كەشە استانادا سىرتقى ىستەر ءمينيسترى ەرجان قازىحانوۆ «يادروسىز الەم ءۇشىن» حالىقارالىق فورۋمىنىڭ قوناقتارىمەن كەزدەسۋ وتكىزدى.
ماگاتە باس ديرەكتورى يۋكيا امانومەن بولعان كەزدەسۋدە قازاقستان سىرتقى ساياسات ۆەدومستۆوسىنىڭ باسشىسى يادرولىق قارۋسىزدانۋ جانە ونى تاراتپاۋ سالاسىنداعى وتانىمىزدىڭ حالىقارالىق ارەناداعى قادامدارىن جەتكىزدى. اتاپ ايتساق, 2011 جىلدىڭ قىركۇيەك ايىندا نيۋ-يوركتە وتكەن بۇۇ با 66-شى سەسسياسىندا ايتىلعان استانانىڭ سوڭعى باستاماسىن جەتكىزدى.
مينيستر ءوز سوزىندە ەلىمىزدىڭ يادرولىق قاۋىپسىزدىككە قاتىستى تيىمدى جۇيە قۇرۋ جانە اتوم ەنەرگەتيكاسى نىساندارىنىڭ قاۋىپسىزدىك بەلگىلەرى مەن حالىقارالىق قاتاڭ ستاندارتتارىن جاساۋ جونىندەگى ۇستانىمىنىڭ ماڭىزدىلىعىن جەتكىزدى. «ءبىز وسى ماسەلەگە سۇيەنە وتىرىپ, كەز كەلگەن اۋقىمدى يادرولىق اپاتتىڭ كەسىرى اۋىر ترانسشەكارالىق زارداپقا اكەلەتىنىنە اسا ءمان بەرەمىز. وسىعان وراي, ءبۇگىن ءبىز اتومدىق توتەنشە جاعدايلار بويىنشا احۋالدى داعدارىستاردىڭ جاڭا تەتىكتەرىن تابۋىمىز كەرەك», – دەدى ءسىم باسشىسى.
سونداي اق, باسقوسۋدا قازاقستاندا ەنگىزىلەتىن ءىرى بىرلەسكەن جوبالاردىڭ ورىندالۋ ۇدەرىسى قاراستىرىلدى. وسىعان بايلانىستى مينيستر قازاقستاننىڭ ماگاتە مەن الداعى ۋاقىتتا ءوز ىنتىماقتاستىقتارىن كەڭەيتۋ جانە تەرەڭدەتۋگە دەگەن قىزىعۋشىلىعىن ءبىلدىردى.
بۇۇ اۋماقتىق ورتالىعىنىڭ باسشىسى, ەلشى ميروسلاۆ ەنچامەن بولعان كەزدەسۋدە قازاقستان رەسپۋبليكاسى مەن اتالعان ۇيىمنىڭ اراسىنداعى ىنتىماقتاستىق باعىتتارى تالقىلانىپ, ونىڭ ءىشىندە اۋعانستاننىڭ قازىرگى احۋالى, ۇيىمداسقان ترانسشەكارالىق قىلمىسقا قارسى ءىس-ارەكەتتەر ءماسەلەلەرى, ەكسترەميزم جانە تەرروريزمگە قارسى كۇرەس اڭگىمە وزەگى بولدى. سونىمەن قاتار, كەزدەسۋ كەزىندە تاراپتار ەسىرتكى تاراتۋ ارەكەتتەرىنە قارسى كۇرەس جۇرگىزۋ ءجانە سۋ-ەنەرگەتيكالىق كەمشىلىكتەرىن جويۋ جولدارىن تالقىعا سالدى.
«ەگەمەن-اقپارات».