جۋەل ديۋپرات, فرانتسيا:
– ءبىز وتباسىمىزبەن بيىلعى دەمالىسىمىزدىڭ ەكى اپتاسىن قازاقستاندا وتكىزۋگە شەشىم قابىلدادىق. جۇبايىم – سيلۆيا مەن قىزىم حەلويز ۇشەۋىمىزدىڭ كەلگەنىمىزگە ءبىر اپتاداي ۋاقىت بولدى. ءوزىمىز قازاق ەلىنە العاش رەت ساپارلاپ وتىرمىز. شىنىمدى ايتسام, بۇرىن قازاقستان تۋرالى ەستىگەنىمىزبەن, ەلدەرىڭىزدى وسىنشا دامىعان دەپ ويلاماپپىز. كەلگەلى استانانىڭ ادەمى كورىنىسىن كورىپ, تاڭعالىسىمىزدى جاسىرا المادىق. اراسىندا الماتىعا دا جول ءتۇسىپ, ونىڭ ادەمى تاۋلارىن كوزىمىزبەن كورىپ, تامسانىپ قايتتىق. قازاقستانداعى ەكسپو كورمەسى ءبىز ءۇشىن ەرەكشە ەستە قالارلىق ەستەلىك بولدى. قاي ەل دە كورمەگە ۇلكەن ازىرلىكپەن كەلگەنى كورىنىپ تۇر. اسىرەسە, مالايزيا, اۆستراليا, گەرمانيانىڭ پاۆيلوندارى كوڭىلىمىزدەن شىقتى. وتانىمىز – فرانتسيانىڭ پاۆيلونىنا دا باس سۇقتىق. ەكسپو كورمەسىندەگى ەڭ ۇلكەن ءۇش پاۆيلوننىڭ ءبىرى فرانتسيانىكى ەكەنىن ەستىپ, قۋانىپ قالدىق. مۇنىڭ ءوزى ەكى ەلدىڭ اراسىندا جاقسى قارىم-قاتىناس ورناتىلعانىن كورسەتەدى. جۇبايىم ەكەۋىمىز دە سۋرەتشىمىز. ۇيگە ورالىسىمەن استانا تۋرالى, ونىڭ اسەم كورىنىستەرىن بەينەلەيتىن سۋرەتتەر توپتاماسىن شىعارماق ويىمىز بار. ايتپاقشى, ەكسپو الاڭىندا وينالىپ تۇراتىن قازاقتىڭ مۋزىكاسى جۇرەگىمىزدى ايرىقشا باۋرادى. كەرەمەت اۋەندەر ەكەن. مۋزىكاعا ەلىتىپ, ءبىراز دەمالىپ وتىردىق. بۇل دا جۇرەگىمىزدە قالاتىن ادەمى ەستەلىك بولدى.
نۇراي سالىباەۆا, شىمكەنت:
– ءبىز اپالى-سىڭلىلەر بولىپ ەكسپو كورمەسىن ارالاپ ءجۇرمىز. بۇل دەگەنىڭىز ەكى اينالىپ كەلمەيتىن كەرەمەت جاھاندىق شارا عوي. سوندىقتان, جۇرەگىندە وتانىنا دەگەن ماحابباتى بار ءاربىر ادام وسى كورمەگە كەلىپ, كورۋى ءتيىس دەپ ويلايمىن.
بۇگىن ەكىنشى كۇن كورمەنى ارالاپ وتىرمىز. باستاپقىدا شەتتەگى رەسەي, موناكا, گەرمانيا پاۆيلوندارىن ارالادىق. ءبارى دە تاماشا. پاۆيلونداردىڭ ىشىنە كىرسەڭ, الەمدى ارالاعانداي بولاسىڭ. بىرەۋ تەلەفون سوقسا, ء«بىز اقش-تا ءجۇرمىز, ەندى فرانتسياعا بارامىز» دەپ سويلەيسىڭ, كەرەمەت ەمەس پە؟! قۇددى عالامشاردى اينالىپ جۇرگەندەي كۇي كەشىپ ءجۇرمىز. قازاقتىڭ اتىن دۇنيە جۇزىنە تانىتاتىن مۇنداي ءىرى حالىقارالىق شارالار ەلىمىزدە وتە بەرسىن دەيمىن. بۇل وسكەلەڭ ۇرپاقتىڭ ساناسىنا وتانىنا دەگەن ماقتانىش سەزىمىن ۇيالاتاتىنى ءسوزسىز. قازاقتىڭ باسىنان توي ارىلماسىن, ەلىمىز تىنىش, بەسىگىمىز تەك تىنىشتىقتا تەربەلسىن دەيمىن.
قىمبات توقتامۇرات,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»