ەڭبەگىنىڭ ءتاتتى جەمىسىن جەر-انادان تاپقان ديقاندار ءۇشىن جاز مەزگىلىندە اعىن سۋدان تاپشىلىق كورمەۋ وتە ماڭىزدى. وڭتۇستىكتە بۇل, اسىرەسە, اق التىن ءوسىرىپ وتىرعان اعايىندارعا قاتىسى بار. تاۋدان كۇركىرەپ اققان ارىندى وزەننىڭ بويىندا وتىرماعاننان كەيىن ءمىرزاشول ءوڭىرىنىڭ قىرعىزستان, وزبەكستان اۋماعىن باسىپ كەلەتىن اعىن سۋعا كۇنى تۇسەدى.
حالىق اراسىندا «سۋدىڭ باسىندا وتىرعان بال, اياعىندا وتىرعان ۋ ىشەدى» دەگەن قاناتتى ءسوز بار. اعىن سۋدى كورشى مەملەكەتتەردەن الىپ وتىرعاندىقتان ماقتارالدا وسىعان بايلانىستى ماشاقاتتار كوپ بولاتىن. بۇل, اسىرەسە, وزبەكستاننان «دوستىق» كانالىنان كەلەتىن سۋدىڭ قازاقستانعا تەڭگەرىمدى بولىنبەۋىنەن ورىن الىپ كەلدى. ماسەلەن, مەملەكەتارالىق كەلىسىمشارت بويىنشا وسى «دوستىق» كانالى ارقىلى كورشى وزبەك ديقاندارىنىڭ 112 مىڭ گەكتار, ماقتارالدىق ديقانداردىڭ 136 مىڭ گەكتار جەرى سۋلاندىرىلۋى كەرەك بولاتىن. ەلىمىزدىڭ اۋىل شارۋاشىلىعى مينيسترلىگى وسى داۋلى ماسەلەنىڭ ورايىن تاپتى. وسى مينيسترلىككە قاراستى سۋ رەسۋرستارى كوميتەتىنىڭ وكىلدەرى ەكى تاراپتىڭ «دوستىق» كانالىنىڭ سۋىن تەڭ بولىسۋگە قول جەتكىزەتىندىگىن ايتادى. قازاق-وزبەك ءتۇبى ءبىر تۋىس حالىق. ايتسە دە, تاۋەلسىزدىكتىڭ العاشقى جىلدارىنان ەگەمەندىگىن العا تارتىپ, كورپەسىن تۇمشالاپ العان الا تاقيالى اعايىندار وزدەرىنىڭ گيدروبەكەتتەرىندەگى جاعدايدى باقىلاۋعا قازاقستان جاعىن جىبەرە بەرمەيتىن. سونىڭ سالدارىنان قازاقستانعا بولىنۋگە ءتيىستى سۋ ورتا جولدا قولدى بولىپ, بىلتىر ماقتارالدا 50 مىڭ گەكتار ماقتالىق سۋسىز قالعان. وسىنىڭ سالدارىنان 40 مىڭ توننا اق التىن كوزدەن بۇل-بۇل ۇشىپ, ديقاندار كەتپەنىنە سۇيەنىپ, كۇڭىرەنىپ قالعان ەدى.
سوڭعى جىلدارى قازاق-وزبەك مەملەكەتتەرىنىڭ اراسىنداعى تۋىسقاندىق قاتىناستىڭ جاقسارعانى ءارى اۋىل شارۋاشىلىعى مينيسترلىگىنىڭ باياندى جۇمىسىنىڭ ناتيجەسىندە اعىن سۋدا تاپشىلىق بولمادى.
– جازدىڭ شىلدە-تامىز ايلارىندا سۋ تاپشى بولىپ, وزىمىزگە ءتيىستى سۋىمىزدى 50 پايىزعا دەيىن الا الماي جۇرگەن جىلدار بولدى. وسى جۇمىس قولعا الىنىپ, ءبىرتالاي ءىس-شارالار جاسالىندى. سونىڭ ناتيجەسىن كورىپ وتىرمىز. قازىر وزىمىزگە ءتيىستى سۋدى تولىعىمەن الىپ جاتىرمىز. ماقتارالعا «دوستىق» ترانسشەكارالىق كانالىنان سەكۋندىنا 100 تەكشە مەتر سۋ ءتۇسىپ جاتىر. بەكىتىلگەن كەستە بويىنشا 1 ميلليارد 116 ميلليون تەكشە مەتر تىرشىلىك ءنارى الىنادى. بۇل سۋارۋ ماۋسىمىنا جانە كوكتەمگى سوردى شايۋعا جەتكىلىكتى بولادى, – دەيدى «قازسۋشار» رقم وقوف ديرەكتورىنىڭ مىندەتىن اتقارۋشى تولقىن بالپىقوۆ.
جۋىردا وبلىس اكىمى جانسەيىت تۇيمەباەۆ ماقتارالداعى ديقانداردىڭ تىنىس-تىرشىلىگىمەن تانىسىپ قايتقان. اق ماقتا – اق التىننان بولەك, قاۋىن-قاربىز, ءجۇزىم, باۋ-باقشا ونىمدەرىن ءوسىرىپ ساتىپ, پايداعا شىعىپ وتىرعان ديقان قاۋى- مى بيىل سۋدىڭ بەيپىل بولعاندىعىن ايتىپ, ۇكىمەتكە العىسىن جەتكىزدى.
باقتيار تايجان, «ەگەمەن قازاقستان» وڭتۇستىك قازاقستان وبلىسى