«قازاقستاندا فۋتبول دەڭگەيىندە كوتەرگىمىز كەلسە, كوپ نارسەنى اۋىستىرۋىمىز كەرەك. ەڭ ءبىرىنشى, ينفراقۇرىلىمعا وزگەرىس ەنگىزىلۋى قاجەت. ستاديونداردىڭ جاعدايى رەتتەلسە, شەتەلدەن ۇزدىك ويىنشىلار, باپكەرلەر كەلەر ەدى. ارينە, ساپاسى سىن كوتەرمەيتىن الاڭداردا جوعارى دەڭگەيدە ويىن وتكىزۋ وڭاي ەمەس. ماسەلەن, «استانا ارەنا» مەن «قايراتتىڭ» ستاديونىندا باسقا دەڭگەيدە ماتچ وتسە, وزگە الاڭدارداعى ويىن... ادەتتەگى ءادىس-ءتاسىلدى قولدانۋ وڭايعا سوعا بەرمەيدى. سول سەبەپتى كوماندالار ءجيى سىنعا ۇشىرايدى. ءبىر-ەكى ماتچ جاقسى ويناسا, ارى قارايعى جاعدايىن وزدەرىڭىز بىلەسىزدەر», دەدى «استانانىڭ» باس باپكەرى.
ول سونداي-اق, وسى ماسەلە الداعى ۋاقىتتا وزگەرمەسە, ەۋرودودالاردى تەك تەلەديدار ارقىلى عانا تاماشالاۋىمىزعا تۋرا كەلەتىنىن ايتىپ ءوتتى.
«قازاقستانداعى ساپاسىز الاڭدار ەۋروپانىڭ ەشبىر ەلىندە جوق. ول جاقتا قاجەتتى جاعدايدىڭ ءبارى جاسالعان. سول سەبەپتى دەڭگەيلەرى دە بىزگە قاراعاندا الدەقايدا جوعارى. سوندىقتان باپكەرلەردىڭ جاڭا تاكتيكا ويلاپ تابۋىنا دا مۇمكىندىك بار. وسى ماسەلەلەر شەشىمىن تاپسا, ءبىز دە, «قايرات» تا, قازاقستاننىڭ وزگە كوماندالارى دا ەۋروپاعا ءجيى شىعىپ تۇرار ەدى. فۋتبولعا جاقسىراق كوڭىل بولىنسە, دەڭگەيى ارتار كۇن دە الىس ەمەس. ەگەر جابۋلى قازان وسى كۇيىندە جابۋلى قالسا, كەلەر جىلى دا بۇل تاقىرىپتى تاعى قوزعايتىن بولامىز. ال «استانانىڭ» سوڭعى ءۇش جىلدا ەۋروپاعا شىعۋىن تەك ساتتىلىك دەپ ايتار ەدىم. بۇل فۋتبولداعى ءبىر عاجايىپ قانا. ارينە, بۇل جولى دا توپتىق كەزەڭگە جولداما الۋ ءۇشىن «استانا» سوڭىنا دەيىن كۇرەسەتىن بولادى», دەدى ستانيمير ستويلوۆ.
ايتا كەتەيىك, ەرتەڭ ەلوردالىق كوماندا چەمپيوندار ليگاسىنىڭ ءۇشىنشى ىرىكتەۋ كەزەڭىندە پولشانىڭ «لەگيا» كلۋبىنا قارسى وينايدى. ماتچ جەرگىلىكتى ۋاقىت بويىنشا 20:00-دە, «استانا-ارەنا» ستاديونىندا وتەدى.
ايان ءابدۋالي, «ەگەمەن قازاقستان»