10 تامىزدا پاۆلوداردا جاسوسپىرىمدەر مەن قىزدار اراسىندا شاڭعى جارىسىنان قازاقستان رەسپۋبليكاسىنىڭ جازعى چەمپيوناتى وتەدى. جارىسقا اقمولا, اقتوبە, شىعىس قازاقستان, قاراعاندى, قوستاناي, پاۆلودار, سولتۇستىك قازاقستان وبلىستارىنىڭ, سونداي-اق استانا جانە الماتى قالالارىنىڭ جاس شاڭعىشىلارى قاتىسادى.
ءداستۇرلى تۇردە وتكىزىلەتىن جازعى جارىستاردىڭ ماقساتى شاڭعى سپورتىن ناسيحاتتاۋ, سپورتشىلاردى شاڭعى جارىسىمەن اينالىسۋعا باۋلۋ. 15 تامىزعا دەيىن 12 مەن 18 جاس ارالىعىنداعى سپورتشى جاسوسپىرىمدەر مەن قىزدار جارىستارعا قاتىسىپ, 2-دەن 10 شاقىرىمعا دەيىنگى ءار ءتۇرلى قاشىقتىقتاردى باعىندىرماق.
الداعى جارىستىڭ باس تورەشىسى – شاڭعى جارىسىنان پاۆلودار وبلىسى قۇراماسىنىڭ باس جاتتىقتىرۋشىسى, سپورت شەبەرى ەۆگەني كيسلياكوۆ. جارىسقا قاتىسۋ تۋرالى وتىنىمدەر 9 تامىزعا دەيىن قابىلدانادى.