ۇلتتىق مەرەكە ورتالىق الاڭداعى ساحنالىق شارادان باستالدى. وندا قازاقستاننىڭ ينۆەستيتسيالار جانە دامۋ ۆيتسە-ءمينيسترى ەرلان حايىروۆ ەكى مەملەكەتتىڭ تىعىز ەكونوميكالىق جانە دوستىق قارىم-قاتىناستارىنىڭ ارقاسىندا ەلىمىزدە وڭتۇستىك كورەيانىڭ 400-گە جۋىق كومپانياسىمەن بىرلەسكەن 40-قا جۋىق جوبانىڭ ىسكە اسىپ جاتقانىن اتاپ ءوتتى. قازاقستاندا كوپ جىلداردان بەرى «KIA» جانە «Hyundai» سياقتى كورەيا كومپانيالارىنىڭ ونىمدەرى ۇلكەن سۇرانىسقا يە. «قازاقستاندا 100 مىڭنان اسا ەتنيكالىق كورەيلەر تۇرادى. سوندىقتان, ەكى ۇلت اراسىنداعى قالىپتاسقان باۋىرمالدىق مەن دوستىق قاسيەت تاريحتان كەلە جاتقان قۇبىلىس دەۋگە بولادى. قازاقستان كورەيانىڭ تاجىريبەسىن بەلسەندى تۇردە قولدانىپ كەلەدى. قازىرگى تاڭدا ءتۇرلى ءبىلىم بەرۋ باعدارلامالارىنىڭ ارقاسىندا كوپتەگەن ستۋدەنتتەر ساپالى جوعارى ءبىلىم الىپ كەلۋدە. بۇگىنگى تاڭدا «تاڭعى شىق ەلى» الەمدەگى ەڭ ەنەرگوتيىمدى ەلدەردىڭ ءبىرى بولىپ تابىلادى», دەدى ۆيتسە-مينيستر.
كورەيالىق تاراپتان ءسوز سويلەگەن ساۋدا, ءوندىرىس جانە ەنەرگەتيكا مينيسترلىگىنىڭ تۇراقتى كوميسسارى كيم ەنگ سام ديپلوماتيالىق قاتىناس ارقاسىندا ينۆەستيتسيا بىرنەشە ەسەگە ارتقانىن تىلگە تيەك ەتتى. كوميسسار ءوز سوزىندە كورەيا پاۆيلونىن تاماشالاعاندار سانى 150 مىڭنان اساتىنىن دا اڭگىمەلەدى.
«قازاقستان – كورەيا رەسپۋبليكاسىنان ورتالىق ازياعا ەڭ اۋقىمدى ينۆەستيتسيا تارتقان مەملەكەت. 1992 جىلى ءبىزدىڭ ەلىمىزدەن قازاقستانعا سالىنعان ينۆەستيتسيا كولەمى 21 ملن اقش دوللارىن قۇراسا, قازىرگى ۋاقىتتا بۇل كورسەتكىش 3,78 ملرد دوللارعا جەتتى. ايتا كەتەرلىگى, سوڭعى ۋاقىتتا كورەيا رەسپۋبليكاسىنا ساياحاتتايتىن قازاقستاندىقتاردىڭ سانى 30 پايىزعا ارتقان», دەدى كيم ەنگ سام.
ۇلتتىق كۇندى مەرەكەلەۋ باعدارلاماسىنىڭ رەسمي بولىگىنەن كەيىن, كورمەگە كەلۋشىلەردى كورەيالىق تانىمال «B-Boy» توبىنىڭ بيشىلەرى, سونداي-اق, «K-pop» جانە «Sorea Band» توبىنىڭ قىزدارى قۋانىشقا بولەدى. سونىمەن قاتار, ساحنادا كورەي ءداستۇرلى جەكپە-جەك ونەرى – تاەكۆوندودان شوۋ كورسەتىلدى. قوناقتار مەن جۋرناليستەر ءۇشىن تانىمال ءارتىس سو كان دجۋننىڭ قاتىسۋىمەن فان ميتينگ ۇيىمداستىرىلدى.
اسحات رايقۇل,
"ەگەمەن قازاقستان"
سۋرەتتى تۇسىرگەن ورىنباي بالمۇرات,
"ەگەمەن قازاقستان"