جەڭىل اتلەتيكادان ازيا چەمپيوناتى 6-9 شىلدە ارالىعىندا ءۇندىستاننىڭ بحۋبانەشۆار قالاسىندا وتكەن بولاتىن. وعان سارىقۇرلىقتىڭ 43 ەلىنەن 800-دەن استام سپورتشى قاتىسقان. قازاقستان ۇلتتىق قۇراماسى جالپى كوماندالىق ەسەپتە ءتورت التىن, ەكى كۇمىس, ەكى قولا مەدال يەلەنىپ, ءۇندىستان مەن قىتايدان كەيىنگى ءۇشىنشى ورىنعا يە بولدى. «ەل نامىسىن ازيا چەمپيوناتىندا ابىرويمەن قورعاپ, جۇلدەلى ورىنعا يە بولعان بارلىق سپورتشىلارعا فەدەراتسيا باسشىلىعىنىڭ اتىنان العىس بىلدىرەمىن. سپورتشىلارىمىز ازيا بىرىنشىلىگىنەن جالپى سانى سەگىز مەدالمەن ورالدى. ول ءبىز ءۇشىن ۇلكەن جەتىستىك. سپورتتىڭ بۇل تۇرىنە ەلباسىمىز ەرەكشە كوڭىل ءبولىپ, ءاردايىم قولداۋ كورسەتىپ كەلەدى. الداعى جارىستاردا دا سپورتشىلارىمىز جاقسى ناتيجەگە قول جەتكىزەدى دەپ ويلايمىن», دەدى ادىلبەك جاقسىبەكوۆ. 100 جانە 200 مەترگە جۇگىرۋدەن ايەلدەر اراسىندا ەكى التىنعا قول جەتكىزگەن ۆيكتوريا زيابكينا مەن ءۇش قارعىپ سەكىرۋ سايىسىنان چەمپيون اتانعان ماريا وۆچيننيكوۆاعا قارجىلاي 5 مىڭ اقش دوللارى, ودان بولەك قۇرامىندا سۆەتلانا گولەندوۆا, ريما كاشافۋتدينوۆا, ۆيكتوريا زيابكينا جانە ولگا سافرونوۆا بار 4ح100 مەترگە ەستافەتالىق جۇگىرۋدەن ايەلدەر قۇراماسىندا توپ جارعان ءاربىر جەلاياق قىزعا 400 مىڭ تەڭگە كولەمىندە قارجىلاي سىياقى بەرىلدى. سونىمەن قاتار, 100 مەتردە كۇمىس, 200 مەتردە قولا مەدالعا يە بولعان ولگا سافرونوۆا – 4,500, ءۇش قارعىپ سەكىرۋدەن كۇمىس جۇلدەگەر يرينا ەكتوۆا 3 مىڭ جانە ەرلەر اراسىنان يادرو لاقتىرۋدان قولا مەدالدى يەلەنگەن يۆان يۆانوۆ 1,500 اقش دوللارىمەن ماراپاتتالدى. ماراپاتتاۋ راسىمىندە مادەنيەت جانە سپورت ءمينيسترى ارىستانبەك مۇحامەدي ۇلى ۇلتتىق قۇرامانىڭ باپكەرلەر قۇرامىنا العىس ايتىپ, پرەزيدەنتتىڭ جەڭىل اتلەتيكاعا باسا نازار اۋدارىپ جاتقانىن جەتكىزدى. ماراپاتتاۋ ءراسىمىنىڭ سوڭىندا ادىلبەك جاقسىبەكوۆ بارلىق سپورتشى مەن باپكەرلەرگە الداعى جارىستاردا ساتتىلىك تىلەدى.
ءالي بيتورە, فوتو: ورىنباي بالمۇرات, «ەگەمەن قازاقستان»