باۋىرجان بايبەك جۇمىس ساپارى بارىسىندا ۇزىندىعى 3,6 كم بولاتىن اۋەزوۆ كوشەسى بويىمەن تيميريازەۆ كوشەسىنەن گوگول كوشەسىنە دەيىنگى اۋماقتاردى جوندەۋ جۇمىستارىنىڭ بارىسىن تەكسەردى. بۇل ۋچاسكەلەردەگى جوندەۋ جۇمىستارى 12 تامىزدا اياقتالادى دەپ جوسپارلانعان.
اۆتوموبيل جولدارى باسقارماسىنىڭ اقپاراتى بويىنشا جەلتوقسان كوشەسى بويىمەن تيميريازەۆ كوشەسىنەن تولە بي كوشەسىنە دەيىن ۇزىندىعى 2,3 كم بولاتىن, سونىمەن قاتار تولە بيدەن رايىمبەك داڭعىلىنا دەيىن ۇزىندىعى 2,081 كم بولاتىن كوشەلەردەگى جوندەۋ جۇمىستارى اياقتالىپ قالدى.
الماتى اكىمى وتەپوۆ كوشەسى بويىمەن روزىباكيەۆ كوشەسىنەن اتاكەنت كورمەسىنە دەيىنگى كوشەلەردى جوندەۋدىڭ ساپاسىن دا تەكسەردى. اتالعان نىساندا ترامۆاي رەلستەرى الىنىپ, اسفالتوبەتون توسەلگەن, جاڭا ۆەلوسيپەد ايماعى پايدا بولعان. جولاۋشىلار كولىگى جانە اۆتوموبيل جولدارى باسقارماسىنىڭ مالىمەتى بويىنشا بۇل ۋچاسكەگە ون كۇن ىشىندە جول بەلگىلەرى جاسالاتىن بولادى.
قالا باسشىسى جۇمىس ساپارى اياسىندا تورايعىروۆ جانە كابلۋكوۆ كوشەلەرىندە ءجۇرىپ جاتقان جوندەۋ جۇمىستارمەن تانىستى. الماتى اكىمى جول ينفراقۇرىلىمىن سالۋ مەن قايتا جاساۋدا جاياۋ جۇرگىنشى ايماقتارىنا جەتە نازار اۋدارۋ قاجەتتىگىن قاداپ تۇرىپ ايتتى.
اتاپ وتەرلىك جايت, جىل اياعىنا دەيىن 102 وتپەلى جول قايتا جاسالادى جانە تۇندە ولارعا جارىق بەرىلەدى. اۆتوبۋستار مەن تروللەيبۋستار جولاقتارى 100 كيلومەترگە جەتەدى. اقىلى كولىك تۇراعىنىڭ سانىن 10 مىڭ ورىنعا جەتكىزۋ جوپارلانعان. ال, 1700 ۆەلوسيپەدى بار ۆەلوبەكەتتەر سانى 200 دەيىن جەتەتىن بولادى.
سونىمەن قاتار, فۋرمانوۆ, اباي, حمەلنيتسكي كوشەلەرىن ۇڭگىلەۋ جانە بىرنەشە جولايرىقتارىن سالۋ جۇمىستارى دا جالعاسۋدا. جىل اياعىنا دەيىن 500 الماتىلىق اۋلالاردى جوندەۋ جانە قايتا جاساۋ جوسپارلانعان. بۇلاردان وزگە جاياۋ جۇرگىنشىگە باسىمدىق بەرۋ ءۇشىن قايتا جاڭارعان پانفيلوۆ, جىبەك جولى, گوگول, قابانباي باتىر كوشەلەرى مەن «استانا» الاڭىنا كەسپە تاس توسەۋ, جاسىل جەلەكتەر وتىرعىزۋ, كىشى ارحيتەكتۋرالىق فورمالاردى ورناتۋ, سپورتينۆەنتارلارىن, بالالار الاڭدارىن جاساۋ, ۆەلوجولداردى اباتتاندىرۋ, عيماراتتاردىڭ سىرتقى كورىنىسىن جاڭارتۋ جۇمىستارى جوسپارلانعان.