ەكسپو-2017 حالىقارالىق مامانداندىرىلعان كورمەسى اياسىندا ۇيىمداستىرىلعان كونتسەرت قازاقستان مەن يتاليانىڭ ديپلوماتيالىق قارىم-قاتىناسىنىڭ 25 جىلدىعىنا ارنالدى. كەش شىمىلدىعىن اشقان Hit Italy توبى ابايدىڭ «كوزىمنىڭ قاراسى» ءəنىن يتاليا تىلىندە شىرقادى. «ارنايى قازاقستاندىق جانكۇيەرلەر ءۇشىن جازىلعان جاڭا əن, قابىل الىڭىزدار!», دەگەن توپ əنشىلەرى ابايدىڭ ءانىن ناقىشىنا كەلتىرە ورىنداپ, تىڭدارمانداردىڭ جۇرەگىن جاۋلادى. ال ساحناعا «Ricchi e Poveri» پوپ-گرۋپپاسى شىققاندا تىڭدارمان قاۋىم تىك تۇرىپ قارسى الدى. بەرتىنگە دەيىن تالاي قازاقتىڭ تويىندا رەپەرتۋاردان تۇسپەگەن «Mamama mama Maria ma» ءانىن تاعى ءبىر مارتە ورىنداپ, كورەرمەنمەن بىرگە بيلەدى. توپتىڭ مۋزىكالىق كارەراسى 1968 جىلى گەنۋيادا باستالعان-تۇعىن. «سوڭعى ماحاببات» (L’Ultimo Amore) انىمەن «Cantagiro» فەستيۆالىندە توپ جارعان ونەرپازدار بۇگىنگە دەيىن ساحنا تورىنەن تۇسپەي كەلەدى.
ۇلتتىق كولوريتى مەن ىرعاقتى اۋەنى الەمدى باۋراعان يتاليا ەسترادالىق مۋزىكاسىنىڭ جارقىن جۇلدىزى روبەرتينو لورەتتي 1980 جىلدان بەرى تورتكۇل دۇنيەگە تانىلعان حيت əندەردى ورىنداپ, زالدى ءدۇر سىلكىندىردى. قوشەمەتپەن سوعىلعان الاقاندار دارىندى مۋزىكانتتاردى ساحنادان جىبەرمەي, قايتالانباس كانتيلەناسىمەن باۋراعان رەترو اۋەندەردى ناقىشىنا كەلتىرە بىرنەشە مارتە شىرقادى. «الدا شەتەلدەرگە جوسپارلانعان 820 كونتسەرتىم تۇر. قازاقستانعا كەلگەنگە دەيىن ءۇش اي ەمحانادا جاتىپ, ەندى ءتاۋىر بولعان بەتىم. سىزدەردىڭ قوشەمەتتەرىڭىزدى كورىپ, ەرەكشە قۋانىپ تۇرمىن. مۇمكىن بۇل مەنىڭ ساحناداعى سوڭعى ورىنداۋىم دا شىعار», دەگەن روبەرتينو لورەتتي اعىنان جارىلدى. «جاڭا كارۋزو» اتانعان ونى بەلگىلى وپەرالىق تەنور بەنيامينو دجيلمەن ءجيى سالىستىراتىن. ونىڭ 1962 جىلى جارىق كورگەن العاشقى سينگلى O Sole mio ءانى ميلليونداعان تىڭدارماننىڭ جۇرەگىن جاۋلادى.
ال توتو كۋتۋنو ساحناعا شىعىپ, ايگىلى «L’italiano» ءانىن شىرقاپ بەرگەندە زالدىڭ ءىشىن يتاليانىڭ «al dente» سپاگەتتيى مەن قويۋ كوفە, ماحاببات جۇپارى كەرنەپ كەتكەندەي بولدى. كەزىندە ايگىلى «سان-رەمو» فەستيۆالىندە تۇڭعىش رەت ورىندالىپ, بەسىنشى ورىن العان شىعارما بۇگىندە ونەرسۇيەر قاۋىمنىڭ رياسىز قۇرمەتىنە بولەندى. «گۇلدەر قالاسى» اتانعان سان-رەمونىڭ جۇپارىنىڭ ورتاسىنا اپارىپ تاستاعانداي انگە ەلىتكەن تىڭدارمان قاۋىم توتومەن قوسىلا شىرقادى.
«سان-رەمو» فەستيۆالى – جىل سايىن اقپان ايىندا يتاليانىڭ سولتۇستىك باتىسىندا ورنالاسقان كۋرورتتى قالادا وتكىزىلەتىن مۋزىكالىق بايقاۋ. بۇل فەستيۆال 1951 جىلدان بەرى تالانتتى مۋزىكانتتار مەن ورىنداۋشىلاردى تانىتىپ كەلەدى. ادريانو چەلەنتانو, كلاۋديو موري جəنە توتو كۋتۋنو سىندى əلەمگە əيگىلى əنشىلەر كەزىندە وسى سان-رەمو ساحناسىنان تۇلەپ ۇشقان بولاتىن.
ايا ءومىرتاي, «ەگەمەن قازاقستان»