اقش-تان كەلگەن قۇرمەتتى مەيماندى ەمدەۋ ورتالىعىنىڭ باسشىلىعى قۇشاق جايا قارسى الىپ, «انا مەن بالا ۇلتتىق عىلىمي ورتالىعىنىڭ» جۇمىسىمەن تانىستىردى. بىرەگەي مەكەمەدە بالالاردى وڭالتۋ مەن دياگنوستيكالىق ورتالىق, نەيروحيرۋرگيا مەن جەدەل مەديتسينالىق جاردەم, كارديوحيرۋرگيا ورتالىقتارى بىرىكتىرىلگەن. مۇندا زاماناۋي ەڭ وزىق مەديتسينالىق تەحنولوگيالاردىڭ كومەگىمەن انا مەن بالاعا, ناۋقاستارعا مەديتسينالىق كومەك كورسەتىلەدى.
گولليۆۋد اكتەرىن ونكولوگيالىق اۋرۋلارعا شالدىققان بالالار مەن ولاردىڭ اتا-انالارى قوشەمەتپەن قارسى الدى. اتاپ وتەرلىگى, دجون مالكوۆيچ ءومىردىڭ قيىندىقتارىنا جاستاي تاپ بولعان بالالاردى كورۋگە ءوز ەركىمەن كەلگەن. كەزدەسۋ بارىسىندا اكتەر سۇراقتارعا جاۋاپ بەرىپ, كەلگەندەگى ماقساتىن ايتىپ بەردى.
«ونەر ادامى بولعاندىقتان, تاعدىردىڭ سىنىنا تاپ بولعان ادامدارمەن ءجيى كەزدەسۋدى قولاي كورەمىن. مەن دە بىرنەشە وپەراتسيادان امان وتكەن اداممىن. بالاسى ءۇشىن ارپالىسقان سىزدەرگە جانە سىزدەردىڭ بالالارىڭىزعا زور دەنساۋلىق تىلەگىم كەلەدى», - دەدى دجون مالكوۆيچ. اكتەر سونداي-اق, كينوتۋىندىلارداعى وزىنە ەڭ ۇنامدى رولدەرى تۋرالى دا ءسوز قوزعادى. ونىڭ ايتۋىنشا, «ماداگاسكاردىڭ پينگۆيندارى» اتتى 2014 جىلى كورەرمەنگە جول تارتقان كومەديالىق مۋلتفيلمدەگى سەگىزاياقتىڭ ءرولى وزىنە ەرەكشە ۇنايتىن كورىنەدى.
اكتەردىڭ بالالارى تۋراسىندا دا سۇراقتار قويىلدى. اكتەر ءوزىنىڭ 25 جاستاعى قىزى مەن 26 جاستاعى ۇلىنىڭ اكتەرلىك جولدى تاڭداماعانىن اتاپ ءوتتى.
«دەنساۋلىقتارى ناشار بالالاردى كورۋ وتە اۋىر. مەن ولارعا زور دەنساۋلىق تىلەگىم كەلەدى. مۇندا قانشاما اتا-انالار وتىر. بالالارىڭىز باقىتتى ءارى ساۋ بولىپ كەتەرىنە سەنىمدىمىن», - دەدى ايگىلى اكتەر.
كەزدەسۋ سوڭىندا دجون مالكوۆيچ تىلەك بىلدىرگەندەردىڭ بارىمەن فوتوسۋرەتكە ءتۇسىپ, اۆتوگراف تاراتتى.
ەسكە سالا كەتسەك, گولليۆۋد اكتەرىنىڭ بۇل كەلۋى - قازاقستانعا ومىرىندەگى ەكىنشى ساپارى. 2010 جىلى ول الماتى قالاسىندا بولىپ قايتقان. وسى جولى ءحىىى «ەۋرازيا» حالىقارالىق كينوفەستيۆالىنە ارنايى كەلىپ وتىر.