بقو قۇرىلىس باسقارماسىنان تۇسكەن مالىمەتكە قاراعاندا, وسى قارجىنىڭ تەڭ جارتىسىنان استامى رەسپۋبليكالىق بيۋدجەتتەن, 1,9 ملرد تەڭگە ۇلتتىق قوردان, 1,4 ملرد تەڭگە جەرگىلىكتى قازىنادان بولىنگەن. وسى جوبا جۇزەگە اسىرىلعان كەزدە 54 اۋىل تازا سۋمەن قامتىلادى. مۇنداي ەلدى مەكەندەردىڭ جالپى سانى 186-عا جەتپەك. وسىعان دەيىن 443 ەلدى مەكەننىڭ 37 پايىزى عانا ورتالىقتاندىرىلعان سۋ كوزىنە قوسىلسا, ەندى بۇل كورسەتكىش 42 پايىزدى (رەسپۋبليكالىق ورتا كورسەتكىش - 52,3 پايىز) قۇراماق.
وڭىردە اۋىز سۋ ماسەلەسى وتكىر تۇرعان اۋداننىڭ ءبىرى - جاڭاقالا. مۇندا تۇرعىنداردىڭ 70 پايىزى تازا سۋعا قول جەتكىزە الماي وتىر. بۇل ماسەلەنى شەشۋ ماقساتىندا زەرتتەۋ جۇمىستارى جۇرگىزىلىپ, كورشىلەس بوكەي ورداسى اۋدانى اۋماعىندا قۇلشىق دەگەن جەردەن سۋ تارتۋ كەرەك دەپ تابىلدى. ونداعى سۋ قورى 27 جىلعا جەتەدى, دەگەنمەن اراقاشىقتىق 151 شاقىرىمعا جەتەتىندىكتەن, ەداۋىر قارجىنى قاجەت ەتەدى. وبلىس باسشىلىعى ۇسىنعان 2,5 ملرد تەڭگەنى قۇرايتىن جوبا ۇكىمەت تاراپىنان قولداۋ تاۋىپ, قر اۋىل شارۋاشىلىعى مينيسترلىگى ارقىلى جۇزەگە اسىرىلماقشى. بيىل سۋ قۇبىرىن تارتۋدىڭ ءبىرىنشى كەزەڭى باستالىپ, بۇل اۋقىمدى جۇمىس كەلەسى جىلى جالعاسىن تابادى.
ايتا كەتەيىك, «اقبۇلاق» باعدارلاماسى قولعا الىنعاننان بەرى وبلىستا بۇعان دەيىن 67 نىسان قولدانىسقا بەرىلدى.