اۋىر اتلەتيكادان 94 كيلوعا دەيىنگى سالماق دارەجەسىندە ونەر كورسەتكەن رۇستەم سىباي ەكى جاتتىعۋ قوسىندىسىندا 382 كيلو (168+215) ناتيجە كورسەتىپ, ۋنيۆەرسيادانىڭ كۇمىس جۇلدەگەرى اتاندى. بۇل باسەكەدە رەسەيلىك زىلتەمىرشى ەگور كليمونوۆ ءبىزدىڭ اتلەتتەن ءبىر عانا كيلو ارتىق كوتەرىپ, التىن مەدالدى يەلەنىپ كەتتى. ال قولا جۇلدە تايلاندتىڭ ساڭلاعى سارات سۋمپراديتكە بۇيىردى. ونىڭ ناتيجەسى – 381 كيلو.
ستۋدەنت جاستاردىڭ بۇكىلالەمدىك سپورتتىق جارىسىندا جالپىكوماندالىق ەسەپتە وڭتۇستىك كورەيا ەلىنىڭ اتلەتتەرى الدىنا جان سالار ەمەس. كەشەگى كۇنگى كەستەدەگى ناتيجە بويىنشا, كورەيا قۇراماسىنىڭ قورجىنىندا 23 التىن, 14 كۇمىس جانە 19 قولا مەدال (بارلىعى – 56) بار. ولاردى وكشەلەپ كەلە جاتقان جاپونيا قۇراماسى 17 التىن, 11 كۇمىس جانە 17 قولا جۇلدە (45) جەڭىپ الدى. ال بۇعان دەيىن ءۇشىنشى ورىندا تۇرعان تايۆان قۇراماسىن رەسەي ەلىنىڭ ستۋدەنتتەرى باسىپ وزدى. قازىر رەسەي قۇراماسىنىڭ ەنشىسىندە 12 التىن, 16 كۇمىس جانە 24 قولا مەدال (52) بار.
قازاقستاننىڭ سپورتشى ستۋدەنتتەرى ازىرگە 3 التىن, 3 كۇمىس جانە 5 قولا جۇلدەمەن توعىزىنشى ورىندا تۇر.
قايرات ءابىلدا, «ەگەمەن قازاقستان»