ءدال مۇنداي ناتيجەگە قازاقستاندىق جوعارى ءبىلىم بەرۋ تاريحىندا ءبىر دە ءبىر وقۋ ورنى قول جەتكىزبەگەن ەكەن. گرانت سانى بويىنشا وزگە وقۋ وردالارىنىڭ ىشىندە كوش باستاپ تۇرعان ۇلتتىق ۋنيۆەرسيتەتتىڭ مۇنداي ناتيجەگە قول جەتكىزۋى تالاپكەرلەردىڭ سانالى ءارى ماقساتتى تاڭداۋىن, وقۋ ورنىنا دەگەن قوعامنىڭ جوعارى سەنىمىن ايعاقتاعانداي.
بيىل ۋنيۆەرسيتەتكە تۇسۋشىلەر تەحنيكالىق جانە جاراتىلىستانۋ-عىلىمي باعىتتاعى ماماندىقتارعا باسىم تاڭداۋ جاساعان. سوندىقتان ەڭ ۇلكەن بايقاۋ راديوتەحنيكا, ەلەكترونيكا جانە تەلەكوممۋنيكاتسيالار, اقپاراتتىق جۇيەلەر, اۆتوماتتاندىرۋ جانە باسقارۋ, ستاندارتتاۋ, سەرتيفيكاتتاۋ جانە مەترولوگيا, بيوتەحنولوگيا سىندى ماماندىقتار بويىنشا جۇرگىزىلگەن. سونداي-اق, اۋدارما ءىسى, حالىقارالىق قاتىناستار, قۇقىقتانۋ, قارجى, ەسەپ جانە اۋديت, ەكونوميكا جانە حالىقارالىق قۇقىق ماماندىقتارى تالاپكەرلەر اراسىندا ۇلكەن سۇرانىسقا يە بولعان. ماگيستراتۋرا مەن دوكتورانتۋراعا تۇسۋگە نيەت بىلدىرگەندەر اراسىنداعى بايقاۋ دا وتە جوعارى بولعانىن ايتا كەتۋ كەرەك. كەيبىر جەكەلەگەن ماماندىقتار بويىنشا ءبىر ورىنعا 20-دان اسا ادام ۇمىتكەر بولعان.
الەمنىڭ ۇزدىك 250 جوعارعى وقۋ ورنى قاتارىنا ەنگەن, ەلىمىزدەگى ءبىلىم, عىلىم جانە يننوۆاتسيانىڭ جەتەكشى ورتالىعى بولىپ تابىلاتىن قازۇۋ دۇنيەجۇزىندەگى ايگىلى جوعارى وقۋ ورىندارىمەن قوسديپلومدى ءبىلىم باعدارلامالارىن جۇزەگە اسىرۋدى, اعىلشىن تىلىندە ءبىلىم بەرۋدى جانە حالىقارالىق ىنتىماقتاستىقتى قارقىندى دامىتا وتىرىپ, جۇمىس بەرۋشىلەردىڭ تالابىن ەسكەرۋ ناتيجەسىنە باعىتتالعان باسقارۋدىڭ الدىڭعى قاتارلى ادىستەرىن, جاڭا وقۋ باعدارلامالارى مەن تەحنولوگيالاردى ەنگىزۋدە. ۋنيۆەرسيتەت تابالدىرىعىن ەندى اتتاعالى وتىرعان ءبىرىنشى كۋرس ستۋدەنتتەرى تەك ءبىلىم الىپ قانا قويماي, بىرەگەي كامپۋستا تابىستى وقۋ مەن شىعارماشىلىق مۇمكىندىكتەرىن جۇزەگە اسىرا الماق.
ميرا بايبەك,
«ەگەمەن قازاقستان»
الماتى