ساپارعا شىعاتىن اۆتوبۋستاردىڭ ءوز جولاۋشىلارىن وتىرعىزۋلارى ء ۇشىن ارنايى جابدىقتالعان 29 پلاتفورما بولسا, سول زامانداردا سول ورىنداردىڭ بىردە-ءبىرى بوس بولماي, ءبىر اۆتوبۋس جولعا شىعىپ جاتقاندا, ونىڭ ورنىن كەزەكتە تۇرعان كەلەسى اۆتوبۋس باسىپ جاتاتىن. ولاي بولاتىن ءجونى دە بار ەدى. ويتكەنى, ول ۋاقىتتاردا بۇل اۆتوۆوكزالدان قوستاناي وبلىسىنىڭ بارلىق اۋدان ورتالىقتارىن, ۇلكەندى-كىشىلى قالالارى مەن اۋىلدارىن بىلاي قويعاندا, ورتالىق قازاقستاننىڭ بارلىق قالالارىنا جانە رەسەيدىڭ شەكارالاس وڭىرلەرىنىڭ ءىرىلى-ۇساقتى قالالارىنا اۆتوبۋستار اتتانىپ جاتاتىن. سوندىقتان بولار اتالعان اۆتوۆوكزالدىڭ توڭىرەگى قاشان بارساڭ اۋىر-اۋىر سومكەلەرىن كوتەرىپ, ەرسىلى-قارسىلى جوڭكىلگەن حالىقتان ارىلمايتىن. ءوزىڭ باراتىن باعىتقا بيلەت الۋ ءۇشىن ۇزىن-سونار كەزەككە دە تۇرۋعا تۋرا كەلەتىن. بۇلاردىڭ ءبارىن ءبىز انشەيىن, وتكەندى ەسكە ءتۇسىرۋ ءۇشىن ايتىپ وتىرعان جوقپىز. تاياۋدا بەلگىلى ءبىر سەبەپپەن وسى اتالعان ۆوكزالعا بارۋدىڭ ءساتى ءتۇستى. شامامەن العاندا وتىز جىلدان كەيىن كورۋىم بولسا كەرەك. باياعى ءوزىمىز بىلەتىن اۆتوۆوكزالدىڭ كورىنىسى مەن بۇگىنگى اۆتوۆوكزالدىڭ كورىنىسىنىڭ ايىرماشىلىعى جەر مەن كوكتەي. ۆوكزالدىڭ ءىشى-سىرتىندا جيىرما-وتىزداي عانا ادام ءجۇر. ولاردىڭ دا كەيبىرەۋلەرى شىعارىپ سالۋشىلار مەن كۇتىپ الۋشىلار ەكەن. سوعان سايكەس جوعارىدا ءوزىمىز ايتقان ارنايى جابدىقتالعان 29 ورىننىڭ ەكى-ۇشەۋىنەن باسقاسى قاڭىراپ بوس تۇر. ويتكەنى, بۇرىنعىداي جان-جاققا اعىلىپ جاتقان اۆتوبۋس تا, ءيىن تىرەسكەن جولاۋشى دا جوق. ول از دەسەڭىز, عيمارات قازىرگى ۋاقىتتا جەكەمەنشىككە ساتىلعان, بۇل جاعدايدىڭ دا جوعارىدا ايتىلعانداي كوڭىلسىز كورىنىستەردىڭ ورىن الۋىنا سەبەپكەر بولۋى مۇمكىن-اۋ دەگەن وي كەلدى كوكەيىمىزگە. ولاي دەيتىنىمىز, اۆتوۆوكزال توڭىرەگى شىر اينالدىرا قورشالىپ تاستالعان, كىرەبەرىستە كۇزەتشى تۇر. جولاۋشىلار ساپارعا شىعاتىن ورىنعا ەمەس, بەينە-ءبىر اباقتىنىڭ اۋلاسىنا كىرىپ كەلە جاتقانداي اسەردە قالادى ەكەنسىڭ. وسىنداي سەبەپتەن اۆتوماشينا تۇرماق, جاياۋ جۇرگىنشىلەردىڭ وزدەرى ءبىر ىزبەن كىرىپ, ءبىر ىزبەن عانا شىعادى. دەمەك, ءبىر جاقىن ادامىڭدى الىس ساپارعا شىعارىپ سالىپ نەمەسە قارسى العىڭ كەلسە, ونىڭ سومكەسىن جارتى شاقىرىم جەردەن جاياۋلاپ-جالپىلاپ تاسۋعا تۋرا كەلەدى دەگەن ءسوز. وسى ماقالانى جازىپ وتىرعاندا ەسىمە ءبىر جايت ورالدى. وسىدان بىرنەشە جىل بۇرىن گازەتىمىزدىڭ قوستاناي وبلىسىنداعى مەنشىكتى ءتىلشىسى ن.جارىمبەتوۆا وسى اۆتوۆوكزال توڭىرەگىندە تۋىنداعان داۋعا قاتىستى پروبلەمالى ماقالا جازعان بولاتىن. سوندا اۆتوۆوكزالدىڭ قازىرگى قوجايىنى اۆتوۆوكزال ماڭىنداعى الاڭنىڭ («پريۆوكزالنايا پلوششاد») بوتەن بىرەۋگە ساتىلىپ كەتكەنىن, سونىڭ سالدارىنان اينالاداعى جەر كولەمىنىڭ تارىلىپ قالعانىن, اۆتوكولىكتەردىڭ ءارىلى-بەرىلى قوزعالىسىنىڭ قيىنداپ كەتكەنىن ايتىپ شاعىمدانعان ەكەن. سول ايتقان ءسوز راس بولىپ شىقتى. ءبىر قىزىعى, وسى اۆتوۆوكزالدىڭ ءوزى جولاۋشىسىز قالىپ وتىرعان بۇگىنگىدەي كۇنى بىرەۋلەر جاڭادان تاعى بىرەۋىن سالامىز دەپ بۇيرەكتەن سيراق شىعارىپتى. بۇل ەندى كۇلكىلى جاعداي بولاتىن. ايتەۋىر, الگىلەر ىستەرىنىڭ قيسىنسىز ەكەنىن تۇسىنسە كەرەك, كەيىن ءوز ويلارىنان باس تارتقان. قالاي دەگەندە دە, قوستاناي اۆتوۆوكزالىنىڭ ماڭىنداعى كورىنىس وتە كوڭىلسىز. ءبىزدى وننان استام اۋدانى, جۇزدەگەن ەلدى مەكەندەرى بار ءوڭىر تۇرعىندارى وبلىس ورتالىعىنا قالاي جانە نەمەن قاتىنايدى دەگەن ماسەلە ويلاندىردى. ولاي دەيتىنىمىز, وبلىسقا قاراستى امانكەلدى, جانگەلدين, ناۋرىزىم اۋداندارىندا تەمىر جول دەگەنىڭ اتىمەن جوق, بولعان دا ەمەس. سوندىقتان ول جاقتاردىڭ حالقى تەك اۆتوكولىكپەن عانا قاتىناي الادى. راس, بۇل اتالعان وڭىرلەردە تۇرعىندار سانى دا وتە كوپ ەمەس. سونىڭ وزىندە دە نەگىزىنەن قازاق ۇلتىنىڭ وكىلدەرى تۇراتىن ءۇش اۋداندا كەم دەگەندە 60-70 مىڭداي حالىق بولۋعا ءتيىس. ولاردىڭ جاعدايى قالاي بولماق؟ ابىروي بولعاندا, اۆتوۆوكزالدىڭ قازىرگى قوجايىنى جولاۋشىلار كوڭىلىنەن شىعۋ ءۇشىن قولدان كەلگەننىڭ ءبارىن جاساپ جاتقان سىڭايلى. اسحاناسى, باسقا دا قاجەتتى ورىندارى جۇمىس ىستەپ تۇر. بىراق جولاۋشىلار سانىنىڭ ازدىعىنان تۇسەتىن تابىس تا كوپ ەمەس بولسا كەرەك. عيماراتتىڭ ۇزاق جىلدار بويى جوندەۋ كورمەگەنىن بايقاپ ءبىز وسىنداي بايلامعا كەلدىك. ءبارىن ايت تا, ءبىرىن ايت, قوستاناي اۆتوۆوكزالىنداعى ەرتەرەكتە ءوزىمىز كورگەن كوڭىلدى تىرلىك كوزدەن بۇل-بۇل ۇشقان. بۇل دا بولسا ءسىرا, ادام تاعدىرىنىڭ ءوزى قاتاڭ ەسەپكە بايلانعان نارىق زامانىنىڭ زاڭدىلىعى شىعار...
سەيفوللا شايىنعازى, «ەگەمەن قازاقستان» قوستاناي