توعىز جولدىڭ توعىسىنداعى ارۋ استانانىڭ تاريحي ولشەممەن العاندا, شامالى عانا ۋاقىت ۇشىندە جاھاندىق وركەنيەت ورتالىعىنا اينالعانى اقيقات. وعان ەلوردامىزدا وتكىزىلگەن ەقىۇ-عا مۇشە ەلدەر باسشىلارىنىڭ ءسامميتى, جىل سايىن ءداستۇرلى تۇردە وتكىزىلىپ كەلە جاتقان الەمدىك جانە ءداستۇرلى ليدەرلەرىنىڭ سەزدەرى مەن جاھاندىق ەكونوميكالىق فورۋمدار دالەل.
سونىمەن بىرگە, بيىل ماۋسىم ايىنان باستاپ ورتالىق ازيادا, ءتىپتى تمد مەملەكەتتەرىنىڭ ىشىندە تۇڭعىش رەت تاۋەلسىز ەلىمىزدىڭ ەلورداسىندا ەكسپو-2017 حالىقارالىق مامانداندىرىلعان كورمەسى ءوتىپ جاتىر. مىنە, وسىنداي الەمدىك شارالارعا قاتىسۋ ءۇشىن تورتكۇل دۇنيەنىڭ ءتورت بۇرىشىنان كەلگەن قوناقتارعا اجارلى استانانى, بۇكىل تاۋەلسىز قازاقستاندى العاش تانىستىراتىن استانا حالىقارالىق اۋەجايى مەن تەمىر جول ۆوكزالى ەكەندىگى داۋسىز. قاي ەلدىڭ, قاي قالانىڭ بولماسىن بولمىسىن كورسەتەتىن العاشقى قاقپا اۋەجاي جانە تەمىر جول بەكەتتەرى بولىپ تابىلادى. وسى رەتتە جاقىندا عانا بوي كوتەرگەن استانالىق «نۇرلى جول» تەمىر جول ۆوكزال كەشەنىنىڭ الار ورنى ەرەكشە.
ۇستىمىزدەگى جىلدىڭ مامىر ايىندا عانا پايدالانۋعا بەرىلگەن بۇل زاماناۋي جولاۋشىلار بەكەتى كۇنى كەشە العاشقى ميلليونىنشى جولاۋشىنى قابىلداپ ۇلگەردى. «بۇل بۇرىنعى كەڭەس ەلدەرى اراسىنداعى وسىنداي جالعىز ۆوكزال, مەن ءتىپتى ەۋروپادا مۇندايدى كورگەن جوقپىن. ول بولاشاققا ارنالىپ سالىنعان. قازاقستاننىڭ بارلىق ءوڭىرىن «تالگو» جۇردەك پويىزىمەن بايلانىستىردىق, ولار ساعاتىنا 150-200 شاقىرىم جىلدامدىقپەن جۇرە الادى. بۇرىن الماتىدان 24 ساعاتتا جەتەتىن بولساق, قازىر 11 ساعات جەتكىلىكتى», دەپ اتاپ كورسەتكەن ەدى مەملەكەت باسشىسى جاڭا ۆوكزالدىڭ اشىلۋ سالتاناتىندا.
ءسانى مەن سالتاناتى جاراسقان ارۋ استانانىڭ تاماشا ارحيتەكتۋرالىق ساۋلەتىنە «نۇرلى جول» ۆوكزال كەشەنى جاراسىمدى ۇيلەسىم تاپقان. ۆوكزال عيماراتىنىڭ جالپى اۋماعى 126 مىڭ شارشى مەتردى الىپ جاتىر. «نۇرلى جول» ۆوكزالى تاۋلىگىنە 35 مىڭ جولاۋشىنى وتكىزۋگە قابىلەتتى. ۋاقىت تالابىنا توقتام بار ما. 1990 جىلى تسەلينوگراد قالاسىنىڭ تەمىر جول ۆوكزالىنىڭ ەسكى عيماراتىنىڭ جانىنان 9 قاباتتى جولاۋشىلار تەرمينالى سالىنعاندا, وڭىردە بۇدان وتكەن جولاۋشىلار بەكەتى بولماعانداي كورىنۋشى ەدى. ودان كەيىن ەلوردا حالقىنىڭ كۇرت وسۋىنە بايلانىستى 2003 جىلى بۇل ۆوكزال تۇبەگەيلى قايتا قۇرىلىپ, تاۋلىگىنە 12 مىڭ جولاۋشى وتكىزۋگە لايىقتالعان بولاتىن. ەندى مىنە, جاڭا ۆوكزال تەرمينالى 35 مىڭ جولاۋشىعا جوعارى دەڭگەيدە قىزمەت كورسەتەدى.
«نۇرلى جول» ۆوكزال تەرمينالىنا جولاۋشىلاردى قابىلداپ-جونەلتەتىن 6 تەمىر جول تورابى تۇيىستىرىلگەن. ۆوكزال جولاۋشىلار تاسقىنىنا ساپالى قىزمەت كورسەتەتىن زاماناۋي ۋلتراقوندىرعىلارمەن جابدىقتالعان. جولاۋشىلارعا بيلەت ساتۋدىڭ ەلەكتروندى جۇيەسى جۇمىس ىستەيدى. مۇندا مۇمكىندىگى شەكتەۋلى جاندارعا ارنالعان تاكيلدىك جولدار, برايل الىپبيىمەن جۇمىس ىستەيتىن اقپاراتتىق تابلو, ارنايى كاسسا قىزمەت كورسەتەدى. نەگىزگى كۇتۋ زالدارىنان باسقا الەمدىك جوعارى تالاپتارعا ساي قوناقۇي بولمەلەرى, جۇك ساقتاۋ قويمالارى, انا مەن بالا بولمەسى, مەديتسينالىق ورتالىق, مەيرامحانالار, 1500 ورىندىق ىشكى جانە سىرتقى پاركينگتەر جۇمىس ىستەيدى. جاڭا ۆوكزال عيماراتى استانادا ءوتىپ جاتقان جاھاندىق ەكسپو-2017 كورمەسىنىڭ باس تاقىرىبى – «بولاشاقتىڭ ەنەرگياسىنا» سايكەس ءىشنارا «جاسىل» تەحنولوگيا تالاپتارىمەن جۇمىس ىستەۋگە بەيىمدەلگەن. عيماراتتاعى ليفتىلەر مەن ەسكالاتورلار قۋات ۇنەمدەۋ تاسىلىنە باعىندىرىلعان. ماسەلەن, ۆوكزالداعى ەسكالاتورلار جولاۋشىلار تاسقىنىنىڭ كوپتىگى مەن ازدىعىنا بايلانىستى قوزعالىسىن رەتتەپ, قۋات ۇنەمدەپ وتىرادى. تاعى ءبىر ەرەكشەلىك, ۆوكزال عيماراتىنىڭ 42 مىڭ شارشى مەتر اۋماقتى الىپ جاتقان توبەسىندە جاڭبىر جانە قار سۋىن جيناۋ تەحنولوگياسى ويلاستىرىلعان. وسى ادىسپەن جينالعان سۋدى ۆوكزال ايماعىنداعى گۇلزارلاردى سۋارۋعا جانە باسقا تەحنيكالىق ماقساتتارعا پايدالانادى.
ۆوكزال عيماراتىنىڭ ىشىندەگى جانە سىرتىنداعى قوزعالىس ۇدايى باقىلاۋدا. جالپى, جاڭا ۆوكزال كەشەنىندە جولاۋشىلاردىڭ قاۋىپسىزدىگىنە بارىنشا جوعارى دارەجەدە جاعداي جاسالعان. مۇندا جولاۋشىلاردى تەكسەرىپ كىرگىزۋ قۇرىلعىسى, بەينەباقىلاۋ جۇيەسى ورناتىلعان. جاڭا ۆوكزال كەشەنىندەگى جولاۋشىلارعا ساپالى دەڭگەيدە قالتقىسىز قىزمەت كورسەتۋ مىندەتى ارنايى دايىندىقتان وتكەن بىلىكتى 1300 قىزمەتكەرگە جۇكتەلگەن.
«مەن وتباسىممەن تاراز قالاسىنان استانادا ءوتىپ جاتقان ەكسپو-2017 كورمەسىن تاماشالاۋ ءۇشىن ساپارلاپ كەلدىم. «نۇرلى جول» ۆوكزالىنا تۇسكەن ساتتەن باستاپ, ءبىز الەمدىك تالاپتارعا ساي جوعارى ساپالى قىزمەت كورسەتۋ ۇلگىسىنە ءتانتى بولدىق. العاشقىدا وسىنشاما اۋماقتى الىپ جاتقان عيمارات ىشىندە اداسارمىز دەپ ويلاپ ەدىم. جوق. ەلگەزەك تە كىشپەيىل قىزمەتكەرلەر قالاي ءجۇرۋدى, قايدا بارۋدى ءتۇسىندىرىپ, جولباسشىلىق جاسادى. ءوز ەلىمدە جولاۋشىلارعا قىزمەت كورسەتۋدىڭ حالىقارالىق ستاندارتتارىنا ساي وسىنداي ۆوكزال تەرمينالىنىڭ بارىنا كۋا بولىپ, ماقتانىش سەزىمگە بولەندىم», دەيدى ايمان اسىلبەكوۆا اتتى انا اعىنان جارىلىپ. قاراپايىم كوڭىلدەن شىققان وسى ءبىر شىنايى پىكىرگە الىپ-قوسارىمىز جوق.
جىلقىباي جاعىپار ۇلى,
"ەگەمەن قازاقستان"
سۋرەتتى تۇسىرگەن ەرلان ومار,
"ەگەمەن قازاقستان"