيمىلىنا جوعارى باعا بەردى, يادرولىق سىناقتارعا مونيتورگ جۇرگىزەتىن حالىقارالىق جۇيەنىڭ قازاقستاندىق سەكتورىن قۇرۋداعى ۇيىمنىڭ كومەگىنە ريزاشىلىعىن ءبىلدىردى. ل.زەربو حالىقارالىق قاۋىپسىزدىك جانە يادرولىق قارۋلاردى تاراتپاۋ سالاسىنداعى پرەزيدەنت ن.نازارباەۆتىڭ باستامالارىنىڭ جاھاندىق ماڭىزىن اتاپ ءوتتى.
بۇۇ باس حاتشىسىنىڭ بۇرىنعى ورىنباسارى, قارۋسىزدانۋ جونىندەگى بۇرىنعى جوعارى مارتەبەلى وكىلى سەرحيو دۋارتەمەن كەزدەسۋ بارىسىندا حالىقارالىق كۇن تارتىبىندەگى, ونىڭ ىشىندە حالىقارالىق تەرروريزم مەن يادرولىق قارۋدى تاراتپاۋ ماسەلەلەرى تالقىلاندى. س.دۋارتە 29 تامىزدا قازاقستاندا ماگاتە-ءنىڭ تومەن بايىتىلعان ۋران بانكىنىڭ اشىلۋىنىڭ ماڭىزدىلىعىن اتاپ ءوتتى. بۇل الەم قوعامداستىعىنىڭ قولداۋىنىڭ جانە يادرولىق قارۋدان ازات الەم قۇرۋعا تەڭدەسى جوق ۇلەس قوسقان مەملەكەت رەتىندە قازاقستانعا دەگەن بيىك سەنىمنىڭ ارقاسىندا مۇمكىن بولدى.