اتالعان وتىرىستا سالا باسشىسى كەلتىرگەن مالىمەتتەرگە جۇگىنسەك, ەلىمىزدە ۇبت-عا 88 595 ادام قاتىسىپتى. بۇل ءوتىنىم بەرگەندەردىڭ 95 پايىزىن قۇرايدى. تەستىلەۋ قورىتىندىسىنا سايكەس, رەسپۋبليكا بويىنشا ورتاشا بالل 140-تىڭ 80,5-ءىن قۇرادى. وتكەن جىلى بۇل كورسەتكىش 125-ءتىڭ 81-ءىن قۇراعان بولاتىن. 50 بالدان تۇراتىن مەجەلىك دەڭگەيدەن 74 517 تۇلەك استى, بۇل 84 پايىزعا تەڭ. كەشەندىك تەستىلەۋ 17-23 شىلدە ارالىعىندا جوعارى وقۋ ورىندارىنىڭ 48 پۋنكتىندە ءوتتى. وعان قاتىسۋعا 54 649 ءوتىنىم بەرىلدى, ءىس جۇزىندە تەستىلەۋگە 50 416 ادام قاتىستى. 50 بالدان تۇراتىن مەجەلىك دەڭگەيدەن 21 078 ادام نەمەسە تۇلەكتەردىڭ جالپى سانىنىڭ 42 پايىزى استى. مەجەلىك دەڭگەيدەن وتپەگەندەر تەستىلەۋدەن قايتا وتە الادى. وسى ماقساتتاعى تەستىلەۋ 24 تامىزعا دەيىن جالعاستى. مەجەلىك دەڭگەيدەن ەكىنشى رەت وتپەي قالعان جاعدايدا جوعارى وقۋ ورنىندا ءبىر سەمەسترگە اقىلى نەگىزدە وقۋعا مۇمكىندىك بەرىلەدى.
جۋىردا مەملەكەتتىك ءبىلىم گرانتى يەگەرلەرىنىڭ ءتىزىمى باس باسىلىم بەتىندە جاريالانعان بولاتىن. وسىعان وراي ءبىلىم جانە عىلىم مينيسترلىگىنىڭ جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى گۇلزات كوبەنوۆانىڭ ايتۋىنشا, ءبىلىم گرانتتارى تالاپكەرلەردىڭ تاڭداعان ماماندىقتارىنا قويىلعان تالاپتارعا سايكەس, تەستىلەۋ بارىسىندا العان بالى, سونداي-اق, زاڭنامادا بەكىتىلگەن جەڭىلدىك بەرەتىن اۋىل كۆوتالارى مەن باسقا دا ساناتتار بويىنشا ءبولىندى. گرانت يەگەرلەرىنىڭ تولىقتىرىلعان ءتىزىمى, «التىن بەلگى» يەگەرلەرىنە بەرىلەتىن باسىمدىق ەسكەرۋسىز جاسالدى. 13 تامىزدا وتكەن مەملەكەتتىك ءبىلىم گرانتتارىن بەرۋ جانە رەسپۋبليكالىق كوميسسيانىڭ وتىرىسىنا «اتامەكەن» ۇلتتىق كاسىپكەرلەر پالاتاسى, ءبىلىم سالاسى قىزمەتكەرلەرى كاسىپوداقتارى, جوعارى وقۋ ورىندارى قاۋىمداستىعىنىڭ وكىلدەرى, سونداي-اق, اتا-انالار قاۋىمى قاتىستى.
– ۇلتتىق تەستىلەۋ ورتالىعىندا اتا-انالار گرانتتاردى بولەتىن اۆتوماتتاندىرىلعان جۇيە جۇمىسىمەن تانىستى. ولار گرانتتاردى ءبولۋ پروتسەسىنىڭ اشىقتىعىنا جانە ادامي فاكتوردىڭ جوقتىعىنا كوز جەتكىزدى. الايدا, قولدانىستاعى زاڭ تالاپتارىنا سايكەس, «التىن بەلگى» يەگەرلەرىنە ءبىلىم گرانتتارى تيەسىلى بولعاندىقتان رەسپۋبليكالىق كوميسسيا بۇل ساناتتاعى تالاپكەرلەردى گرانتتارمەن, ۋنيۆەرسيتەتتەردىڭ, سونداي-اق, ءبىلىم جانە عىلىم مينيسترلىگى مەن دەنساۋلىق ساقتاۋ مينيسترلىگى قاراجاتتارى ەسەبىنەن قامتاماسىز ەتەتىندىكتەرى جونىندە شەشىمگە كەلدى. بۇل بولەك ءتىزىم گازەتتىڭ سوڭىندا جاريالاندى. سونىڭ ناتيجەسىندە گرانتتار ءتىزىمى 3,5 پايىزعا نەمەسە 1 487 گرانتقا ۇلعايدى. بۇل «التىن بەلگى» يەگەرلەرىنىڭ ءبىلىم دەڭگەيىنىڭ نەگىزىنەن جوعارى ەكەندىگىنىڭ تاعى دا ءبىر كورسەتكىشى, دەيدى گ.كوبەنوۆا.
ال ۇلتتىق تەستىلەۋ ورتالىعىنىڭ ديرەكتورى رامازان الىمقۇلوۆتىڭ ايتۋىنشا, بيىل 4 360 «التىن بەلگى» يەگەرى ءبىلىم گرانتى بايقاۋىندا باعىن سىنادى. ولاردىڭ ىشىنەن قوسىمشا تىزىمگە ىلىككەن 1 487 ادامنىڭ ىشىندە 200-گە جۋىق تالاپكەر «التىن بەلگى» يەگەرى ساناتىندا ەمەس. «التىن بەلگى» يەگەرلەرىنىڭ سانى 1 100 شاماسىندا. ياعني, ولاردىڭ ەسكى تىزىمدە قالعان 3 مىڭدايىنىڭ بالدارى جوعارى. ويتكەنى, گرانت يەگەرلەرى بالل بويىنشا بەلگىلەنگەن بولاتىن.
جالپى, بيىل ۇبت-نىڭ وتكىزۋ ەرەجەسى مەن تىيىم سالىنعان زاتتاردى قولدانعانى ءۇشىن تەستىلەۋدەن 12 ادام شىعارىلدى. تەستىلەۋ بارىسىندا 85 446 تىيىم سالىنعان زاتتار, سونىن ىشىندە 43 394 ەلەكتروندى قۇرىلعى (سمارتفون, روۋتەر, مودەم جانە باسقا قۇرالدار) جانە 42 052 قاعاز جۇزىندە (شپارگالكا, وقۋلىقتار جانە وزگە قۇرالدار) الىندى. 50-دەن استام رەسپۋبليكالىق اپەللياتسيالىق كوميسسياعا مازمۇنى بويىنشا 199 تەست تاپسىرماسى ءتۇسىپ, ونىڭ 103-ءى قاناعاتتاندىرىلدى. تەحنيكالىق سەبەپتەرگە بايلانىستى كەلىپ تۇسكەن 12 تەست تاپسىرماسىنىڭ 7-ءى قاناعاتتاندىرىلدى.
سونداي-اق, بيىلعى ەڭ جوعارى بالل – 139. سايات ەلتاي ۇلى الماتى قالاسىنداعى م.ماقاتاەۆ اتىنداعى №140 گيمنازيانىڭ تۇلەگى, سونداي-اق, 7 ادام 138 بالل جينادى.
جالپى, ءبىلىم سالاسىنداعى رەفورمالار باسەكەلەستىكتى كۇشەيتۋگە باعىتتالعانىن اڭعارۋعا بولادى.
دۋمان اناش, «ەگەمەن قازاقستان»