مىندەتتى الەۋمەتتىك مەديتسينالىق ساقتاندىرۋ ءىسى بويىنشا جۇرت ەكىۇداي پىكىردە قالعانى جاسىرىن ەمەس. دەنساۋلىق ساقتاۋ مينيسترلىگى بۇل باستامانىڭ قاجەتتىلىگىن, الەمدىك تاجىريبەدە بار ەكەنىن, دەنساۋلىق سالاسىنىڭ دامۋىنا سەپتىگى تيەتىنىن حابارلاپ كەلەدى. دەگەنمەن, كوپشىلىك اراسىندا وسىعان قاتىستى تەرىس پىكىرلەر دە جوق ەمەس. سولاردىڭ ءبىرى قوعام بەلسەندىسى, ەكونوميست راحىم وشاقباەۆ ءبىر ايعا جۋىق ۋاقىت بۇرىن Facebook الەۋمەتتىك جەلىسى ارقىلى مەديتسينالىق ساقتاندىرۋدىڭ جۇيەسى تۋرالى سىني پىكىرىن بىلدىرگەن بولاتىن.
ارادا بەلگىلى ءبىر ۋاقىت وتكەننەن كەيىن دەنساۋلىق ساقتاۋ ءمينيسترى ونى اشىق دەباتقا شاقىرىپ, سول جەردە ءبارىن تالقىلاۋدى ۇسىندى. ءوز كەزەگىندە راحىم وشاقباەۆ ەلجان ءبىرتانوۆتىڭ ۇسىنىسىن بىردەن قابىل الدى.
مەديتسينالىق ساقتاندىرۋ ماسەلەسىن حالىققا جەتكىزۋ بارىسىندا بۇل شارانىڭ ماڭىزى زور. نە ءۇشىن ماڭىزدى؟ سەبەبى, كوپ جاعدايدا بيلىك تاراپىنان قابىلدانىپ جاتقان باستامالار حالىققا تولىق ءارى ناقتى جەتكىزىلمەگەندىكتەن كەراعار پىكىر تۋىنداپ جاتادى. سالدارىنان جاۋاپتى مەكەمەلەر ءوز ءىسىن تولىق ورىنداماي وتىرعانى تۋرالى تەرىس وي قالىپتاسىپ قالاتىنى جاسىرىن ەمەس. ال وسى دەبات ارقىلى مەديتسينالىق ساقتاندىرۋدىڭ قىر-سىرىن دەنساۋلىق ساقتاۋ ءمينيسترىنىڭ ءوزى تولىعىمەن تۇسىندىرەدى. ياعني, ۇكىمەت پەن حالىق اشىق ديسكۋسسياعا كەلىپ, وزەكتى ماسەلەلەردى تالقىعا سالادى.
«بۇل دەباتتى كوپ ادامنىڭ كورگەنىن قالار ەدىم. سەبەبى, وسى ەفير ارقىلى كوپشىلىك كوكەيىندە جۇرگەن سۇراقتارعا جاۋاپ تابىلادى دەپ ويلايمىن. سونداي-اق, ءبىزدىڭ ۇستاناتىن پوزيتسيامىز, ياعني مەديتسينالىق ساقتاندىرۋدى نە سەبەپتى ەنگىزۋ كەرەك ەكەنىن, كەيىنگە قالدىرۋعا بولمايتىنىن كوپشىلىك بىلەر ەدى. تاعى ءبىر ايتا كەتەرلىك جايت, كورەرمەندەر اراسىندا ەفيردى ءۇزىپ كورسەتتى دەگەن وي قالماس ءۇشىن تىكەلەي ەفيردە كورسەتۋدى ءجون كوردىك», دەدى دەنساۋلىق ساقتاۋ ءمينيسترى ەلجان ءبىرتانوۆ.
شىنىن ايتقاندا, ۇكىمەت پەن حالىقتىڭ اشىق ديسكۋسسياعا كەلۋى جاقسى بەلگى. بۇل باتىس قوعامىندا قالىپتاسىپ قالعان جاعداي.
دايىنداعان: ايان ءابدۋالي, «ەگەمەن قازاقستان»