شاباندوزدار بەس شاقىرىمدىق جورعا جارىسى, جەتى شاقىرىمدىق قۇنان بايگە, جانە 21 شاقىرىمدىق الامان بايگە بويىنشا باسەكەگە ءتۇستى. رەسپۋبليكالىق جارىسقا ەلىمىزدىڭ 14 وبلىسى مەن استانا جانە الماتى قالالارىنان سپورتشىلار باق سىنادى. الامان, قۇنان بايگە جانە جورعا جارىسىنا 13 وبلىس پەن استانا جانە الماتى قالالارىنان ءار قاشىقتىققا 3 اتتان قاتىستىرىلسا, جارىستى ۇيىمداستىرۋشى وبلىس رەتىندە اتىراۋ وبلىسىنان 5 ات سىنعا ءتۇستى. جارىستىڭ جۇلدە قورى – 51 ملن 700 مىڭ تەڭگەنى قۇرادى. مارەگە ءبىرىنشى جانە بەسىنشى كەلگەن بەس جۇلدەگەرگە ءبولىپ بەرىلدى.
ەڭ العاش جارىس جولىنا جەتى شاقىرىمدىق قۇنان بايگەگە قاتىسۋشى شاباندوزدار شىقتى. بۇل سىندا مارەگە ءبىرىنشى بولىپ جامبىل وبلىسى, قورداي اۋدانىنىڭ شاباندوزى اعىلشىن قاراگەرى تۇقىمىنىڭ اتىن مىنگەن دىلمۇحامەد جولاۋشى كەلدى. جانكۇيەرلەردىڭ قوشەمەتىن يەلەنگەن جەڭىمپاز شاباندوزعا ۇيىمداستىرۋشىلار جەتى ميلليون تەڭگە تابىستادى. جەڭىمپازدان ءسال عانا كەشىگىپ كەلگەن قاراعاندىلىق ايحان تولەگەنوۆ (4 ميلليون تەڭگە) ەكىنشى ورىن, الماتى وبلىسىنىڭ شاباندوزى اسحات ءالىمجان (2,5 ميلليون تەڭگە) ءۇشىنشى ورىندى يەلەندى. سونداي-اق, جامبىل وبلىسىنىڭ شاباندوزى ازات ءابيىر مارەگە ءتورتىنشى كەلسە ء(بىر ميلليون تەڭگە) جانە الماتى قالاسىنىڭ شاباندوزى جۇماتاي اقجول (بەس ءجۇز مىڭ تەڭگە) ۇزدىك بەستىكتى قورىتىندىلادى.
قۇنان بايگەدەن سوڭ, شاباندوزدار بەس شاقىرىمدىق جورعا جارىسىنا قاتىستى. بۇل سىندا قۇنان بايگەدە ەكىنشى ورىن يەلەنگەن قاراعاندى وبلىسىنىڭ شاباندوزى ايحان تولەگەنوۆ باس جۇلدە مەن جەڭىمپازعا بەرىلەتىن ءۇش ميلليون تەڭگەنى قانجىعاسىنا بايلادى. مارەگە ەكىنشى بولىپ شقو شاباندوزى ۆيتالي رەريح (1,5 ميلليون تەڭگە) كەلسە, ءۇشىنشى اقمولا وبلىسىنىڭ شاباندوزى دميتري ۆولكوۆ ء(بىر ميلليون تەڭگە) كەلدى. ءتورتىنشى جانە بەسىنشى ورىندى الماتى قالاسىنىڭ شاباندوزى جارىلقاسىن سابازبەكوۆ (جەتى ءجۇز مىڭ تەڭگە) پەن استانالىق ە.چيبيسوۆ (500 مىڭ تەڭگە) يەلەندى.
ال جانكۇيەرلەر تاعاتسىزدانا كۇتكەن 21 شاقىرىمدىق الامان بايگە جارىسىنا قاتىسۋشىلار جارىس جولىنا سوڭعى بولىپ شىقتى. بۇل بايگەگە جالپى سانى 62 شاباندوز قاتىستى. سونىڭ 40-قا جۋىعى تولىق 21 شاقىرىمدى شاۋىپ ءوتتى. الماتى وبلىسىنىڭ شاباندوزى دياس جۇماش 20 شاقىرىم بويى ۇزدىك وندىقتىڭ قاتارىندا ءجۇرىپ, سوڭعى اينالىمدا قارسىلاستارىنان وق بويى وزىپ بايگە جەڭىمپازى اتاندى. سونداي-اق, 13 ميلليون تەڭگە قارجىلاي ماراپاتقا دا يە بولدى. مارەگە دياستان كەيىن كەلگەن تاعى ءبىر الماتى وبلىسىنىڭ وكىلى ەربول زامۋدين ۇلى (7 ميلليون تەڭگە) ەكىنشى ورىندى قاناعات تۇتتى. ءۇشىنشى ورىن پاۆلودارلىق يبراگيم بوبەكبايعا (5 ميلليون تەڭگە) بۇيىردى. ال ءتورتىنشى جانە بەسىنشى ورىندى الماتى وبلىسىنىڭ شاباندوزى بوبەكباي دىنمۇحامەد (3 ميلليون تەڭگە) پەن قوستانايلىق كيريلل زاستەجكو (2 ميلليون تەڭگە) مىسە تۇتتى.
بايگە سوڭىندا جارىس جەڭىمپازدارى مەن جۇلدەگەرلەرىن مادەنيەت جانە سپورت ءمينيسترى ارىستانبەك مۇحامەدي ۇلى, اقپارات جانە كوممۋنيكاتسيالار مينيسترى داۋرەن اباەۆ, استانا قالاسىنىڭ اكىمى اسەت يسەكەشەۆ پەن اتىراۋ قالاسىنىڭ اكىمى نۇرلان نوعاەۆ ماراپاتتادى.
ءالي بيتورە, «ەگەمەن قازاقستان»