كەشە, شىلدەنىڭ 21-ءى امەريكا قۇراما شتاتتارى تۇرعىندارى كۇننىڭ تولىق تۇتىلۋىنا كۋا بولدى دەپ حابارلايدى Baq.kz اقپارات اگەنتتىگى.
ايدىڭ كۇن بەتىن تولىقتاي جابۋى 99 جىلدان بەرى بولماعان قۇبىلىس. ول باتىستاعى ورەگوننان شىعىستاعى وڭتۇستىك كاروليناعا دەيىن ارالىقتاعى 14 شتاتقا, ونداعى ميلليونداعان ادامعا كورىندى. تابيعي قۇبىلىستى ەلدىڭ باستى تەلەارنالارى جانە NASA سايتى تىكەلەي ترانسلياتسيا ارقىلى كورسەتتى. ۇيىمنىڭ ارنايى جابدىقتالعان ۇشاعى تىنىق مۇحيت جاعالاۋى بويىمەن ۇشىپ, تولىق تۇتىلۋ ايماعىنا كىردى.
اقش-تىڭ كەي اۋداندارىندا اي كۇننىڭ بەتىن ەكى مينۋت تۇتاستاي جاپتى. ورەگون شتاتىنداعى مادراس قالاسىن قاراتۇنەك باستى. بۇل قالاشىقتا جەتى مىڭ ادام تۇرسا, سيرەك تابيعي قۇبىلىسىن ءوز كوزدەرىمەن كورۋ ءۇشىن وندا ءجۇز مىڭنان اسا ادام كەلدى.
وقيعانى اق ۇيدەن اقش پرەزيدەنتى دونالد ترامپ وتباسىمەن تاماشالادى.