قر ۇكىمەتىنىڭ باسشىسى باقىتجان ساعىنتاەۆ پاۆلودار وبلىسىنا جۇمىس ساپارى بارىسىندا «قازاقستان ەلەكتروليز زاۋىتى» اق-عا بارىپ, يندۋستريا 4.0 ەلەمەنتتەرىن ەنگىزۋ ارقىلى ءوندىرىستى جاڭعىرتۋ بارىسىمەن تانىستى, دەپ حابارلايدى primeminister.kz
زاۋىت ديرەكتورى ر. رومانوۆ باقىتجان ساعىنتاەۆقا زاۋىتتىڭ تولىق جوبالىق قۋاتتىلىققا وتكەنىن مالىمدەدى. كاسىپورىندا كۇيدىرىلگەن انودتىڭ زاماناۋي ءارى ەكولوگيالىق قاۋىپسىز پروگرەسسيۆتى تەحنولوگياسى قولدانىلادى.
2,5 مىڭنان استام ادام جۇمىس ىستەيتىن ەلەكتروليز زاۋىتىندا جىل سايىن 250 مىڭ تونناعا دەيىن اليۋميني وندىرىلەدى. زاۋىت ءونىمى ىشكى جانە سىرتقى نارىقتاردا سۇرانىسقا يە. اليۋميني رەسەيگە, بەلارۋسقا, ۋكرايناعا, وزبەكستانعا, تۇركياعا, ازەربايجانعا, نيدەرلاندىعا, برازيلياعا, اقش-قا, يتالياعا, بولگارياعا, چەرنوگورياعا, پولشاعا جانە نورۆەگياعا ەكسپورتتالادى.