ۇلت جوسپارىنىڭ بىرقاتار قادامىن جۇزەگە اسىرۋ اقپارات جانە كوممۋنيكاتسيالار مينيسترلىگىنە جۇكتەلگەنى بەلگىلى. وسى مىندەتتەر بويىنشا مينيسترلىك تاراپىنان قانداي جۇمىستار اتقارىلدى؟ قانداي كورسەتكىشتەرگە قول جەتكىزىلدى؟
– ەڭ الدىمەن, «ەسەپ بەرەتىن مەملەكەت قالىپتاستىرۋ» جونىندەگى 5-باعىتقا توقتالساق. وسى باعىت بويىنشا ۇلت جوسپارىنىڭ 94, 96 جانە 100-قادامدارى جۇزەگە اسىرىلدى. تارقاتىپ ايتار بولسام, 94-قادام بويىنشا «اقپاراتقا قول جەتكىزۋ تۋرالى» زاڭ قابىلداندى. اتالمىش زاڭ ازاماتتىق قوعام تاراپىنان ۇلكەن قولداۋعا يە بولدى. مۇنىڭ باستى سەبەبى – قۇجاتتاردى ازىرلەۋگە ۇكىمەتتىك ەمەس ۇيىمداردىڭ بەلسەنە اتسالىسۋى. شىنى كەرەك, بۇل زاڭدا كوپتەگەن وڭدى باستامالار قابىلداندى. وسىنىڭ بارلىعى ءاربىر ازاماتتىڭ مەملەكەتتىك ورگاندار قىزمەتى تۋرالى اقپاراتتى ەركىن الۋى مەن تاراتۋ قۇقىعىن قامتاماسىز ەتۋگە مۇمكىندىك بەرىپ وتىر. بۇگىنگى كۇنى كوميسسيا مەملەكەتتىڭ اشىقتىعى مەن ەسەپتىلىگىن ارتتىرۋدى باعدارعا الا وتىرىپ, بەلسەندى جۇمىس جۇرگىزىپ جاتىر, – دەدi اقپارات جانە كوممۋنيكاتسيالار ءمينيسترى.
ول سونداي-اق, وسى زاڭنىڭ تاعى ءبىر ءتيىمدى تۇسى – اقپاراتتارعا قول جەتكىزۋدە شەكتەۋ قويىلماۋ جاعى قاراستىرىلعانىن دا اتاپ ءوتتى. ال وسىنى بۇزعان لاۋازىمدى تۇلعالاردى جاۋاپكەرشىلىككە تارتۋ ماسەلەسى دە قاراستىرىلعانىن مالىمدەدى. وسى باعىتتا كونسۋلتاتيۆتىك كەڭەسشى ورگان اقپاراتقا قول جەتكىزۋ ماسەلەسى جونىندە كوميسسيا قۇرىلىپ, ونىڭ قۇرامىنا وسى زاڭدى ازىرلەۋگە قاتىسقان تۇلعالار مەن ازاماتتىق قوعام مۇشەلەرى ەندى.
ال ۇلت جوسپارىنىڭ 96-قادامىن جۇزەگە اسىرۋ بارىسىندا «اشىق ۇكىمەتتىڭ» بارلىق جۇيەسى ىسكە قوسىلدى, ياعني «اشىق ۇكىمەت» پورتالىندا «اشىق دەرەكتەر», «اشىق نورماتيۆتىك-قۇقىقتىق اكتىلەر» (اشىق نقا), «اشىق بيۋدجەتتەر», «اشىق ديالوگ», سونداي-اق «مەملەكەتتىك ورگاندار قىزمەتىنىڭ تيىمدىلىگىن باعالاۋ» ءبولىمى اشىلدى.
ارقايسىسىنا قىسقاشا توقتالا كەتەيىك. «اشىق نقا» پورتالىنا كىرگەن كەز كەلگەن ادام مەملەكەتتىك ورگانداردىڭ نورماتيۆتىك قۇقىقتىق اكتىلەرى جوبالارىنىڭ, سونداي-اق, زاڭ جوباسى تۇجىرىمداماسىنىڭ تالقىسىنا قاتىسا الادى. قازىرگى تاڭدا پورتالدا قوعامدىق تالقىعا 420-دان استام قۇجات ۇسىنىلعان. ال وتكەن جىلى جەتى مىڭنان استام نقا جوباسى جاريالانعان ەكەن.
«اشىق بيۋدجەتتەر» بولىمىندە قارجىنىڭ قالاي جۇمسالىپ جاتقانىن, ياعني شىعىنداردى باقىلاۋعا مۇمكىندىك بار. بۇگىندە پورتالدا 13 مىڭنان استام بيۋدجەت جوبالارىن كورۋگە مۇمكىندىك بار. سونىمەن قاتار, «اشىق دەرەكتەردە» 2300 مالىمەت جينالعانى دا بەلگىلى بولدى.
«اشىق ديالوگتا» مەملەكەتتىك ورگان قىزمەتكەرلەرىنە تىكەلەي ساۋال جولداۋعا بولادى. بۇگىندە بۇل بولىمگە 191 مىڭنان استام ساۋالداما جولدانسا, سونىڭ 140 مىڭىنا جاۋاپ بەرىلگەن ەكەن.
– «اشىق ۇكىمەت» – قازىرگى ۋاقىتتا ەلىمىزدە دەموكراتيالىق قوعامدى قۇرۋدىڭ بىردەن ءبىر وڭتايلى ءادىسى دەپ ايتۋعا بولادى. ەندى ءاربىر مەملەكەتتىك ورگان ءوز بيۋدجەتىن اشىق تۇردە جاريالاۋعا مىندەتتەلەدى. وسىنىڭ ارقاسىندا كەز كەلگەن قازاقستاندىقتىڭ بيۋدجەت شىعىندارىن باقىلاۋىنا مۇمكىندىك تۋادى. ارينە, «قۇپيا» دەگەن بولىمىنەن وزگەلەرى بارىنە قولجەتىمدى بولادى. ال «اشىق ديالوگتا» كەز كەلگەن جوعارعى لاۋازىمدى پورتالعا جولدانعان ءاربىر سۇراققا جاۋاپ بەرۋى ءتيىس. مەملەكەتتىك ورگان زاڭ جوباسىن قابىلدار كەزدە حالىقتىڭ پىكىرىمەن ساناسۋى قاجەت, – دەدى داۋرەن اباەۆ.
سونىمەن قاتار, «اشىق ۇكىمەت» پورتالىنا اقپارات جاريالايتىن جاۋاپتى مەملەكەتتىك قىزمەتكەرلەردى وقىتۋ جۇمىستارى جۇرگىزىلىپ جاتىر. ءمينيستردىڭ ايتۋىنشا, قازىرگى ۋاقىتتا بارلىعى 9 ورتالىق مەملەكەتتىك ورگاندا 137 ادام وقىتىلدى.
مەملەكەتتىك ورگانداردىڭ ستاتيستيكالىق بازالارىن ونلاين جۇيەگە, ياعني ەلەكتروندى ۇلگىگە كەلتىرۋ ارقىلى ۋاقىتتى ۇنەمدى پايدالانۋعا بولادى. داۋرەن اباەۆ وسى ارقىلى جەمقورلىققا دا تۇساۋ سالۋعا بولاتىنىن ەرەكشە اتاپ ءوتتى. وسى سەبەپتى ۇلت جوسپارىنىڭ 100-قادامىندا مەملەكەتتىك قىزمەتتەردى اۆتوماتتاندىرۋ مىندەتى قويىلعان.
بۇعان بايلانىستى, بىلتىر «ازاماتتارعا ارنالعان ۇكiمەت» مەملەكەتتiك كورپوراتسياسى قۇرىلدى. قازىرگى ساتتە بۇل كورپوراتسيا ارقىلى باس-اياعى 723 مەملەكەتتiك قىزمەتتiڭ 548-iنە نەمەسە 76 پايىزىنا قول جەتكىزۋگە بولادى. ەندى وسى كورسەتكiشتi 85 پايىزعا دەيiن ارتتىرۋ جوسپارلانىپ وتىر.
«ازاماتتارعا ارنالعان ۇكiمەت» كورپوراتسياسىنا قاراستى ەلىمىزدە بارلىعى 350 حالىققا قىزمەت كورسەتۋ ورتالىعى بار. باس-اياعى 20 مىڭنان استام ادام جۇمىس ىستەيدى. ولار جىل سايىن 37 ميلليوننان استام قىزمەت كورسەتەدى. ال بيىل, ياعني التى ايدىڭ كورسەتكىشى بويىنشا 21 ميلليوننان استام قىزمەت كورسەتىلگەن ەكەن. ونىڭ 14 ميلليونى, ياعني 67 پايىزى ەلەكتروندى نۇسقادا جۇزەگە اسىپتى.
سونىمەن قاتار, اۆتوكولىكتەردى ەسەپكە قويۋ جانە جۇرگىزۋشىلىك كۋالىكتەردى تاپسىرۋ بويىنشا مامانداندىرىلعان حالىققا قىزمەت كورسەتۋ ورتالىقتارى (محقك) جۇمىسىنىڭ جەتىلدىرۋى قامتاماسىز ەتىلىپ وتىر. قازىر 12 محقك جۇمىس ىستەيدى. وسى جىلدىڭ العاشقى جارتىجىلدىعىندا 172 مىڭنان استام جۇرگىزۋشىلىك كۋالىگى تاپسىرىلعان, سونداي-اق, 701 مىڭ كولىك ەسەپكە قويىلىپ, ءدال وسىنشاسى ەسەپتەن الىنعان.
بۇدان بولەك, قىزمەتكەرلەردىڭ مۇمكىنگى شەكتەۋلى جاندارمەن دە جۇمىس ىستەۋ ءادىسى ۇيرەتىلدى. قازىر 862 ادام ىمداۋ تىلىندە وقىتىلدى.
ايتا كەتەيىك, ەسەپ بەرەتىن مەملەكەتتى قالىپتاستىرۋ مىندەتى 91-100 قادامداردى قامتيدى. اقپارات جانە كوممۋنيكاتسيالار مينيسترلىگى بەس ينستيتۋتسيونالدىق رەفورمانى ىسكە اسىرۋدىڭ ءۇش قادامىن ورىنداپ وتىر.
ايان ءابدۋالي, «ەگەمەن قازاقستان»