استانادا «ارمي-2017» حالىقارالىق اسكەري ويىنداردىڭ قورىتىندىسى جاريالاندى. اتالعان ءباسپاسوز جيىنىنا بىرقاتار اسكەري قىزمەتكەرلەر قاتىستى.
ەستەرىڭىزدە بولسا, قازاقستان قارۋلى كۇشتەرىنىڭ قۇراماسى «ارمي-2017» حالىقارالىق ويىندارىندا جالپى كوماندالىق ءۇشىنشى ورىندى ەنشىلەگەن بولاتىن. ساربازداردىڭ ازىرلىگىن تەكسەرگەن سايىسقا الەمنىڭ 29 ەلىنەن 150 كوماندا قاتىستى. دالالىق, اۋە جانە تەڭىز ماشىعى سەكىلدى دودالار قورىتىندىسى بويىنشا, رەسەي فەدەراتسياسىنىڭ كومانداسى ءبىرىنشى ورىندى, قىتاي ەلىنەن كەلگەن «جۋنگولار» ەكىنشى ورىندى يەلەندى. قازاق اسكەرىنىڭ ابىرويىن حالىقارالىق باسەكەدە 350-دەن استام جاۋىنگەر قورعاعان ەكەن. ءباسپاسوز كونفەرەنتسياسىنا كەلگەن سپيكەرلەر «توعىزىنشى اۋماقتىڭ» قارۋلى كۇشتەرى تورەشىلەر القاسى تاراپىنان جوعارى باعاعا يە بولعانىن مالىمدەدى.
جارىس قورىتىندىسى بويىنشا قازاقستان قارۋلى كۇشتەرىنىڭ قورجىنىندا 3 التىن, 7 كۇمىس جانە 5 قولا مەدال بار. باسەكەنىڭ سالتاناتتى جابىلۋ راسىمىنە قاتىسقان قورعانىس ءمينيسترى, گەنەرال-پولكوۆنيك ساكەن جاسۇزاقوۆ حالىقارالىق ويىندار دوستىقتىڭ, حالىقارالىق ىنتىماقتاستىقتىڭ, بەيبىتشىلىك پەن نيەتتەستىكتىڭ جاڭا نىشانىنا اينالىپ, ايرىقشا مازمۇنى جانە عالامات اۋقىمىمەن ەرەكشەلەنەتىنىنە توقتالعان.
سپيكەرلەردىڭ سوزىنە سۇيەنسەك, «ارمي-2017» سايىسىندا قازاقستاندىق تانكىشىلەر بياتلون جارىسىندا 1 ساعات 45 مينۋت 41 سەكۋند ناتيجەسىن كورسەتىپ, كۇمىس جۇلدەنى قانجىعاسىنا بايلاپتى. ال 97616 اسكەري ءبولىمىنىڭ باتارەيا سەرجانتى, اعا سەرجانت ورىنبەك ساندىبەكوۆ «دوستاستىق جاۋىنگەرى» بايقاۋىنىڭ باس نوميناتسياسى بويىنشا ەكى دۇركىن چەمپيونى اتاندى.
اسكەري حالىقارالىق ويىندار الداعى ۋاقىتتا دا جالعاسىن تابادى. سپيكەرلەردىڭ ايتۋىنشا, قازاقستان ايتۋلى باسەكەنىڭ بىرنەشە كەزەڭىن وتكىزۋگە ءازىر.
اباي اسانكەلدى ۇلى, «ەگەمەن قازاقستان»