بيىل قاراعاندى وبلىستىق تاريحي-ولكەتانۋ مۇراجايىنا سەكسەن بەس جىل. بۇگىندە قۇندى قۇجاتتار مەن بىرەگەي ەكسپوناتتاردىڭ تاپتىرماس وشاعىنا اينالعان مۇراجايدىڭ ەكسپوزيتسياسى 1800 شارشى مەتردى قۇرايتىن 14 زالدان تۇرادى. تاريحي جادىگەرلەر جيناقتالعان ورىنعا تانىمىمىزدى تەرەڭدەتىپ ءجيى باس سۇعىپ تۇرامىز.
جۋىردا تاعى ءبىر تاماشا قۇجاتتى قولىمىزعا ۇستاپ كوردىك. وتىز ءبىر بەتتەن تۇراتىن قۇندى كىتاپشا – 1906 جىلى قازان قالاسىنداعى «براتيا كاريموۆى» باسپاحانا ۇيىندە قاتتالعان ەكەن. شەجىرەنى «قاراعاندى قايىرىمدىلىق مەكەمەسى» مەدرەسەسىنىڭ توراعاسى مەحمەد بيلگين وقىپ اۋدارعان. اۋدارمادان ۇققانىمىزداي, وندا شىڭعىس حاننىڭ بابالارىنىڭ شەجىرەسى باياندالعان. جالپى, كىتاپ – «شىڭعىستىقتاردىڭ شەجىرەسى» دەپ ەسىمدەلگەن. تاپتىرماس تاريحي قۇجات بۇعان دەيىن بالقاش قالاسىندا ساقتالىپ كەلگەن. اتالمىش مۇراجايعا 2011 جىلى احات سۇلەيمەنوۆ ەسىمدى ازامات وتكىزىپتى. قازىردە باعا جەتپەس باي مۇرا مۋزەيدىڭ «جادىگەرلەر ءاپساناسى» دەپ اتالاتىن بولىگىندە تۇر.
ميراس اسان, «ەگەمەن قازاقستان» قاراعاندى وبلىسى