كەشە استانادا ەكسپو-2017 كورمەسى اياسىندا كەزەكتى ماڭىزدى سپورتتىق شارا – شانحاي ىنتىماقتاستىق ۇيىمىنىڭ (شىۇ) تاريحىنداعى ەكىنشى حالىقارالىق مارافون ءوتتى. العاشقى مارافون بىلتىر شىۇ-نىڭ 15 جىلدىعىنا وراي قىتايدا ۇيىمداستىرىلعان بولاتىن.
بيىلعى سايىس ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ (اوسشك) 25 جىلدىعىنا وراي وتكىزىلدى. وسى جىلدىڭ 22 مامىرىندا اتاۋلى داتانى حالىقارالىق مارافونمەن بىرگە اتاپ ءوتۋ قاجەت دەگەن شەشىم شىعارىلىپ, قازاقستان رەسپۋبليكاسىنىڭ مادەنيەت جانە سپورت مينيسترلىگى, قازاقستان رەسپۋبليكاسىنىڭ جەڭىل اتلەتيكا فەدەراتسياسى مەن قىتايدىڭ «شانحە» يۋننان مادەنيەت جانە سپورت كومپانياسى شىۇ مەن اوسشك حالىقارالىق استانا مارافونىن وتكىزۋ تۋرالى كەلىسىمگە كەلگەن ەدى. مۇنداعى باستى ماقسات – ۇزاق مەرزىمدى, ءتيىمدى قارىم-قاتىناس ورناتۋ.
استاناداعى حالىقارالىق مارافونعا الەمنىڭ 20 ەلىنەن التى مىڭعا جۋىق سپورتشى قاتىستى. ونىڭ ىشىندە شىۇ-عا مۇشە ءاربىر مەملەكەتتەن جالپى سانى 50 كاسىبي سپورتشى تارتىلدى.
تاڭ اتا باستالعان مارافوندى مادەنيەت جانە سپورت ءمينيسترى ارىستانبەك مۇحامەدي ۇلى اشىپ, قاتىسۋشىلارعا ساتتىلىك تىلەگەن سوڭ, سپورتشىلار كەزەك-كەزەگىمەن جۇگىرۋدى باستادى. مارافونشىلار ءۇش قاشىقتىققا, ياعني ەكسپو-2017 كورمەسىنىڭ قۇرمەتىنە وراي 2017 مەترگە, 10 شاقىرىمعا جانە 42 شاقىرىم 195 مەترگە جۇگىردى. جەلاياقتار جارىسىندا ەلىمىزدىڭ جوعارى شەندى تۇلعالارى دا ءوز باقتارىن سىنادى. اتاپ ايتار بولساق, قازاقستان رەسپۋبليكاسى پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ, ۇلتتىق قاۋىپسىزدىك كوميتەتىنىڭ توراعاسى كارىم ءماسىموۆ, مادەنيەت جانە سپورت ءمينيسترى ارىستانبەك مۇحامەدي ۇلى, اقپارات جانە كوممۋنيكاتسيالار ءمينيسترى داۋرەن اباەۆ جانە قازاقستان دامۋ بانكى باسقارماسىنىڭ توراعاسى بولات جامىشەۆ مارافون جۇگىرۋگە تىلەك ءبىلدىردى. سونداي-اق, ەلىمىزدىڭ وليمپيادا چەمپيوندارى مەن جۇلدەگەرلەرى دە مارافونعا قاتىسىپ, سپورتشىلارعا قولداۋ كورسەتتى.
ەل تاريحىنداعى تۇڭعىش كاسىبي مارافون جارىسىنىڭ قورىتىندىسى بويىنشا 42 شاقىرىمدى قۇرايتىن ەڭ ۇزاق قاشىقتىقتا وزبەكستاندىق سپورتشى اندرەي پەتروۆ پەن بەلورۋسسيالىق جۇيرىك ۆلاديسلاۆ پرياموۆ مارە سىزىعىن ءبىر ۋاقىتتا كەسىپ وتكەن. ناتيجەسىندە, تورەشىلەر اقىلداسا كەلە ءبىرىنشى ورىندى وزبەك سپورتشىسىنا بەردى. ۇزدىك ۇشتىكتى قىرعىزستاندىق يليا تياپكين قورىتىندىلادى. جەڭىمپازعا 13 مىڭ اقش دوللارى, ەكىنشى ورىنعا 6 مىڭ دولار جانە ءۇشىنشى ورىنعا 4 مىڭ دوللار سىياقى بەرىلدى.
سونداي-اق مارافوننىڭ 10 شاقىرىمدىق سايىسىندا ەرلەر اراسىندا ءبىرىنشى ورىندى ەلوردالىق قۇدايبەرگەن زەينوللاەۆ, ەكىنشى ورىندى الماتى وبلىسىنان كەلگەن دارىن قونىسباەۆ يەلەندى. جۇلدەلى ءۇشىنشى ورىنعا وقو-نىڭ جەلاياعى ارتەم چيجەۆسكي قول جەتكىزدى. قىزدار اراسىنداعى سايىستا تاتيانا نەروزناك توپ جاردى. كۇمىس جۇلدە شىمكەنتتەن كەلگەن بالنۇر اسىلبەكتىڭ ەنشىسىنە بۇيىرسا, ءۇشىنشى ورىندى كوكشەتاۋلىق نادەجدا بەكماعامبەتوۆا يەلەندى.
سونىمەن قاتار, ەكسپو-2017 شاراسىنا وراي ۇيىمداستىرىلعان 2017 مەتر قاشىقتىقتىڭ ەرلەر اراسىنداعى سايىسىندا استانالىق ستۋدەنت ءالىمجان سەيدەشوۆ جەڭىمپاز اتاندى. تاعى ءبىر استانالىق ادىلبەك سەرىكبەك ەكىنشى ورىننان كورىنسە, قولا جۇلدە سەمەيلىك ەۆگەني ورحيپوۆقا بۇيىردى. ايەلدەر اراسىنداعى جارىستا استانالىق انار قىرىقباەۆا باس جۇلدەنى جەڭىپ السا, ەكىنشى جانە ءۇشىنشى ورىندى پاۆلوداردان كەلگەن ەكى مارافونشى – اناستاسيا شاراۆاروۆا مەن بەللا كوماروۆا ءوزارا ءبولىستى.
مارافون سوڭى قازاق ەسترادا ونەرپازدارىنىڭ كونتسەرتتىك باعدارلاماسىمەن جالعاستى.
ءالي بيتورە, «ەگەمەن قازاقستان»
سۋرەتتەردى تۇسىرگەن ەرلان ومار, «ەگەمەن قازاقستان»