اۆتوپاركتىڭ ەرەكشەلىگى – قالا كولەمىندە قىزمەت كورسەتەتىن ۇلكەن سىيىمدىلىقتاعى اۆتوبۋستارعا ارنالعان تۇراقتار, جانارماي بەكەتى, كولىك جۋ الاڭى جانە اۆتوبۋستاردىڭ ۇزدىكسىز جۇمىس جاساۋىنا جاعداي جاسايتىن ءتۇرلى مۇمكىندىكتەر قاراستىرىلعان.
– قالامىزدا حالىقتى باسپانامەن قامتۋ, ينجەنەرلىك-ينفراقۇرىلىمداردى دامىتۋ سەكىلدى ەڭ ماڭىزدى سالالاردا ماقتانىشپەن ايتارلىقتاي اۋقىمدى جوبالار جۇزەگە اسىرىلۋدا. سولاردىڭ ىشىندە باستى جەتىستىكتەرىمىزدىڭ ءبىرى – قالا تۇرعىندارىنىڭ قوعامدىق كولىككە دەگەن سۇرانىسىن قاناعاتتاندىرۋ جانە قالامىزداعى كولىك قاتىناسىن دامىتۋ ماقساتىنداعى جوبالار. مىنە, وسىنداي ماڭىزدى جوبالارىمىزدىڭ تاعى ءبىر ناتيجەسى – قوعامدىق كولىكتەردى كۇتىپ-ۇستاۋعا, تەحنيكالىق قىزمەت كورسەتۋگە ارنالعان قالالىق اۆتوبۋس پاركى پايدالانۋعا بەرىلگەلى تۇر, – دەدى قىرىمبەك كوشەرباەۆ.
جاڭا اۆتوبۋستاردىڭ تەحنيكالىق جانە سانيتارلىق جاعدايى ەلدىڭ سۇرانىسىنا ساي بولۋى ءۇشىن وبلىستىق بيۋدجەتتەن 2 ملرد تەڭگەدەن استام قارجى قاراستىرىلعان. اۆتوبۋس پاركىنىڭ جالپى اۋماعى 5 گەكتاردى قۇرايدى جانە 200 اۆتوبۋسقا شاقتالعان. اۆتوبۋس پاركى 250-300 ادامدى جۇمىسپەن قامتيتىن بولادى.
مۇنىمەن قوسا, اعىمداعى جىلى جانار-جاعارماي مەن قوسالقى بولشەكتەردىڭ, گازدىڭ باعالارىنىڭ ءبىرشاما قىمباتتاۋىنا بايلانىستى, جولاقى تاريفتەرى قايتا قارالدى. ەندىگى كەزەكتە, ورتا سىيىمدىلىقتاعى 100-150 جاڭا اۆتوبۋس ساتىپ الىنىپ, بيلەتتىك جۇيە تولىققاندى ەنگىزىلەتىن بولادى. ءسويتىپ, وبلىس ورتالىعىندا قوعامدىق كولىك قىزمەتى تولىعىمەن جاڭارتىلادى.