(سۋرەت Comode.kz سايتىنان الىندى)
جارتىلاي فينالدىڭ ناتيجەلەرى بويىنشا اقتىق سايىسقا 14 قاتىسۋشى جولداما الدى, ولار: «استانا وپەرانىڭ» ءسوليستى, كوپتەگەن حالىقارالىق بايقاۋلاردىڭ لاۋرەاتى, كەرەمەت سوپرانو ماريا مۋدرياك (قازاقستان), رۋپەرت ەنتيكناپ (كونترتەنور, ۇلىبريتانيا), داۆيدە دجۋستي (تەنور, يتاليا), سۋ يون لي; سۋ يون پاك (سوپرانو), لەون كيم (باريتون, كورەيا رەسپۋبليكاسى), ۆلادا بوروۆكو, كريستينا محيتاريان, وكسانا سەكەرينا (سوپرانو, رەسەي), ادەلا زاحاريا (سوپرانو, رۋمىنيا), ەممەت و’حەنلونا (باريتون, اقش), رۋسلانا كوۆال (سوپرانو, ۋكراينا), بوريس پريگل (باس-باريتون, چەحيا), لەۆي سەكحاپان (تەنور, وڭتۇستىك افريكا).
پەپيتا ەمبيل دە دومينگو جانە اعا-پلاسيدو دومينگو سىيلىعىنا كۇرەستى داميان ميتستسي (سوپرانو), ماركو چاپوني (تەنور, يتاليا), لەون كيم (باريتون, كورەيا رەسپۋبليكاسى), ادەلا زاحاريا (سوپرانو, رۋمىنيا), لەۆي سەكحاپان (تەنور, وڭتۇستىك افريكا) جالعاستىراتىن بولادى.
29 شىلدە كۇنى جاس انشىلەر جەڭىسكە دەگەن كۇرەستى جالعاستىرۋ ءۇشىن «استانا وپەرا» موبت ساحناسىندا قايتادان جولىعادى, ولار ءۇشىن بۇل جەڭىس – داۋىستىڭ جوعارى سىناماسىنىڭ ايقىن بەلگىسى ءارى كەرەمەت انشىلىك مانساپتىڭ باستاماسى بولماق. جالپى جۇلدە قورى 180 مىڭ دوللاردى قۇرايدى.
«فينالعا وتەتىن قاتىسۋشىلاردى تاڭداۋ قيىنعا سوقتى, كوپ تالقىلاپ, باعالارىن سانادىق, كوپتەگەن پىكىرلەر بولدى. قاتىسۋشىلاردىڭ جالپى دايىندىق دەڭگەيى ەرەكشە جوعارى, سوندىقتان ءبىز ادەتتەگى ساننان ارتىق سايىسكەرلەردى تاڭدادىق. ەندى, سەنبى كۇنى وتەتىن اقتىق مارەنى اسىعا كۇتۋدەمىز. جەڭىمپازدى انىقتاۋ قيىن بولاتىنىن ناقتى ايتا الامىز. شەشىم قابىلداۋ كەزىندە ءبىز بىرنەشە كريتەريلەردى ەسەپكە الامىز: بۇل قاتىسۋشىنىڭ جاسى, ورىنداعان ارياسىنىڭ ۇزاقتىعى. بيىلعى بايقاۋدىڭ ەرەكشە بەلگىسىنىڭ ءبىرى – سوپرانو-قاتىسۋشىلاردىڭ كوپ سانى, بارلىعى دا شەتىنەن مىقتى. مەن وسىمەن 10 جىل «وپەراليانىڭ» ادىلقازى مۇشەسىمىن. بۇل وتە ماڭىزدى دا كۇردەلى ۆوكالدىق جارىس. بايقاۋداعى جەڭىس انشىلەرگە كوپتەگەن جەتەكشى وپەرا تەاترلارىنىڭ ەسىگىن ايقارا اشادى. ءوز اتىمنان ايتاتىن بولسام, تەاترىمنىڭ افيشاسىندا ەسىمدەرىن كورگىم كەلەتىن ءبىر-ەكى ءانشى بار», - دەپ ءبولىستى مەتروپوليتەن-وپەرانىڭ كوركەمدىك جەتەكشىسى دجوناتان فرەند.