بۇل ءسۇيىنشىلى جاڭالىق جاعالاۋى تۋريستىك ينفراقۇرىلىمنىڭ قارقىندى دامىعان قالاشىعىنا اينالىپ كەلە جاتقان الاكول كولىنىڭ مارتەبەسىن تاعى ءبىر كوتەرىپ تاستادى. اۋەجايدىڭ اشىلۋىنا ەلىمىزدىڭ تۇكپىر-تۇكپىرىنەن سىيلى قوناقتار اعىلىپ كەلگەن كۇن بولدى بۇگىن. قۇتتى بولسىن ايتا كەلگەن سىيلى قوناقتار – ۇشتوبە اۋەجايىنىڭ العاشقى رەيسىنە ءمىنىپ كەلدى. اق قاناتتى الىپ قۇس بۇدان بىلاي كەز كەلگەن مەيماندى دەمالىس ورنىنا شارشاتپاي جەتكىزىپ تۇراتىن بولادى. باسشىلىق پەن مامانداردىڭ ايتۋىنشا, اۋەجايدىڭ سالىنۋى, الدىمەن, تۋريزمگە كوپ كوڭىل ءبولىنىپ جاتقانىنىڭ بەلگىسى.
اۋەجايدىڭ اشىلۋ سالتاناتىندا الماتى وبلىسىنىڭ اكىمى اماندىق باتالوۆ ءسوز سويلەدى:
– بۇگىن ءبارىمىز ءۇشىن – تاريحي كۇن. 2014 جىلى ەلباسى وبلىسىمىزعا جۇمىس ساپارىمەن كەلگەندە الاكول كولىنىڭ تۋريستىك الەۋەتىن دامىتۋ تۋرالى تاپسىرما بەرگەن ەدى. وسىعان سايكەس اۋقىمدى شارالار ىسكە اسىرىلدى. ونىڭ ناتيجەسىن وزدەرىڭىز كورىپ وتىرسىزدار. بۇگىنگە دەيىن مۇندا 1 ملرد. تەڭگەدەن استام قارجى تارتىلىپ, جاڭا اۋەجاي بوي كوتەردى.
اكىمنىڭ ايتۋىنشا, تاعى ءبىر جاعىمدى جاعداي جاسالىپ وتىر. ول – بيلەت قۇنىنىڭ ارزاندىعى. حالىققا ءتيىمدى بولۋ ءۇشىن بيلەت باعاسىن سۋبسيديالاۋعا رەسپۋبليكالىق جانە وبلىستىق بيۋدجەتتەن 177,2 ملن.تەڭگە قارجى بولىنگەن.
قۇرىلىسى 2015 جىلى باستالعان اۋەجاي اكىمشىلىگىنىڭ نىسانىنا جەرگىلىكتى اىمدىك تاراپىنان 4,5 گەكتار جەر ءبولىنىپتى. كوپ جىلدان بەرى توقتاپ قالعان اۋە قاتىناسى كەزىندە ەسكىرگەن, قاراۋسىز قالعان ۇشۋ-قونۋ جولاعى قايتا جاڭعىرتىلىپ, اۋە قوزعالىستارىن ۇيىمداستىرۋعا ەڭ قاجەتتى دەگەن راديوتەحنيكالىق جانە مەتەورولوگيالىق قۇرال-جابدىقتار جاڭارتىلعان.
الاكولگە كوڭىل اۋدارۋ, تۋريزم ورتالىعىنا اينالدىرۋ ءىسى اۋەجايمەن شەكتەلمەسە كەرەك. اۋە كەڭىستىگى ارقىلى كوپ كىسى كەلمەگى – مۇنداعى جاعدايعا دا بايلانىستى. سول سەبەپتى, الداعى جىلدار ەنشىسىندە كوپسالالى دەمالىس ورىندارىمەن قاتار وزگە دە تۋريستىك ماقساتتاعى نىساندار سالۋ جوسپارى تۇر.
جاڭا اۋەجايدىڭ ورنىندا 1980-90 جىلدار ارالىعىندا ءۇشارال – الماتى باعىتى بويىنشا جولاۋشى تاسىمالداۋمەن اينالىسقان اەرودروم بولعان. بۇدان بىلاي كوپتەن بەرى اسپانى تىم-تىرىس تۇرعان ۇشتوبەن قالاسىنىڭ 12-ءشى كيلومەترىنەنەن ياك-40, ان-24, ەمبراەر-124, سيەردجي-200 جانە تىك ۇشاقتاردىڭ دىبىسى ەستىلەتىن بولادى. وسىعان دەيىن سوناۋ الماتىدان, تالدىقورعاننان جەتۋ ءۇشىن ءبىر كۇنىن جوعالتاتىن دەمالۋشىلار ەندىگىدە كول جاعالاۋىنا 86 شاقىرىم جول ءجۇرىپ بارادى.
«جەتىسۋ» اۋە كومپانياسى اپتاسىنا ءتورت رەت «استانا ء–ۇشارال – استانا» جانە ءۇش رەت «تالدىقورعان – ءۇشارال – تالدىقورعان» باعىتى بويىنشا جولاۋشى تاسىمالداماق. «جەتىسۋ» اۋەكومپانياسىنىڭ پرەزيدەنتى قالمۇحامەت دوڭسەباەۆتىڭ ايتۋىنشا, كەلەشەكتە بۇل باعىتتارعا «الماتى – ءۇشارال – الماتى» باعىتى قوسىلۋى مۇمكىن. استانا باعىتى بويىنشا جول اقىسى 16 مىڭ, ال وبلىس ورتالىعى تالدىقورعان قالاسىنان قاتىناۋ 8 مىڭ تەڭگە.
الاكولگە كەلۋشىلەر سانى بىلتىر 452 مىڭ ادامعا جەتكەن. بۇل كورسەتكىش 2015 جىلعى ناتيجەمەن سالىستىرعاندا 3 ەسە كوپ. ال بيىل ولاردىڭ سانىن 700 مىڭنان اسادى دەپ بولجانۋدا. جاڭا اۋەجايدىڭ اشىلۋى تۋريستەر سانىنىڭ وسۋىنە سەپتىگىن تيگىزەدى, ال, بۇل ءوز كەزەگىندە ايماق ەكونوميكاسىنا ۇلكەن سەرپىلىس اكەلەدى. كەلەشەكتە اۋداندىق بيۋدجەتتىڭ 50 پايىزىن تۋريزم سالاسى تولىقتىرادى دەپ كۇتىلۋدە.
الماس ءنۇسىپ, «ەگەمەن قازاقستان» الماتى وبلىسى