«ارنايى سىنىپتار اشۋ – ءبىزدىڭ ستيل ەمەس. ءبىز وقشاۋلانا بەرەتىن بولساق, وندا جاعدايدى ودان ءارى قيىنداتاتىن بولامىز. ەگەر قوعام مۇگەدەك ادامدار تۋرالى پىكىرىن وزگەرتەتىن بولسا, وندا بىزدە دامىعان باسقا ەلدەردەن كەم ەمەس جۇيە قالىپتاسادى. ەڭ جاقىن دوسىم مەنى وزىمەن تەڭ دارەجەدە كورەدى. باسقالار دا سونداي بولعانىن قالايمىن.
مەنى نازارباەۆ ۋنيۆەرسيتەتىنەن باسقا بىردە-ءبىر جوعارى وقۋ ورنى وقۋعا قابىلدامايتىندىعىن جاقسى بىلەمىن. سوندىقتان دا مەن «ينديگو» اتتى ماڭىزدى جوبانى جاساپ جاتىرمىن. قازىر جاس پەداگوگيكا ماماندارى اراسىندا ىرىكتەۋ جۇرگىزىلۋدە, كەيىن ولار تيۋتور بولىپ جۇمىس ىستەيدى», دەدى ي.مۋستوپۋلو. مۇنداعى تيۋتور – اعىلشىن ءسوزى, اۋدارعاندا تالىمگەر دەگەن ماعىنانى بەرەدى ەكەن. بۇل – ەرەكشە پەداگوگيكالىق لاۋازىم.
«تيۋتور – پەداگوگيكالىق ءبىلىمى بار ءوزىن-ءوزى وقىتقان ادامدار. بىزدە سەمينارلار, ترەنينگتەر بولادى. تيۋتور ۇيگە كەلىپ كومەك كورسەتپەيدى, ول بالاعا تۇسىنىكسىز بولعان كەزدە عانا كومەككە شاقىرىلادى. ءسويتىپ, ول بالالاردىڭ ءوزىن دامىتىپ, قوعامعا بەيىمدەلۋىنە اتسالىسادى. مەن وسى جوبانىڭ جۇزەگە اسۋىنا بار كۇشىمدى سالامىن», دەيدى جاس فيزيك. دارىندى جەتكىنشەك اڭگىمەسىنىڭ اراسىندا كەمبريدج ۋنيۆەرسيتەتىنىڭ پروفەسسورى, اعىلشىننىڭ اتاقتى عالىمى ستيۆەن حوكينگپەن كۇزدە كەزدەسەتىندىگى جايىندا ايتتى.
سال اۋرۋىنا شالدىققان يسااك تاراز قالاسىنداعى №13 مەكتەپتە ءبىلىم الادى. بىراق, سىرقاتىنا قاراماستان, 2015 جىلى وقۋشىلار اراسىنداعى ۇلتتىق يننوۆاتسيالار كونكۋرسىنىڭ ارنايى سىيلىعىنا يە بولعان. سودان بەرى يسااكتى قازاقستاننىڭ تۇكپىر-تۇكپىرى, ءتىپتى شەنەۋنىكتەر دە تانىپ, بىلە باستادى. سول كەزدە ينۆەستيتسيالار جانە دامۋ مينيسترلىگىن باسقارعان اسەت يسەكەشەۆ يسااكپەن تانىسىپ, ونىمەن تۇسكەن سۋرەتىن بۇكىل الەۋمەتتىك جەلىگە تاراتقان بولاتىن.
اسحات رايقۇل,
"ەگەمەن قازاقستان"
سۋرەتتى تۇسىرگەن ورىنباي بالمۇرات,
"ەگەمەن قازاقستان"