«ەكسپو-2017» حالىقارالىق مامانداندىرىلعان كورمەسى اياسىندا استانا قالاسىندا 29 تامىز بەن 3 قىركۇيەك كۇندەرى وڭتۇستىك قازاقستان وبلىسىنىڭ كۇندەرى وتەدى, دەپ حابارلادى وقو اكىمىنىڭ ءباسپاسوز قىزمەتى.
وڭتۇستىك قازاقستاننىڭ كۇندەرى اياسىندا وبلىستىڭ سالت-ءداستۇرىن, ادەت-عۇرپىن, مادەنيەتى مەن بايلىعىن پاش ەتەتىن 43 مادەني كوپشىلىك ىس-شاراسى ەلوردالىقتار مەن قالا قوناقتارىنىڭ نازارىنا ۇسىنىلاتىن بولادى.
وڭتۇستىك كۇندەرىنىڭ العاشقى شاراسى شەت ەل مەملەكەتتەرىنىڭ قازاقستانداعى 30-دان استام ەلشىلەرى قاتىساتىن بيزنەس-فورۋممەن اشىلادى.
بەس كۇنگە سوزالاتىن دۇبىرلى تويدا وڭتۇستىك قازاقستاندىق ونەر مايتالماندارى «تۇركى ەلىنىڭ تۇپ تامىرى – وڭتۇستىكتەن مەرەيلى استاناعا سالەم!» ونەر كەرۋەنى, «سالەماستانا!, سالەم, ەكسپو!», «وڭتۇستىك ازىلدەرى» شوۋ-كونتسەرتتەرىن ۇسىنسا, وڭىرىمىزدىڭ تاريحي قۇندىلىعىمەن ەرەكشە مادەني كەلبەتىن دارىپتەيتىن كورنەكتى جادىگەرلەردىڭ كورمەسى مەن تاريحتان سىر شەرتەتىن سۋرەتشىلەر مەن قولونشىلەر بۇيىمدارىنىڭ كورمەلەرى وتكىزىلەدى. بۇدان بولەك, استانالىقتار «بايتەرەك» الاڭىندا ءبىر مەزەتتە 600 جاس دومبىراشىنىڭ ورىنداۋىنداعى كۇيدى تاماشالاي الادى.
ال 2-3 قىركۇيەك كۇندەرى اگرارلى ايماقتىڭ اۋىل شارۋاشىلىق جارمەڭكەسى ۇيىمداستىرىلادى. جارمەڭكەگە نارىق باعاسىنان ارزان قۇنى 265 ملن. تەڭگە بولاتىن 550 تونناعا جۋىق ءونىم شىعارىلادى.
مۇنان بولەك, رەسپۋبليكا بويىنشا شاعىن جانە ورتا كاسىپكەرلىك سۋبەكتىلەرىنىڭ سانى جاعىنان كوش باستايتىن وڭتۇستىكتىڭ ونەركاسىپ تۋارلارىنىڭ كورمەسى وتەدى.
29-31 تامىزى ارالىعىندا «بەيبىتشىلىك جانە كەلىسىم» سارايىندا وتەتىن كورمەگە ءوڭىرىمىزدىڭ تاماق جانە جەڭىل ونەركاسىبى, ماشينا جاساۋ, فارماتسەۆتيكا جانە قۇرىلىس زاتتارى سالالارىنىڭ 50-دەن استام كاسىپورىندارى قاتىسادى. سونداي-اق, 30 تامىز كۇنى ساعات 11.00-دە استانا قالاسىنىڭ وقۋشىلار سارايىندا «كۇش اتاسى - قاجىمۇقان» انيماتسيالىق ءفيلمىنىڭ تۇساۋكەسەرى وتسە, 31 تامىز كۇنى «وتىرار داستانى», «قازاقستان بارىسى», «تولاعاي», «قازاقستان برەندى» انيماتسيالىق فيلمدەرىن استانا جۇرتشىلىعى تاماشالايتىن بولادى.
دەمالىس كۇندەرى «قازانات» يپپودرومىندا اۋدارىسپاق, قىز قۋ, جامبى اتۋ, تەڭگە ءىلۋ, قۇسبەگىلىك جانە ات ۇستىندە ونەرى كورسەتىلەتىن بولسا, 3 قىركۇيەك كۇنى «ەتنواۋىلدا» قازاق كۇرەسى, اسىق اتۋ, توعىزقۇمالاق جانە كورەرمەندەر اراسىندا «قوشقار كوتەرۋ» سايىسى ۇيىمداستىرىلادى.
3 قىركۇيەك كۇنى ساعات 21.30-دا ەكسپو الاڭىنداعى امفيتەاتردا وڭتۇستىكتەن شىققان قازاق ەستراداسىنىڭ جۇلدىزدارى نۇرلان ونەرباەۆ, قايرات نۇرتاس, التىناي جوراباەۆا, جۇبانىش جەكسەن ۇلى جانە تاعى باسقا دا كوپتەگەن ونەر مايتالماندارى ونەر كورسەتەتىن ء«ان مەن كۇي الديلەيدى استانانى!» اتتى قورىتىندى گالا-كونتسەرتى وتەدى.