كوپتەگەن حالىقارالىق بايقاۋلاردا توپ جارىپ جۇرگەن «اناعا اپارار جول» ءفيلمى بۇل جولى حورۆاتيادا وتكەن كينوفەستيۆالدە دە جۇلدەگە يە بولدى.
ايگىلى ساياحاتشى ماركو پولونىڭ تۋعان ولكەسى حورۆاتيانىڭ وڭتۇستىگىندەگى كورچۋلا ارالىندا جىل سايىن «ماركو پولو» حالىقارالىق كينوفەستيۆالى ءوتىپ كەلەدى. بيىل فەستيۆالگە ءازىربايجان, بولگاريا, ءۇندىستان, يندونەزيا, يران, قازاقستان, كورەيا, تۇركيا, حورۆاتيا جانە باسقا دا ەلدەردەن كەلگەن فيلمدەر قاتىستى. قازاقستاندىق دەلەگاتسيا قۇرامىندا «اناعا اپارار جول» فيلمىندە باستى رولدەردى سومداعان اكتەرلەر ءادىل احمەتوۆ, التىناي نوگەربەك, كارتينانىڭ پروديۋسەرى جاراسحان كۇلپيەنوۆ, سونداي-اق, حورۆاتياداعى قر ەلشىلىگىنىڭ قىزمەتكەرلەرى بولدى. كوپتەگەن حالىقارالىق بايقاۋلاردا توپ جارىپ جۇرگەن «اناعا اپارار جول» ءفيلمى بۇل جولى حورۆاتيادا وتكەن كينوفەستيۆالدە دە جۇلدەگە يە بولدى. كارتينانىڭ رەجيسسەرى – اقان ساتاەۆ.
مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق جانە «نوۆىي مير» جشس-سىمەن بىرلەسە تۇسىرىلگەن «اناعا اپارار جول» ءفيلمى قازاق حالقىنىڭ حح عاسىرداعى كۇردەلى تاريحي كەزەڭدەردەن قۇرىلعان. كۇشتەپ جۇرگىزىلگەن ۇجىمداستىرۋ ناۋقانى, ۇلتتىڭ باسىنا تۇسكەن ۇلى تراگەديا – جۇت (اشارشىلىق), II دۇنيەجۇزىلىك سوعىس پەن سوعىستان كەيىنگى بەينەتتى جىلدار كورىنىس تاپقان. سۇراپىل سوعىستىڭ مەحناتىن كورگەن, جات ەلدە تۇتقىندا بولعان ءىلياس ەسىمدى جىگىتتىڭ تاعدىرى باياندالاتىن فيلمدە تۋعان جەرگە دەگەن ساعىنىش سۋرەتتەلەدى.
سالتاناتتى شارادا ءسوز العان فەستيۆال ديرەكتورى يگور پريزميچ ءفيلمنىڭ كاسىبي دايارلىعىن جوعارى باعالادى.
«سىزدەر تۇسىرگەن فيلم وزگەشە اتموسفەراسىنان بولەك, ءتۇسىرىلىم توبى مەن تالانتتى اكتەرلاردان جاساقتالعان. اناسى مەن ۇلىنىڭ اراسىنداعى ماحاببات ارقىلى قازاق ەلىنىڭ تاريحىمەن تانىستىق. ءفيلمنىڭ باس پروديۋسەرى ءاليا نازارباەۆانىڭ وسىنداي ەڭبەگى ءۇشىن العىس بىلدىرەمىز», دەدى فەستيۆال ديرەكتورى, تانىمال رەجيسسەر جانە پروديۋسەر يگور پريزميچ.
كينوتۋىندى جۋىردا بىشكەكتە وتكەن «اق ءىلبىرىس» اتتى VI ۇلتتىق كينوجۇلدەسىندە ورتالىق ازيانىڭ ۇزدىك ءفيلمى اتانعان بولاتىن. بيىل ماۋسىم ايىندا نيۋ-يوركتە وتكەن V ەۋرازيالىق كينوفەستيۆالدە تاريحي كينوتۋىندى «ۇزدىك كوركەم فيلم» جۇلدەسىنە يە بولدى.
ء«بىزدىڭ وسىناۋ تاريحى تەرەڭ ارالىمىزدا سىزدەرمەن جولىعىپ وتىرعانىما قۋانىشتىمىن. قازاقستان تۋرالى كوپ نارسەمەن تانىستىق» دەگەن قالا مەرى اندريا فابريس قازاقستاندىق تۋريستەردى قۇشاق جايا قارسى الۋعا دايىن ەكەنىن مالىمدەدى.
ايا ءومىرتاي,
"ەگەمەن قازاقستان"