ايتسە دە ءدال قازىرگى كۇنى وڭىردەگى مارتوك, قارعالى جانە ايتەكە بي اۋداندارىنىڭ استىق وسىرۋشىلەرى ءداندى داقىلدار ەگىستىگىن ورۋدى ەڭسەرە باستادى. مۇندا ورتاشا ەسەپپەن ءار گەكتاردان 10,7 -11,5 تسەنتنەردەن ءونىم جينالۋدا. ارينە مۇنىڭ تومەن ءونىم ەمەستىگى انىق. سونىمەن بىرگە, ونىڭ سوڭعى كورسەتكىش ەمەس ەكەنىنە دە ەكپىن تۇسىرگەن ءجون. الداعى كۇندەردە بيىلعى جىلدىڭ جاڭا استىعىنىڭ ءتۇسىمى ۇلعايادى دەپ بولجانعان.
تۇتاستاي العاندا بيىلعى وراق كەزىندە وڭىردەگى ەگىنشىلىكپەن اينالىساتىن اگروقۇرىلىمدار 400 مىڭ گەكتارعا جۋىق القاپتىڭ استىعىن قامباعا قۇيماق. قازىر بۇل ءىس بەل ورتاعا تاياپ كەلەدى. دەگەنمەن, ونىڭ اۋىر جۇگى ءالى دە الدا دەپ بىلەمىز. ايماق اۋماعىنداعى استىق جيناۋ ناۋقانى تەك سوڭعى كۇندەرى عانا قارقىن الا ءتۇستى, دەدى گازەت تىلشىسىنە اقتوبە وبلىستىق اۋىل شارۋاشىلىعى باسقارماسىنىڭ باسشىسى قۇسايىن سارسەنباي.
ءبىز وبلىستىڭ ەگىن وسىرۋگە ىڭعايلى وڭىرلەرىنە جۋرناليستىك ءىسساپار بويىنشا جولىمىز تۇسكەن كەزدە ەگىس شارۋاشىلىعى تاۋارلارىن وندىرۋشىلەر وراقتىڭ العاشقى كۇندەرى 5,7 مىڭ گەكتار القاپتىڭ ءداندى داقىلدارىن جيناعانىنا كوز جەتكىزدىك. ءارى بۇل دەڭگەيدىڭ مۇمكىندىك شەگى ەمەس ەكەنىن دە تەرەڭ تۇيسىندىك. ونىڭ ءمان-جايىن ەگىستىكتىڭ بەل ورتاسىندا جۇرگەندەر ءىرى استىقتى شارۋاشىلىقتار بەل شەشە كىرىسكەن كەزدە بۇل كولەمنىڭ بۇدان ءارى ۇلعايا تۇسەتىنىمەن بايلانىستىردى. سول كەزدە بۇگىنگى كورسەتكىشتى 10 مىڭ گەكتارعا دەيىن جەتكىزۋگە مۇمكىندىك تۋعىزىلماق. جوعارىدا كورسەتىلگەن استىق قامىرلىلىعى وتكەن جىلعى دەڭگەيدەن جوعارى ەكەنىن ەسكەرسەك, وراق ناۋقانى ناتيجەسىندە اقتوبەلىك استىق وسىرۋشىلەر ساپالى ءارى قالىپتى ءونىم الاتىنىنا كۇمان تۋمايدى.
وراق ناۋقانى ىرعالىپ-جىرعالۋدى, كىدىرىس پەن كەشەۋىلدەۋدى كوتەرمەيدى. تابيعاتتىڭ ءار كۇنگى قولايلى ءساتى ديقاندار ءۇشىن تەك تيىمدىلىك پەن پايدا اكەلە الادى. قازىرگى كەزدە وبلىستاعى استىق جيناۋشىلار قاجەتتى جانار-جاعارمايمەن جانە وزگە دە ناۋقانعا قاجەتتى تەحنيكالارمەن تولىقتاي قامتاماسىز ەتىلگەن. بۇل فاكتوردىڭ ءوزى دە وراق ناۋقانىن تابىستى تۇردە ءارى ءوز ۋاقىتىندا اياقتاۋعا العىشارت قالاماق.
سونىمەن بىرگە, وراقتىڭ قىزعان شاعىندا تەحنيكالاردىڭ بوس تۇرىپ قالماۋىنا جول بەرمەۋ ءىسىنىڭ دە ماڭىزى ايرىقشا. بۇل باعىتتا وپەراتورلاردىڭ تاۋلىك بويى ءۇزىلىسسىز جۇمىس جاساۋ ءتارتىبى ورنىققان. جاڭا استىقتى قابىلداپ الۋ ىسىندە كىدىرىس بولماۋىنىڭ دا الار ورنى بولەك. وسى ورايدا وبلىستاعى التى استىق قابىلداۋ ورنى جاڭا استىقتى كەشەۋىلدەتپەي قابىلداي باستاعانىنا كۋا بولدىق. ونىڭ ءبارىنىڭ ءتيىستى ليتسەنزيالارى بار ەكەن. وسىلايشا بۇگىنگى كۇنى اقتوبە ايماعىندا ەگىن ورۋ ناۋقانى كۇن سايىن قارقىن الىپ كەلەدى. وڭىردەگى استىق وسىرۋشىلەردىڭ قازىرگى جيناقى ءىس-ارەكەتى ەگىن وراعىن بەلگىلەنگەن كەستەگە ساي اياقتاۋعا باعىتتالعان.
تەمىر قۇسايىن, «ەگەمەن قازاقستان» اقتوبە وبلىسى