ەڭ الدىمەن, ايماق باسشىسى وبلىس ورتالىعى – شىمكەنتتى سايرام اۋدانىنىڭ اقسۋكەنت اۋىلىمەن جانە تۇلكىباس اۋدانىن قوساتىن نەگىزگى ترانسپورتتىق جول تورابى بولىپ تابىلاتىن جىبەك جولى كوشەسىنىڭ قايتا قۇرۋ جۇمىستارىن كوردى. پازيكوۆ كوشەسىنەن كىشى اينالما جولىنا دەيىن, ارعىنبەكوۆ كوشەسى قيىلىسىنىڭ جول ايرىعىمەن بىرگە رەتتەلىپ جاتقان جولدىڭ جالپى ۇزىندىعى 7,8 شاقىرىم. 2015 جىلدان بەرى باستالعان وسىناۋ جۇمىستاردى اياقتاۋ وسى جىلدىڭ قاراشا ايىنا جوسپارلانعان.
«ەكى باعىتتاعى ءتورت جولاقتى جولدىڭ ەنى بۇرىن 7,5-8 مەترگە دەيىن بولسا, بۇگىنگى تاڭدا جول ەنى 15 مەترگە دەيىن كەڭەيتىلدى. جۇمىستار اياقتالعاندا اتالعان كوشەدەگى كولىك تىعىنى تولىقتاي جويىلىپ, سايرام اۋدانى حالقىنىڭ قالاعا كەلۋىن جەڭىلدەتەتىن بولادى. ىشكى كولىك جولدارىن دامىتۋ ەكونوميكالىق بايلانىستاردىڭ جاقسارۋىنا سەپ بولدى.سوندىقتان جول تورابىنىڭ بويىن رەتتەۋ كەزىندە قالا حالقىنىڭ ءجۇرىپ, تۇرۋىنا ىڭعايلى بولۋى قاجەت. ال,سالا جەتەكشىلەرى بولىنگەن قارجىنى ءتيىمدى پايدالانۋى ءتيىس»-دەدى جانسەيىت قانسەيىت ۇلى.
قايتا قۇرۋ جۇمىستارىنىڭ بارىسىنا كۋا بولعان ج.تۇيمەباەۆ جول قۇرىلىسىن سالۋدا شەتەلدىك كومپانيالاردىڭ تاجىريبەسىن العا تارتتى. ياعني, ەڭ كۇردەلى دەگەن قۇرىلىس نىساندارىن قىسقا مەرزىمدە سالىپ, قولدانىسقا بەرۋگە بولاتىنىن ەسكەرگەن اكىم اتالعان جولدى رەتتەۋ جۇمىستارىن تەزدەتىپ, قىركۇيەك ايىنىڭ سوڭىنا دەيىن پايدالانۋعا بەرۋدى تاپسىردى.
وبلىس اكىمى ارالاعان ەكىنشى نىسان – وبلىستىق ماڭىزى بار كح-97 «اقسۋ-قابىلساي-قايتپاس-قالالىق قوقىس ايماعى» اۆتوموبيل جولىنىڭ 10-18 شاقىرىم ارالىعىن قايتا قۇرۋ جۇمىستارى بولدى. جۇمىستاردى اياقتاۋ 2019 جىلدىڭ قاراشاسىنا جوسپارلانعان. اتالعان جول بولىگىنىڭ جالپى ۇزىندىعى 9 شاقىرىمعا جۋىقتايدى.
«قاسقاسۋ» دەمالىس ايماعىنا باراتىن جولداردىڭ دامۋ سىزباسى دا جۇمىسشى توپتىڭ نازارىنان تىس قالعان جوق. وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ن.بايعۇت اتالعان ماسەلە اياسىندا اكىمگە بايانداما جاساپ, بولاشاق جول قۇرىلىستارىنىڭ جوسپارىمەن تانىستىردى. سايرام اۋدانى ارقىلى تولەبي اۋدانىنا, ودان قاسقاسۋ دەمالىس ايماعىنا باراتىن جولدار مەن وسىناۋ وڭىرلەردەگى ءتۋريزمدى دامىتۋ ماقساتىنداعى بۇكىل جولداردىڭ ينفراقۇرىلىم ماسەلەسىن شەشەتىن جوبالاردى ايتقان باسقارما باسشىسىنا وبلىس اكىمى جۇمىستاردى ۇنەمى باقىلاۋدا ۇستاپ وتىرۋدى جانە كەلەسى جىلعا دەيىن پايدالانۋعا بەرۋ جاعىن قاراستىرۋدى تاپسىردى. وڭتۇستىكتە جىل ساناپ تۋريزم سالاسى دامىپ كەلە جاتقانىن العا تارتقان جانسەيىت قانسەيىت ۇلى قالانىڭ كىرىس-شىعىسى مەن سايرام, تولەبي, قازىعۇرت, ورداباسى باعىتىنداعى جولداردىڭ ءبارىن دامىتۋ قاجەتتىگىنە توقتالدى.
ءوڭىر باسشىسى باستاعان توپ وبلىستىق ماڭىزى بار كح-37 «شىمكەنت-قىزىلاسكەر-تۇيەتاس» اۆتوموبيل جولىنىڭ 0-3,9 شاقىرىم ارالىعىن قايتا قۇرۋ بويىنشا اتقارىلعان شارۋانى دا كوردى. وتكەن جىلدان باستالعان جۇمىستار وسى جىلى قاراشاعا دەيىن ءبىتۋى ءتيىس. حالىققا بارىنشا ىڭعايلى ورتا قۇرۋ قاجەتتىگىنە نازار اۋدارعان ءبىرىنشى باسشى كۇن سۋىماي قولدانىسقا بەرۋدى تاپسىردى.