– ءبىز قولعا العان اكتسيانىڭ باستى ماقساتى – بيزنەستىڭ الەۋمەتتىك جاۋاپكەرشىلىگىن ارتتىرۋ, مەملەكەت-جەكەمەنشىك ارىپتەستىگى مەحانيزمىن ودان ءارى دامىتۋ, سونىمەن قاتار, ءوڭىردىڭ الەۋمەتتىك-ەكونوميكالىق ىلگەرىلەۋىنە ىقپال جاساۋ. بۇل رەتتە اقتوبە وڭىرىنەن شىققان جەرلەستەرىمىز مول ۇلەس قوسادى دەگەن ويدامىز, – دەدى ول.
بيىلعى ءبىرىنشى جارتىجىلدىقتىڭ قورىتىندىسى بويىنشا وبلىستا جالپى قۇنى 1 ميلليارد تەڭگەدەن اساتىن 338 جوبا جۇزەگە اسىرىلدى. بەلسەندى ازاماتتاردىڭ, بيزنەسمەندەر مەن مەتسەناتتاردىڭ كومەگىمەن اعىمداعى جىلى جالپى قۇنى 2,8 ميلليارد تەڭگە بولاتىن 555 جوبانى ىسكە قوسۋ جوسپاردا تۇر.
دەمەۋشىلىك قاراجاتتار ارقىلى الەۋمەتتىك نىسانداردىڭ قۇرىلىسى, قايتا قالپىنا كەلتىرۋ جانە زاماناۋي قۇرال-جابدىقتارمەن جاراقتاندىرۋ, ەلدى مەكەندەردى اباتتاندىرۋ, سونداي-اق جولداردى جوندەۋ جۇمىستارى جۇرگىزىلىپ, تۇرعىنداردىڭ وزگە دە ماڭىزدى ماسەلەلەرى شەشىمىن تابۋدا.
ۇيىمداستىرۋ كوميتەتىنىڭ ءتورايىمى اتاپ كورسەتكەندەي, الەۋمەتتىك جوبالاردىڭ باسىم كوپشىلىگى – وبلىس ورتالىعىندا. ولاردىڭ قاتارىندا حوككەي ءمودۋلى مەن دەنساۋلىق ساياباعىنىڭ, تاريحي-ولكەتانۋ مۇراجايىنىڭ, گۇلزارلار مەن ساياجولداردىڭ قۇرىلىستارى بار. العا اۋدانىندا ەلەۋلى جۇمىستار اتقارىلۋدا. مۇندا جالپى قۇنى 417 ميلليون تەڭگەگە باعالاناتىن 17 جوبا جۇزەگە اسىرىلماقشى. قازىردىڭ وزىندە ون ءبىر جوبانىڭ جۇمىسى اياقتالدى.
قوبدا اۋدانىندا جوسپارلانعان 13 جوبانىڭ سەگىزى ءوز شەشىمىن تاپتى. اۋدان ورتالىعىندا «وتان انا» دەمالىس ساياباعى اشىلدى. بۇل شارانى اتقارۋعا مەتسەناتتار بولگەن 40 ميلليون تەڭگە قارجى جۇمسالدى.
ايتەكە بي اۋدانىندا مەكتەپ ستاديونى قالپىنا كەلتىرىلسە, بايعانين وڭىرىندە كلۋب پەن ساياباق قۇرىلىسى جۇزەگە اسىپ, قارعالىدا اۋدان مەكتەپتەرىن كومپيۋتەر تەحنيكاسىمەن جاراقتاندىرۋ كوزدەلۋدە. اتاپ ايتارلىعى, وسى جۇمىستاردىڭ بارلىعى دا وسى ەلدەن شىققان ازاماتتاردىڭ ارالاسۋىمەن, قولداۋىمەن اتقارىلماقشى.
– «اقتوبە – قۇتتى مەكەن» فورۋمى قىركۇيەك ايىنىڭ سوڭعى ونكۇندىگىندە وتكىزىلەدى دەپ جوسپارلاپ وتىرمىز. وعان الەمنىڭ 15 ەلىنەن 300-دەن استام جەرلەسىمىز قاتىسادى دەپ وتىرمىز. قازىردىڭ وزىندە 218 ادامنان حابارلاما ءتۇستى. امەريكا قۇراما شتاتتارىندا تۇراتىن اقتوبەلىك داڭقتى جەرلەسىمىز, اتاقتى گيمناسشى ۆالەري ليۋكين ءبىزدىڭ شاقىرۋىمىزعا العاشقىلاردىڭ قاتارىندا ءۇن قوستى. كوپتەگەن بيزنەسمەندەر تۋعان جەردى تۇلەتۋگە مۇددەلىلىك تانىتۋدا. ولارعا جۇزەگە اسىرىلۋىن كۇتىپ تۇرعان ينۆەستيتسيالىق جوبالار ۇسىنىلماقشى. ماسكەۋدەگى ولەگ گايدانوۆ باسقاراتىن اقتوبە جەرلەستىگى ۇيىمى دا وسى شاراعا ۇيىمشىلدىقپەن قاتىسپاقشى. 30-دان استام مامان دارىگەرلەر ەلگە قاراپ ەلەڭدەپ وتىر. ولاردىڭ كوشباسىندا سەرىك اقشولاقوۆ, جاقسىلىق دوسقاليەۆ سەكىلدى بەلگىلى ازاماتتارىمىز بار. سونداي-اق, وسى قارساڭدا اقتوبە ءوڭىرىنىڭ كورنەكتى ازاماتتارى قامتىلاتىن ەنتسيكلوپەديالىق جيناق جارىققا شىقپاقشى, – دەدى ودان ءارى ءسانيا مۇساقىزى.
...تۋعان جەرگە بۇيرەگى بۇرىلمايتىن ادام بولمايتىن شىعار. بۇل شارا سونداي ىزگى مۇراتتار مەن يگىلىكتى ىستەردىڭ جارشىسى بولا بەرمەك.
نۇرمۇحانبەت دياروۆ, جۋرناليست
اقتوبە