وزبەكستاندىق ۆەلوساياحاتشى حۋرساند شەروۆ استاناعا تابان تىرەدى. ماسكەۋگە بارا جاتقان ول ەكسپو-2017 كورمەسىن تاماشالاۋ ءۇشىن ارنايى ايالداعان. «قازىر بۇكىل الەم قازاقستانعا نازار اۋدارىپ, استانانى ىزدەيتىن بولدى. كوپپەن بىرگە ءبىز دە بۇرىلدىق», دەيدى ول.
2240 شاقىرىمدى ارتقا تاستاعان ساياحاتشى ەندى قازانعا جول جۇرمەك. سودان كەيىن ماسكەۋگە باعىت الادى. ول ءانشى ءمۇسىلىم ماگوماەۆتىڭ 75 جىلدىق تورقالى تويىن وسىلاي اتاپ وتپەك بولعان. بۇل – حۋرساند شەروۆتىڭ ءۇشىنشى ۆەلوساياحاتى. بۇعان دەيىن التاي, ءسىبىر ارقىلى قىتاي اسقان. تاشكەنتتەن ماسكەۋگە تىكە تارتقان كەزى دە بار. «الدىمەن بىشكەككە توقتادىم. بىراق وسى جاققا اسىقتىم. مەرەكە قۇشاعىنداعى استانانى كورگىم كەلدى. مىنە, امان-ەسەن جەتتىم. جۇرت توي تويلاپ جاتىر. ءبارى ماعان قۇرمەتپەن قارايتىن سەكىلدى. ولارعا وزبەكستاننىڭ سالەمىن جەتكىزدىم. ەكسپو-عا قۇتتى بولسىن ايتامىن. ۆەلوسپورتپەن سەگىز جىلدان بەرى جاتتىعامىن, ەندى سەيىل قۇرىپ ءجۇرمىن», دەپ اعىنان جارىلدى ح.شەروۆ.