سونىمەن قوسا, قوستاناي وبلىسىنىڭ تجد ۇيىمدار تەڭگەرىمدەرىنە تەحنيكالىق جارامدى جانە ورتكە قارسى جيناقتالعان قۇرالدارى بار 6 ءورت اۆتوكولىگى تابىستالدى. اعىمداعى جىلدىڭ 6 ايىندا قۇرىلعان ءورت بەكەتتەرى مەملەكەتتىك ورتكە قارسى قىزمەتتەرىن قاتىستىرماي-اق 132 گەكتار القاپتا تۇتانعان 42 دالا ءورتىن ءسوندىردى.
ەندى بيىل جەرگىلىكتى اتقارۋشى ورگاندارمەن بىرلەسە ءورت قاۋىپتى ماۋسىمىندا وبلىس بويىنشا 13-ءشى ءورت بەكەتى قوستاناي اۋدانى اۋماعىندا اشىلدى.
بەكەتتىڭ سالتاناتتى اشىلۋىندا قوستاناي وبلىسىنىڭ توتەنشە جاعدايلار دەپارتامەنتىنىڭ باستىعى, ازاماتتىق قورعاۋ پولكوۆنيگى تالعات كاكىموۆ جانە اۋدان, سەلولىق وكرۋگ, جەرگىلىكتى شارۋاشىلىق باسشىلارى, ءتيىستى ماماندار قاتىستى.
تالعات بازارباي ۇلى وبلىستا ءاربىر اشىلىپ جاتقان جاڭا ءورت دەپولارى تابيعات اپاتىنا قارسى جاڭا كۇش قوساتىنىن, تۇرعىنداردىڭ قاۋىپسىزدىك دەڭگەيىن كوتەرەتىنىن ايتتى.
قوستاناي اۋدانىنىڭ پولوۆنيكوۆ سەلوسىندا اشىلىپ جاتقان ءورت بەكەتى جاقىن ماڭايداعى پولوۆنيكوۆ, گلازۋنوۆ, جاقسىلىق سەلولارىن, سونداي-اق, جالپى 1876 استام تۇرعىنى بار ەلدى مەكەدەردى جانە ورمان دالا اۋماقتارىن قوسىمشا ورتتەن قورعايتىن بولادى.
ءنازيرا جارىمبەت, «ەگەمەن قازاقستان» قوستاناي