ايماقتارعا جۇمىس بابىنداعى ساپار بارىسىندا سەنات دەپۋتاتى, الەۋمەتتىك-مادەني دامۋ جانە عىلىم كوميتەتىنىڭ توراعاسى بىرعانىم ءايتىموۆا, سەناتورلار نۇرلان قىلىشباەۆ جانە تولەۋبەك مۇقاشەۆ الماتى وبلىسىنداعى ەسكەلدى, تالعار, سارقانت اۋداندارىندا, سونداي-اق تەكەلى, قاپشاعاي جانە تالدىقورعان قالالارىندا بولدى, دەپ حابارلادى پارلامەنت سەناتىنىڭ ءباسپاسوز قىزمەتى.
سەناتورلار ەسكەلدى اۋدانىندا بولعان كەزدە «حيلنيچەنكو ي ك» جاۋاپكەرشىلىگى شەكتەۋلى سەرىكتەستىگىنىڭ جۇمىسىمەن تانىستى. 500-دەن استام قىزمەتكەر ەڭبەك ەتەتىن كاسىپورىن 4 091 گەكتار جەردەگى 13 شارۋا قوجالىعىن بىرىكتىرەدى. مۇندا ەگىنشىلىك, مال شارۋاشىلىعى جانە وڭدەۋ ءوندىرىسىنىڭ تولىق جۇيەسى قالىپتاسقان. دەپۋتاتتار سەرىكتەستىك ۇجىمىمەن كەزدەسىپ, قازاقستان پرەزيدەنتىنىڭ حالىققا جولداۋىنداعى نەگىزگى ماقساتتار مەن مىندەتتەر تۋرالى ايتتى جانە ەڭبەككەرلەردىڭ ساۋالدارىنا جاۋاپ بەردى.
سەناتورلار «تايجانوۆ» شارۋا قوجالىعىنىڭ ەڭبەك ۇجىمىمەن دە كەزدەستى. دەپۋتاتتار ەسكەلدى اۋدانىنداعى جەتىسۋ اۋىلىنداعى ورتا مەكتەپتە ۇستازدار قاۋىمىمەن جۇزدەسىپ, ءبىلىم بەرۋ جۇيەسىندەگى جاعداي تۋرالى حاباردار ەتتى جانە ءبىلىم مەكەمەسىنىڭ ماتەريالدىق بازاسىمەن تانىستى. سەناتورلار تەكەلى قالاسىندا دا بولدى. مۇندا ورتالىق ازيا ۋنيۆەرسيتەتىنىڭ جاڭا عيماراتىنىڭ قۇرىلىسىمەن, ستۋدەنتتىك قالاشىقپەن جانە «Bapy Mining» زاۋىتىمەن تانىستى.
سەنات دەپۋتاتتارى تالدىقورعان قالاسىندا الماتى وبلىسىنىڭ اكىمى ا.باتالوۆپەن كەزدەستى, قالاداعى بىرقاتار الەۋمەتتىك مەكەمەلەردىڭ: جاستار ورتالىعىنىڭ جانە قالالىق كوپسالالى اۋرۋحانانىڭ جۇمىسىمەن, قاراتال وزەنىنىڭ جاعالاۋىندا ورنالاسقان بالالاردىڭ ويىن-ساۋىق ورتالىعىمەن تانىستى.
سەناتورلار سارقانت اۋدانىندا المالى اۋىلىنداعى دارىگەرلىك امبۋلاتوريادا جانە سارقانت گۋمانيتارلىق كوللەدجىندە بولدى, جەرگىلىكتى تۇرعىندارمەن كەزدەستى.
قاپشاعاي قالاسىندا بولعان كەزدە سەناتورلار «كناۋف گيپس قاپشاعاي» مەكەمەسىنىڭ ۇجىمىمەن جۇزدەسىپ, ساياباق پەن سپورت كەشەنىندە بولدى. قالالىق اكىمدىك عيماراتىندا ءماسليحات دەپۋتاتتارىمەن, اكىمدىك قىزمەتكەرلەرىمەن, قۇقىق قورعاۋ ورگاندارى مەن بۇقارالىق اقپارات قۇرالدارىنىڭ وكىلدەرىمەن, شارۋا قوجالىقتارىنىڭ باسشىلارىمەن كەزدەستى.
جوعارعى پالاتانىڭ دەپۋتاتتارى تالعار قالاسىندا «بايسەركە اگرو» مەكەمەسىنىڭ ۇجىمىمەن دە جۇزدەستى.
دەپۋتاتتاردىڭ جەرگىلىكتى تۇرعىندارمەن كەزدەسۋلەرى بارىسىندا ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىنىڭ نەگىزگى ەرەجەلەرى ءتۇسىندىرىلدى, پرەزيدەنتتىڭ «بولاشاققا باعدار: رۋحاني جاڭعىرۋ» ماقالاسىنىڭ مازمۇنى تالقىلاندى. كەزدەسۋگە قاتىسۋشىلار پارلامەنتتىڭ زاڭ شىعارۋ قىزمەتى مەن سەناتتىڭ حالىقارالىق سالادا اتقارعان ىستەرى تۋرالى حاباردار ەتىلدى. اتاپ ايتقاندا, الەۋمەتتىك-مادەني دامۋ جانە عىلىم كوميتەتىنىڭ توراعاسى ب.ءايتىموۆا زاڭدارداعى حالىقتى الەۋمەتتىك قامتاماسىز ەتۋ, مىندەتتى دارىگەرلىك ساقتاندىرۋ جۇيەسى, مەملەكەتتىك ءبىلىم بەرۋدەگى جيناق جۇيەسى, مادەنيەت, دەنە شىنىقتىرۋ جانە سپورت ماسەلەلەرى جونىندەگى جاڭالىقتار تۋرالى ايتىپ بەردى.