دەپۋتاتتار اۋەلى كۇن كوزىنەن قۋات الاتىن «بۋرنوە سولار-1» ستانساسىنا باردى. جوباعا سالىنعان جالپى ينۆەستيتسيا قۇنى 122 ميلليون اقش دوللارىن قۇرايدى. ورتالىق ازياداعى ەڭ ءىرى ستانسا قۇرىلىسىن «سامۇرىق-قازىنا ينۆەست» جشس بريتاندىق UG Energy Limited كومپانياسىمەن بىرگە جۇرگىزگەن. سونداي-اق, ساپار بارىسىندا دەپۋتاتتار «گامبۋرگ» شارۋا قوجالىعىنىڭ جۇمىسىمەن تانىستى. اتالعان شارۋا قوجالىعىنىڭ قاراماعىندا 2500 گەكتار جەر بار. مۇندا ءىرى قارا مال جايىلىپ, جەم-ءشوپ داقىلدارى وسىرىلەدى. شارۋاشىلىق كۇن سايىن 10 توننا ءسۇت وندىرەدى.
سودان كەيىن دەپۋتاتتار اۋدان ورتالىعى – باۋىرجان مومىش ۇلى اۋىلىنا كىرەبەرىس بەتكەيدە ورنالاسقان «جۋالى اۋدانىنىڭ قۇرمەتتى ازاماتتارى» اللەياسىندا بولدى. اتالعان اللەيا تاۋەلسىزدىكتىڭ 25 جىلدىعىنا وراي پايدالانۋعا بەرىلگەن. اللەياعا باراتىن باسپالداقتىڭ قاق ورتاسىنا الىپ كىتاپ بەينەسى ورناتىلعان. ونىڭ وڭ جاق بەتىنە تاۋەلسىزدىكتىڭ 25 جىلدىعىنىڭ كەسكىندەمەسى, سول جاق بەتىندە «جۋالى اۋدانىنىڭ قۇرمەتتى ازاماتتارى» دەگەن جازۋ بار. قۇرمەتتى اتاقتى يەلەنگەن 148 ازاماتتىڭ ارقايسىسى ەلىمىزدىڭ ءوسىپ-وركەندەۋىنە ۇلەس قوسىپ كەلەدى. بۇدان كەيىن دەپۋتاتتار اۋدان ورتالىعىنداعى «بۋرنوە» ءسۇت كومپانياسىنا بارىپ, ونىڭ جۇمىسىمەن تانىستى. بۇگىندە اتالعان كاسىپورىن كۇنىنە 25 توننا ءسۇت قابىلداپ, ودان ىرىمشىكتىڭ بىرنەشە ءتۇرىن, ءسۇت, تاعى باسقا ونىمدەر وندىرەدى. مۇنداعى جۇمىستىڭ بارىسىن كومپانيا ديرەكتورى ءا.پوشقاەۆ كەڭىنەن تارقاتىپ ايتتى.
سودان سوڭ, حالىق قالاۋلىلارى «اگروازىق-ت ۇلىكنانمەنجابدىقتاۋ» جشس-نىڭ جۇمىسىمەن تانىسىپ, ب.مومىش ۇلى اۋىلىنىڭ تۇرعىندارىمەن كەزدەستى. وسى ورايدا ب.ەرتاەۆ پەن س.وماروۆ باۋىرجان مومىش ۇلى اتىنداعى مەموريالدىق مۋزەيگە دە ارنايى باردى. مۋزەيدىڭ عىلىمي قىزمەتكەرى ۇ.يسمايلوۆا دەپۋتاتتاردى جادىگەرلەرمەن تانىستىرىپ, باتىردىڭ ومىرىنەن تىڭ ماعلۇماتتار بەردى.
حاميت ەسامان, «ەگەمەن قازاقستان» جامبىل وبلىسى