جيىننىڭ سالتاناتتى اشىلۋىندا ءسوز العان قىتاي حالىق رەسپۋبليكاسىنىڭ قازاقستانداعى ەلشىلىگىنىڭ ارناۋلى وكىلى جوۋ فان كۋنسول مىرزا اتالعان ءىس-شارانى ۇيىمداستىرۋعا اتسالىسقان ۇيىم وكىلدەرىنە شىنايى العىسىن بىلدىرە وتىرىپ, ءوزارا سىيلاستىق پەن قۇرمەتكە نەگىزدەلگەن قىتاي مەن قازاقستان اراسىنداعى قارىم-قاتىناستار دوستىق پەن ىنتىماققا قۇرىلعانىن ايتتى.
قازىلار القاسىنىڭ قۇرامىندا قر ەڭبەك سىڭىرگەن قايراتكەرى, سازگەر مارات وماروۆ, قازاقستان «سۋرەتشىلەر وداعىنىڭ مۇشەسى», «قۇرمەت» وردەنىنىڭ يەگەرى اقتوتى كولكەقىزى, «ناز» مەملەكەتتىك بي تەاترىنىڭ كوركەمدىك جەتەكشىسى, باس بالەتمەيستەر حاديشا ەرمەكبايقىزى, استانا مەملەكەتتىك اكادەميالىق فيلارمونياسى «قورقىت» ءداستۇرلى ساز توبىنىڭ كوركەمدىك جەتەكشىسى شولپان دىلدابەكقىزى بولدى.
ءداستۇرلى ۇلتتىق بي اتالىمى بويىنشا ەكى ەلدەن ون بەس بالا قاتىسىپ, ۇلتتىق ساحنا ونەرىنىڭ مارتبەسىن ءبىر اسقاقتاتتى. ۇلتتىق بي ونەرىنىڭ ءداستۇرى مەن ورنەگىن ساقتاي وتىرىپ, قازاق دۇنيەتانىمىن ايشىقتايتىن نەبىر كانوندىق بي ۇلگىلەرىن ساحنا تورىندە كاسىبيلىكپەن ورىندادى.
قازىلار القاسىنىڭ مۇشەسى شالقار قابدەش ۇلىنىڭ ايتۋىنشا, سۋرەتشى بالالاردىڭ ۇزدىگىن انىقتاۋ وڭايعا تۇسپەگەن كورىنەدى.
– قاتىسۋشىلارعا ەركىن تاقىرىپتا جانە «بالالىق شاق» تاقىرىبى بويىنشا سۋرەت سالۋعا 3 ساعات ۋاقىت بەرىلدى. ۇزدىكتەردى انىقتاۋدا تاقىرىپتىڭ كومپوزيتسيالىق تۇرعىداعى مازمۇنى مەن تەحنيكالىق شەبەرلىگىنە نازار اۋداردىق. ەلدەر اراسىنداعى مادەني جاقىندىقتى ارتتىرا تۇسەتىن مۇنداي شارالاردىڭ ماڭىزى زور,– دەيدى ش.قابدەش ۇلى.
سۋرەت اتالىمى بويىنشا باس جۇلدەگە يە بولعانداردىڭ ءبىرى مەيىرجان تولەگەن قىتايدىڭ شىڭجان ايماعى, باركول اۋدانىنان كەلگەن. بيىل ءۇشىنشى سىنىپقا كوشكەن مەيىرجاننىڭ بۇل استاناعا العاش رەت ساپارلاۋى.
– ەركىن تاقىرىپتا مەن تايدىڭ سۋرەتىن سالدىم. ءوزىم جىلقى مالىن ەرەكشە ۇناتامىن. وسكەندە ۇلكەن سۋرەتشى بولىپ, دۇنيەجۇزىن تانىعىم كەلەدى. استانانىڭ حالقى وتە مادەنيەتتى ەكەن, ساپار ەرەكشە ۇناپ جاتىر, –دەيدى كىشكەنتاي سۋرەتشى.
جالپى ىرىكتەۋ ساتىلارىندا قازىلار القاسى ەڭ الدىمەن بالالاردىڭ جاس ايىرماشىلىعىن باستى نازارعا الدى. سونىمەن بىرگە ونەر كورسەتۋدەگى شەبەرلىگى مەن جاڭالىعى الدىمەن ەسكەرىلدى. جۇلدەلى ورىن العان جەڭىمپازدار مەن قاتىسۋشىلارعا ەستەلىك بۇيىمدار ۇلەستىرىلدى.
ەلىمىزدە تۇڭعىش رەت ۇيىمداستىرىلىپ وتىرعان شارا رۋحاني جاڭعىرۋ باعدارلامالىق ءىس-جوسپارىنىڭ نەگىزىندە ەكى ەل اراسىنداعى مادەني بايلانىستاردى دامىتۋدى, اسىرەسە ونەرلى جاس ورەندەردىڭ اراسىندا شىعارماشىلىق مۇمكىندىكتەرىن شىڭداي ءتۇسۋدى ماقسات ەتكەن. ايتۋلى شارانى «مۇرات جولى» مادەنيەت قوعامدىق بىرلەستىگى, قىتاي شۋار «جاڭا جۇلدىز» مەديا» جشس, استانا قالاسى اكىمدىگىنىڭ «وقۋشىلار سارايى» ۇيىمداستىرىپ وتىر.
ايا ءومىرتاي,
«ەگەمەن قازاقستان»