ۇزىن كويلەك دەمەكشى, ەتەك قانشا قىسقارىپ, ۇزارسا دا, توي كويلەگى مىندەتتى تۇردە ۇزىن قالپىن ساقتاپ قالدى. اسىرەسە, ءبىزدىڭ قىزدارىمىز حالىقتىڭ قاق ورتاسىنداعى حانشايىم سەكىلدى, ۇزاتىلۋ, ۇيلەنۋ تويلارىندا كويلەگىنىڭ ۇزىن بولعانىن قالايدى. بيىلعى تامىز ايلارىنداعى توي كويلەكتەرىنىڭ ترەند – شابدالى ءتۇستىسى. ەرەكشە اپپاق كويلەكتەر دە ءسان ساحناسىنان كەتە قويعان جوق. تەك ءبىز ايتقان ەكى ءتۇرلى كويلەككە دە مەتالل اسەرلى كويلەكتەر قالىڭدىقتى ءساندى ەتىپ كورسەتەدى.
ال ۇيلەنۋ تويىنىڭ نەگىزگى حانشايىمىنان بولەك, مەيماندارعا ايتار بولساق, ادەمى ۇزىن كويلەك كيۋدەن باس تارتپاڭىز. قىزمەت بابىندا كولبەڭدەپ جۇرۋگە مۇمكىندىك جوق شىعار. سۋعا شومىلعاندا, تاۋعا شىعىپ, كولىك جۇرگىزگەندە ۇزىن كويلەك كيىپ جۇرگەن قولايسىز دەپ ەسەپتەيتىن بولساڭىز, وندا تويعا مىندەتتى تۇردە ۇزىن كويلەك كيگەيسىز. كويلەك كيگەن ايەلدىڭ ءجۇرىس-تۇرىسى دا وزگەرىپ شىعا كەلەدى. كويلەك – كەڭىستىكتەگى عاجايىپ ۇيلەسىم. بيىلعى ماۋسىمدا توبىلعى كۇرەڭ, شىمقاي قىزىل, كوك, كوك-جاسىل, التىن ءتۇستى كويلەكتەر ساندە ەكەنىن ەسكەرتە كەتەيىك.
توي ماكياجى
باسقا مەرەكەلەرگە قاراعاندا, قالىڭدىققا جاسالاتىن توي ماكياجى نازىكتەۋ ءارى كۇردەلى بولىپ كەلەدى. تويدىڭ باستى كەيىپكەرى ۆيزاجيسپەن اقىلداسىپ, الدىن الا سىناق ماكياجىن جاساتۋى ءتيىس. سىناما ماكياج جاساۋ بارىسىندا بوياندىرۋشى قالىڭدىقتىڭ كويلەگى مەن اقجەلەگىنە ءمان بەرۋى ءتيىس. سوعان لايىق شاش ۇلگىسى جاسالىپ شىعادى. نەگىزىنەن ۆيزاجيست پەن ءستيليستىڭ اقىلداسا وتىرىپ قالىڭدىقتىڭ كەلبەتىن جاساپ شىققانى دۇرىس. ەكى مامان دا قالىڭدىقتىڭ جان تۇكپىرىنە, مىنەز-قۇلقىنا ءمان بەرۋى كەرەك. ماسەلەن, ۇزىن توي كويلەگى مەن كەدە كيۋگە بولاتىن ترەند پايدا بولدى. قالىڭدىق قازاقى ءارى ۇياڭ بولسا, بۇل ۇلگىگە بارا بەرمەيتىنى انىق. ونىڭ ۇستىنە ستيل دەگەنىمىز باتىلدىقتى تالاپ ەتەدى. ماسەلەن, قازىر ايەلدەردىڭ شالبار كيىپ ءجۇرۋى قالىپتى جاعداي. ال ەڭ ءبىرىنشى شالبار كيىپ شىققان قىزدىڭ قانداي باتىل بولعانىن ەلەستەتە الاسىز با؟
توي ماكياجىن جاساۋشى تەك بەت-الپەتىڭىزدى عانا ارلەمەيدى. ەگەر كوكىرەك تۇسى اشىق كويلەك كيەتىن بولساڭىز, القىمىڭىزدى دا بوياۋى ءتيىس. قول, قۇلاق. ءتىپتى, ارقاسى اشىق كويلەك كيسەڭىز ارقاڭىزدى دا بوياۋى قاجەت بولادى. سوندىقتان ماكياج ىشىندەگى ەڭ جاۋاپتى ءھام كۇردەلىسى وسى توي ماكياجى بولىپ سانالادى.
ماكياجداردىڭ دا ءتۇر-ءتۇرى سانگە ەنىپ جاتادى. بيىلعى ترەند – كۇتىم كورگەن بەت الپەت دەپ اتالادى. ياعني, مۇنداي ماكياج ءسىز كۇندە كوسمەتولوگقا بارىپ جۇرگەندەي اسەر قالدىرۋى ءتيىس. ول ءۇشىن ۆيزاجيست ارنايى حايلايتەر پايدالانادى. توي ماكياجىن جاساعاندا اشىق تۇستەردى ەمەس, جۇمساق رەڭكتەردى قولدانادى. جاسىل جانە كوك ءتۇستى توي ماكياجىنا جاقىنداي كورمەڭىز. بۇل تۇستەردىڭ ءسىزدىڭ كويلەگىڭىزدى ارزانقول ەتىپ, ءوزىڭىزدى اڭعال ەتىپ كورسەتۋگە قۇدىرەتى جەتىپ جاتىر.
جابىق كويلەك كيەتىن قالىڭدىق شاشىن جوعارى جيناعانى ءجون, ال ارتى اشىق كيىنگەندەر ساقينالى بۇيرالار جاساۋىنا بولادى. توي ماكياجىندا ارنايى كونتۋر جاسالمايدى. ونىڭ ورنىنا ستروبينگ سانگە كىردى. ستروبينگ دەگەن نە؟ بوياۋدى سىڭىرە جاعىپ, بەتتى جارقىراتۋدى ستروبينگ دەپ اتايمىز. كوبىنە گولليۆۋد جۇلدىزدارى ستروبينگ پايدالانادى.
ءسان الەمىنە ساياحات جاساعان اينۇر تولەۋ